Tölvumál - 01.02.1989, Blaðsíða 7

Haldið verður áfram að hafa félagsfund eða ráðstefnu á mánaðarfresti
eins og verið hefur undanfarin ár. Eru félagsmenn hvattir til að hafa
samband við stjórnarmenn um efni fyrir félagsfundi eða ráðstefnur til
að tryggja sem mesta fjölbreytni og breidd.
TÍMARITIÐ TÖLVUMÁL EFLT
Annað sem unnið verður að á næstunni er að sveigja tímaritið okkar,
Tölvumál, meira í átt til ferskleika og nýjunga, án þess þó að hverfa
frá því hlutverki þess að vera framvörður upplýsingatækni hér á
landi.
Með næsta tímariti er þess að vænta að einhverjar breytinganna líti
dagsins ljós. Til þess að hrinda þessum breytingum í framkvæmd voru
þau Bjarni Júlíusson og Guðbjörg Sigurðardóttir fengin. Hafa þau
unnið mikið undirbúningsstarf en meira er framundan, þegar að
framkvæmd kemur.
Stefán Ingólfsson á nokkurn þátt í þeim breytingum sem nú eru
framundan á tímaritinu, en breytingar á tímaritinu voru ræddar á
nokkrum fundum fráfarandi stjórnar.
Verður spennandi að sjá árangurinn. Hann byggist hins vegar ekki
síst á því að félagsmenn leggi efni af mörkum í nýtt og fjölbreytt
blað.
ERLEND SAMSKIPTI
Framundan eru Norddata ráðstefnan og ráðstefna á vegum IFIP en
báðar eru mikilvægir atburðir, ekki síst vegna þess að við eigum aðild
að þeim samtökum sem að þeim standa.
Ekki verður að sinni fjallað um þessar ráðstefnur, það gera aðrir síðar
og betur. Hins vegar eru félagsmenn hvattir til að taka þátt í
ráðstefnum sem þessi samtök standa fyrir, til þess að auka víðsýni
sína og samvinnu okkar við alþjóðleg samtök þeirra sem vinna að
upplýsingatækni.
FRAMKVÆMDASTJÓRI KVADDUR
Kolbrún Þórhallsdóttir framkvæmdastjóri okkar sagði starfi sínu lausu
á síðasta ári. Hún lýkur störfum nú um mánaðarmótin og er að henni
mikill missir eins og þeir vita sem með henni hafa starfað.
TÖLVUMÁL/7