Morgunblaðið - 25.10.2002, Side 14

HÖFUÐBORGARSVÆÐIÐ
14 FÖSTUDAGUR 25. OKTÓBER 2002 MORGUNBLAÐIÐ
VATNSVIRKINN ehf
Ármúla 21 · Sími 533 2020
vatnsvirkinn@vatnsvirkinn.is
MERKILÍMBÖND
Sérstaklega hentug og
þægileg merkilímbönd til
notkunar í lagnakerfum.
Merking og litir samkvæmt
stöðlum RB
Heildsala - Smásala
ELDUR hefur í tvígang haft áhrif á
rekstur hjá Sigurði Elí Haraldssyni
eiganda hússins á Laugavegi 38
sem slapp naumlega undan log-
unum í stórbrunanum á Laugavegi
um helgina. Mikil mildi þykir að
eldurinn skyldi ekki læsa sig í hús
númer 38, en húsið við hliðina, sem
einnig er tréhús, gjöreyðilagðist í
eldinum.
„Það er svo undarlegt að húsið
slapp í eldsvoðanum, ef maður hefði
farið svipað út úr eldsvoðanum og
húsið, væri sagt að ekki hafi sviðnað
eitt hár á höfði hans. Húsið er auð-
vitað dálítið illa farið af vatni, reyk
og mikilli umferð slökkviliðs, þann-
ig að það þarf að gera töluvert við
það.“
Sigurður Elí segist auðvitað feg-
inn að ekki fór verr. „En það er ekki
nema hálfur sigur því húsin tvö í ná-
grenni við okkur brunnu til kaldra
kola. Gleðin er þeim trega blandin
að nágrannar okkar urðu fyrir
miklum búsifjum. Ég hef heyrt í
eiganda hússins við hliðina á okkur
og það tekur á taugarnar að átta sig
á því hvað þetta er erfitt og maður
veit ekkert hvað hefði gerst ef eld-
urinn hefði komið upp svolítið
seinna, þegar fólk hefði verið í
fastasvefni.“
Hóf rekstur í húsinu árið 1964
Sigurður Elí eignaðist húsið á
Laugavegi 38 árið 1972, en þá hafði
hann rekið verslunina Elfur, sem
seldi barna- og kvenfatnað, í húsinu
frá árinu 1964. „Húsið var eiginlega
rifið niður í kringum 1980 og byggt
upp að nýju, einungis grindin stóð.
Elfur opnaði þar aftur í nóvember
1980 og sjálf bjuggum við hjónin í
húsinu frá 1980–1989.“
Sigurður hætti verslunarrekstri
árið 1998 og frá þeim tíma hefur
skóverslunin Ecco verið starfrækt í
húsinu. Sigurður leigir út allt húsið,
verslunarrýmið og tvær íbúðir á
efri hæðum.
Áður en Sigurður Elí hóf rekstur
í húsinu var þar til húsa verslunin
Vöruhúsið sem seldi fatnað og þar
áður rak Kristján Hoffmann skó-
verslun í húsinu, auk þess sem í bak-
húsi var skósmiður. Þá hafi fleiri
verslanir verið þar í gegnum tíðina.
Hann segir að húsið hafi fyrst
verið byggt rétt eftir aldamótin,
hann hafi bæði heyrt ártölin 1905
og 1908 nefnd. „Ég held að þessi tvö
timburhús, Laugavegur 38 og 40,
hafi verið góð dæmi um falleg timb-
urhús í Reykjavík frá fyrri hluta
síðustu aldar.“
Slökkviliðsmennirnir
unnu frábært verk
Á Laugavegi 40 voru Gler-
augnaverslunin Sjáðu og Verslunin
Hennar til húsa, en það hús gjör-
eyðilagðist í eldinum. „Árni Jóns-
son, sem stofnsetti Kúnst, lét breyta
þessu húsi eiginlega rétt áður en
húsið á Laugavegi 38 var gert upp.
Við höfðum fyrirmyndina af því
sem Árni heitinn gerði,“ segir Sig-
urður Elí.
