Þjóðviljinn - 18.02.1986, Qupperneq 14

MINNING
Þorlákur G. Ottesen
Fœddur 20. júlí 1894 - Dáinn 3. febrúar 1986
Mér finnst ég verða að segja
fáein orð í tilefni andláts föðurafa
míns, Þorláks G. Ottesen, því
vegna starfa míns erlendis gefst
mér ekki færi á að fylgja honum
síðasta spölinn og vera viðstadd-
ur útför hans.
Ég var svo lánsamur að fá að
hitta hann rúmri viku fyrir and-
látið og átti þá við hann innilegar
samræður sem mér finnst
hugljúft að minnast nú. Ég hafði
aðeins þriggja daga viðdvöl að
þessu sinni og var ferðin farin
vegna frétta af veikindum hans.
Við höfðum annars mælt okkur
mót þegar sumarið væri gengið í
garð. Hann var mjög hress og lék
á als oddi þegar mig bar að garði,
og við nutum endurfundanna
góða stund og ræddum um það
sem á daga hafði drifið þau síð-
astliðin fjögur ár sem við höfðum
ekki hist og notið félagsskapar
hvors annars.
Minni hans og frásagnarhæfi-
leiki var með ólíkindum, og hann
gat meira að segja látið það eftir
sér að leiðrétta rangminni mitt
um fáein atriði, sem kom mér til
að hugsa um þá ótrúlegu stað-
reynd að hann var á 92. aldursári.
Þótt vel liti út um heilsu hans
þennan dag og bjartsýni ríkti um
að bati væri innan sjónmáls,
hrakaði heilsu hans næstu nótt,
og þegar sú stund nálgaðist að við
yrðum að kveðjast, þá leyndist sú
vissa í hugskoti beggja að mjög
vafasamt væri um endurfundi hér
á þessari jörð svo báðir kviðu
kveðjustundinni. Orðin virtust
standa föst og þögn ríkti um
stund, en að lokum var það hann
sem tók frumkvæðið, klappaði
mér á öxlina og sagði: „Heyrðu
vinur minn, ég ætla nú ekkert að
vera að reka þig, en ég held að
það sé best að við kveðjumst
núna og svo fáum við bara að
gera ráð fyrir að við hittumst að
sumri“. Úr svip hans mátti lesa
bæði festu og skapstillingu sem
eitt augnablik hafði vikið
veikindunum til hliðar til þess að
leysa þetta vandamál okkar
beggja.
Pessi viðbrögð hans lýsa betur
en flest annað manninum á bak
við grímuna. Sterkur vilji, hertur
í baráttu lífsins, og mýkt sem svo
auðveldlega fann samhljóm með
mönnum og skepnum.
í fjölskyldu okkar hefur hann
ætíð verið sú þungamiðja og sá
styrkur sem nauðsynlegur er til
að halda saman svo stórum hópi,
en niðjar hans eru um það bil 60
talsins. Hann hefur verið ekkju-
maður síðan 1954 og síðustu 15
árin hefur hann búið á Selásbletti
7 í Reykjavík ásamt klárunum
sínum, 4-5 að tölu. Þar hefur
hann ætíð haft opið hús fyrir ætti-
ngja og vini, sem eru margir, og
þar fékk enginn að ganga um
garða án þess að þiggja rausnar-
legar veitingar sem hann fylgdist
grannt með að væru gerð góð skil
og bragðað væri á hverri sort sem
fram var borin.
Hann var af bændum kominn,
einn margra í stórum systkina-
hópi, en í bernsku fluttist hann til
afa síns og föðurbróður að Ing-
unnarstöðum í Kjós. Þar mótað-
ist skapgerð hans við iðjusemi og
þolgæði sem seinna kom að góð-
um notum í lífinu.
Hugur hans hneigðist að fé-
lagsstörfum og þar beindi hann
kröftum sínum að baráttu verka-
fólks á þeim tímum þegar mest
umbrot voru í mótun þjóðfélags-
ins og baráttan háð til að tryggja
sér og sínum réttindi til brýnustu
lífsnauðsynja.
Hestar og hestamannafélagið
Fákur voru honum hjartans mál.
