Tölvumál - 01.02.1988, Blaðsíða 19

tölvutækni, hann verður að hafa gott yfirlit yfir þann vél- og
hugbúnað sem fáanlegur er hér á landi og erlendis, hann verður að
hafa til að bera staðgóða þekkingu á tölvutækni, og fyrst og fremst
verður hann að gæta hagsmuna viðskiptavinar síns. Aðrar stéttir
ráðgjafa, eins og verkfræðingar og rekstrarráðgjafar, hafa gert sér
grein fyrir mikilvægi fyrstnefnda atriðisins og hafa beinlínis sett
starfsreglur sem banna þeim að taka við þóknun eða fríðindum fyrir
verk frá öðrum en verkkaupa. Flestir þeirra taka ekki að sér ráðgjöf
sé um slíkt að ræða. Hér telja menn heiður stéttarinnar mikilvægari
en stundarhagsmuni.
Því miður eru mörg dæmi um að tölvuráðgjafar hafi þegið þóknun frá
söluaðilum hug- og vélbúnaðar, jafnvel án vitundar verkkaupa. Aðrir
gera þetta fyrir opnum tjöldum og hafa beinlínis með höndum sölu á
vél- og hugbúnaði sem umboðinn er af þeim. Það getur ekki þjónað
hagsmunum viðskiptamanna tölvuráðgjafans að ráðgjöfin takmarkist við
þann búnað sem hann hlýtur þóknun fyrir að ráðleggja. Margir sitja
eftir með sárt ennið eftir slík viðskipti og þá heitstrengingu að leita
aldrei framar til tölvuráðgjafa!
Hverjir stunda tölvuráðgjöf?
Áður er getið um að fjöldi fyrirtækja og einstaklinga fyllir flokk
tölvuráðgjafa. Menntun þeirra, sem stunda tölvuráðgjöf, og reynsla er
margvísleg, allt frá því að vera skólastrákar sem hafa brennandi
áhuga á tölvum upp í það að vera hámenntaðir sérfræðingar með langa
reynslu af ráðgjöf. Innan um eru, eins og í flestum öðrum greinum,
ýmsir sem ekki eiga heima í þessum hópi. Hér verður í stuttu máli
gerð grein fyrir hverjir bjóða tölvuráðgjöf.
1. Verkfræðistofur sem sérhæft hafa sig að einhverju eða öllu
leyti í tölvumálum. Þær hafa oftast einn eða fleiri verkfræðinga í
sinni þjónustu sem starfa að tölvuráðgjöf. Nokkrar þeirra hafa
jafnframt með höndum hugbúnaðargerð. og í undantekningartilfellum
hljóta þær þóknun fyrir að beina viðskiptum til þeirra sem selja
tölvubúnað.
2. Rekstrarráðgjafastofur. Um þær á sama við og um verkfræði-
stofurnar, en ráðgjöf þeirra beinist meira að rekstrarþættinum en
tæknilegum þáttum tölvuvæðingarinnar. Samstarf rekstrarráðgjafa- og
verkfræðistofu er mjög vænlegur kostur fyrir þann sem leitar lausna
á tölvumálum sínum.
19 -