Hann var lengi formaður Fáks og
átti stóran þátt í uppbyggingu
þess félags. I því starfi kom hon-
um að góðum notum sá hæfileiki
að eiga auðvelt með að um-
gangast fólk með ólíkar skoðanir,
og því átti hann að vinum og
kunningjum marga þá sem ekki
voru á sama máli í pólitíkinni, en í
hestamennsku og öðrum góðum
félagsskap lætur fólk ekki slíka
hluti spilla ánægjunni.
Af börnum hans sex lifa fimm
dætur. Sonur hans Friðrik, faðir
minn, lést 1978, og var það hon-
um erfið raun. Hann var alla tíð
mjög heilsuhraustur, en seinustu
árin hefur hann kennt þess sjúk-
dóms sem varð honum að aldur-
tila. Hann sagði við mig nú
seinast þegar við ræddum saman,
að sér fyndist hann hafa verið lán-
samur maður og lífið hefði verið
sér ríkt, svo eiginlega væri ekki
yfir neinu að kvarta, ef þessi
fyrsta sjúkrahúsvist yrði jafn-
framt hans síðasta. Hann slyppi
þá við þá skapraun að verða
ósjálfbjarga og öðrum til byrði
síðustu æviárin. Hann væri einnig
þakklátur fyrir þá hjálp og aðstoð
sem hann hefði orðið aðnjótandi
seinustu árin, en þó kannski öðr-
um fremur Sigríði dóttur sinni og
manni hennar á meðan hann
lifði, en það var oftast til þeirra
sem hann leitaði um aðstoð við
útréttingar eða hjálp á heimilinu.
Þá er ekki annað eftir en að
kveðja þennan aldna heiðurs-
mann og ættarhöfðingja okkar
með kæru þakklæti fyrir allt.
Hvíl í friði.
Noregi, 10. febrúar, 1986
Pétur Ottesen
Sagt er að til þess að skilja nú-
tímann sé nauðsynlegt að þekkja
fortíðina. Hvort sem að þessi
staðhæfing er rétt eða röng, er
augljóst að velmegunarþjóðfélag
okkar íslendinga varð ekki til af
sjálfu sér. Það var skapað að til-
stuðlan forfeðra okkar, fólks sem
að barðist af hörku, atorku og
vongleði, til þess að við sem á
eftir kæmum mættum lifa lífinu
betur á mannsæmandi hátt. Það
er allt of auðvelt fyrir okkur,sem
teljumst til yngri kynslóðarinnar,
að gleyma því að það viðurværi
sem við höfum í dag hefur ekki
alltaf verið sjálfsagður hlutur og
að það sem við köllum sjálfsögð
mannréttindi, svo sem almenn
menntun, heilbrigðisþjónusta,
atkvæðaréttur, verkalýðsfélög,
verkfallsréttur, og ótal margt
fleira, var ekki til staðar og ekki
virt. Öll þessi sjálfsögðu
mannréttindi varð verkalýður
þessa lands að taka sér, oftast nær
með mikilli hörku og krafðist það
oft bæði mikilla fórna og ósjaldan
þjáninga. Þetta baraítufólk, sem
við eigum svo mikið að þakka, er
nú óðum að hverfa af sjónarsvið-
inu og nú hefur verið borinn til
grafar einn hinna síðustu, Þorlák-
ur Ottesen.
Afi minn, þar sem ég gat ekki
auðsýnt þér virðingu mína og
þakklæti með því að fylgja þér til
grafar, langar mig að nota tæki-
færið og rita þér nokkur kveðju-
orð.í staðinn. Margs er að minn-
ast og margt er að þakka, en það
sem þó leitar helst á er fortíðin.
Það er hverjum manni nauðsyn-
legt að þekkja uppruna sinn og
sögu, að finnast hann eiga sér
stað í rás tímans og hlutdeild í því
er gerist í umhverfi hans. Og þér
get ég þakkað það, að saga lands
míns og þjóðar er mín eigin, að
fyrir tilstuðlan þína finnst mér ég
hafa tekið óbeinan þátt í atburð-
um líðandi aldar. Sögur af
kaupstaðarferðum, þegar gengið
var úr Brynjudal til Reykjavíkur,
og sögur af lífinu í vesturbænum
og af verkalýðsbaráttunni, eru
ekki gamlar atvikssögur sem falla
munu í gleymsku, heldur raun-
verulegir atburðir sem í gegnum
frásagnir hafa tekið á sig líkam-
lega mynd og eru orðnir hluti af
minni reynslu.
Samkennd og þekkingu á þjóð
minni og menningu get ég þakk-
að þér, afi minn, og þar af
leiðandi skilning á stöðu minni og
hlutverki. En nú er kveðjustund-
in runnin upp, orð eru fátækleg
og þakklæti fánýtt nema sýnt sé í
verki. Það eina sem í mínu valdi
er, er að tryggja það að mín börn
muni hljóta í arfleifð skilning og
virðingu fyrir forfeðrum sínum
og því sem að þeir framkvæmdu.
Að þau muni finna til þakklætis
yfir því að vera það sem þau eru,
Islendingar.
Mig langar til þess að kveðja
þig með orðum mesta ritsnillings
sögunnar, Williams Shakespear-
es, þeim er hann lagði Edgar syni
Gloster lávarðar í munn í tilefni
andláts Lés konungs:
„The night of this sad time we
must obey; Speak what we feel,
not what we ought to say. The
oldest hath borne most: we, that
are young shall never see so
much, nor live so long.
Kristín Atladóttir.
HVAÐ ER AÐ GERAST í ALÞÝÐUBANDALAGINU?
Alþýðubandalagið í Njarðvík
Félagsfundur
Alþýðubandalagið í Njarðvík heldur félagsfund fimmtudaginn 20.
febrúar kl. 20.30 í matsal Skipasmíðastöðvar Njarðvíkur. Dag-
skrá: 1) Undirbúningur fyrir bæjarstjórnarkosningarnar á vori
komanda. 2) Inntaka nýrra félaga. 3) Önnur mál.
Allir Alþýðubandalagsfélagar og aðrir stuðningsmenn eru hvattir
til að mæta. - Undirbúningsnefndin.
Alþýðubandalagsfélag Ólafsvíkur
Forval
Vegna bæjarstjórnarkosninganna í vor, ferfram forval sunnudag-
inn 23. febrúar í Mettubúð frá kl. 13 - 17.
Rétt tll þátttöku hafa allir félagsmenn og yflrlýstir stuðningsmenn
Alþýðubandalagsins. Eftirtaldir eru í framboði í forvalinu: Guð-
mundur Jónsson, trésmiður, Haraldur Guðmundsson, skip-
stjóri, Heiðar Friðriksson, verkamaður, Herbert Hjelm, verka-
maður, Margrét Jónasdóttir, húsmóðir og verkamaður, Rúnar
Benjaminsson, vélstjóri, Sigríður Sigurðardóttir, húsmóðir og
verkamaður, Sigurjón Egilsson, sjómaður.
Þeir sem vilja kjósa utankjörstaðar snúi sér til einhvers eftirtal-
inna: Jóhannes Ragnarsson s: 6438. Heiðar Friðriksson s: 6364.
Rúnar Benjamínsson s: 6395 og Sigríður Sigurðardóttir s: 6536.
Félagar eru hvattir til að taka þátt í forvalinu. - Alþýðubanda-
lagsfélag Ólafsvikur.
AB Reykjavík
Viðtalstími
borgarfulltrúa
er á þriðjudögum kl. 17.30 til 18.30. Á
þriðjudag 18. febrúar mætir Guðrún
Ágústsdóttir.
Guðrún
AB Akranesi
Árshátíð
verður haldin laugardaginn 1. mars nk. í Rein. Hátíðin hefst með
borðhaldi kl. 20.00. Fjölbreytt skemmtiatriði. Nánar auglýst síðar.
- Skemmtinefndin.
Málefnahópar Alþýðubandalagsins
Hafið áhrif!
Vettvangur flokksins fyrir umræður og stefnumótun. Hóparnir eru
opnir öllum félögum og stuðningsmönnum Alþýðubandalagsins. í
þeim sitja fulltrúar þingflokks og framkvæmdastjórnar.
Mennta- og menningarmál: 2. fundur þriðjudaginn 18. febrúar
kl. 17.00. Meðal viðfangsefna: Menningarstefna stjórnvalda,
skólamál og verkmenntun í landinu.
AB og verkalýðshreyfingin: 1. fundur þriðjudaginn 18. febrúar
kl. 20.00. Meðal viðfangsefna: vextir, skattar og önnur ríkisfjár-
mál. Einnig lánsfjármál og erlendar skuldir.
Herinn - Nato - friðarbaráttan: 2. fundur miðvikudaginn 19.
febrúar kl. 20.00. Meðal viðfangsefna: skilgreining áfanga að því
lokamarkmiði að ísland verði herlaust, hlutlaust og friðlýst iand.
Fleiri hópar fara af stað á næstunni: Valddreifing - lýðræði,
jafnréttismál, sjávarútvegsmál o.fl.
Fundarstaður er Miðgarður, Hverfisgötu 105, 4. hæð.
Félagar og stuðningsmenn! Skráið ykkur í málefnahópa Al-
þýðubandalagsins hið fyrsta á skrifstofu flokksins Hverfisgötu
105 og látiðs skrá ykkur á fundi. Síminn er 17500.
Alþýðubandalagið í Reykjavík
Spilakvöld
verður í kvöld þriðjudaginn 18. febrúar og
hefst það kl. 20.00 stundvíslega í Miðgarði,
Hverfisgötu 105,4. hæð. Gestur kvöldsins '
er Guðrún Helgadóttir alþingismaður. Guðrún
LAL-félagar athugið!
l_AL-fólagar og annað áhugafólk um landbúnaðarmál er boðað til
fundar í Miðgarði Hverfisgötu 105 4. hæð nk. föstudag 21. febrúar
á milli kl. 15 og 19.
Miðstjórnarmenn á leið í bæinn eru sérstaklega hvattir til að
mæta. Á dagskrá fundarins verður staða landbúnaðarins, bú-
marksmálið, stefnumótun í landbúnaðinum o.fl. - Stjórn LAL.
AB Selfoss
Almennur félagsfundur
verður haldinn mánudaginn 24. febrúar kl. 20.30 að Kirkjuvegi 7.
Fundarefni: Uppstillinganefnd leggur fram tillögur sínar um fram-
boðslista vegna bæjarstjórnarkosninganna í vor.
Félagar eru hvattir til að mæta. Heitt á könnunni. - Uppstillinga-
nefnd.
AB Kópavogur
Bæjarmálaráð
boðar til fundar fimmtudaginn 20. febrúar kl. 20.30 í Þinghóli.
Dagskrá: 1) Atvinnumál, 2)Önnur Mál. - Stjórnin.
>ESKULÝÐSFYLKINGIN
Þriðjudagur 25. febrúar kl. 20.30
Fundaröð um
sósíalisma
Baldur Óskarsson segir frá dvöl sinni í
Tansaníu og sýnir myndir.
Allir velkonnir!
Stjórnin
Baldur
BYGGÐAMENN AB.
Ráðstefna 15.-16. mars
Ráðstefna Byggðamanna Alþýðubandalagsins um sveitarstjórn-
armál og undirbúning kosninga 15. - 16. mars. Ráðstefnan er
ætluð frambjóðendum Alþýðubandalagsins og öðrum áhuga-
mönnum um sveitarstjórnarmál.
Fyrirhuguð dagskráratriði:
1) Kosningarundirbúningur, hagnýt atriði, 2) Réttindi og skyldur
sveitarstjórnarmanna, 3) Málsmeðferð í sveitarstjórnum, 4) Bók-
hald og fjárreiður. 5) Samskipti sveitarstjórna og ríkisins, 5) Starf
Alþýðubandalagsins að sveitarstjórnarmálum. Þeir sem áhuga
hafa á að sækja þessa ráðstefnu tilkynni það til skrifstofu Alþýðu-
bandalagsins Hverfisgötu 105, sími 91-17500. - Stjórn Byggða-
manna Alþýðubandalagsins.
18 SÍÐA - ÞJÓÐVILJINN Þriðjudagur 18. febrúar 1986