Hann var vakinn aðfaranótt
sunnudags þegar eldur geisaði í
húsunum tveimur við hlið hans
húss. „Ég var látinn vita milli kl. 2
og 3 og fór niður eftir. Það var und-
arlegt að standa þarna á götunni og
sjá þetta því þetta var mikið bál.
Miklir eldslogar stóðu þarna upp á
meðan húsin fuðruðu upp. Slökkvi-
liðsmenn unnu þarna frábært verk.
Þeir voru í mjóum stigum með þess-
ar þungu slöngur að sprauta á eld-
inn, það gerir það enginn nema
mikið hraustmenni.“
Sigurður Elí segir að þetta sé í
annað sinn sem eldur hafi áhrif á
rekstur hjá honum. „Við vorum með
lítið útibú í Vestmannaeyjum fyrir
gos. Þegar gaus urðum við að loka
því. Ég fór þá til Eyja og sá aðfar-
irnar þegar eldurinn frá hrauninu
æddi yfir húsin sem kúrðu þarna,
brenndi og braut þau vanmáttug
niður.“
Hann segir að þá líkt og nú hafi
húsið sem verslun hans var í þó
sloppið undan logunum.
Slapp í annað sinn naumlega með reksturinn undan eldi
„Ekki nema hálfur sigur“
Sigurður Elí og kona hans, Þorgerður Blandon, fylgjast með fram-
kvæmdum þegar hús þeirra á Laugavegi 38 var gert upp í kringum 1980.
Hér standa þau við suðurhlið hússins.
Miðborg
ÍBÚAR í Rimahverfi eru enn ósáttir
við tillögur að deiliskipulagi Lands-
símareitsins svokallaða í Grafarvogi
og gagnrýna það samráðsferli sem
verið hefur við mótun þeirra. Þeir
telja fyrirhugaða byggð allt of þétta
miðað við byggðina í kring.
Að sögn Emils Arnar Kristjáns-
sonar, íbúa í Rimahverfi og fulltrúa í
samráðshópi um mótun tillögunnar,
voru yfir hundrað manns mættir á
kynningarfund vegna tillögunnar
síðastliðið þriðjudagskvöld en þar
fóru fulltrúar borgaryfirvalda yfir
nýjustu hugmyndir.
Kom að mótaðri hugmynd
í samráðshópnum
„Það voru engar raddir frá íbúum
sem sögðu að þetta væri gott,“ segir
Emil. „Ég leyfði mér að spyrja út í
sal hvort fólk væri ánægt með hæð
húsanna sem eru þarna. Allur sal-
urinn svaraði nei. Ég spurði hvort
fólki þætti byggðin of þétt og það
svaraði já. Ég spurði hvort fólk vildi
fá fleiri græn svæði og fólk sagði já.
Þar með sneri ég mér að formanni
skipulagsnefndar og sagði að þar
hefði hún álit íbúanna.“
Hann segir mestu óánægjuna snú-
ast um það hversu þétt byggðin er og
bendir á að enn sé gert ráð fyrir jafn-
mörgum íbúðum á svæðinu og í síð-
ustu tillögum. „Við gerum okkur
grein fyrir því að þarna verður byggt
enda höfum við ekkert á móti nýjum
nágrönnum. Hins vegar finnst okkur
svolítið blóðugt að taka þennan stóra
auða reit inni í miðju hverfi alfarið
undir mun þéttari byggð en er allt í
kring.“
Þá segist Emil ósáttur við hvernig
unnið var í samráðshópi, sem skip-
aður var síðastliðið vor með fulltrú-
um borgaryfirvalda og íbúa. „Við
töldum okkur hafa loforð borgar-
stjóra fyrir því að haft yrði samráð
við íbúa. Það var hóað í mig í sept-
ember og þá kom ég í rauninni að
orðnum hlut því það var búið að móta
ákveðna skipulagshugmynd. Þetta
kom mér svolítið á óvart því ég hélt
að íbúar ættu að vera með í mót-
unarferlinu til að óskir þeirra næðu
fram að ganga.“
Vilja búa í gisinni byggð
Hann er ósammála því að með til-
lögunum hafi verið komið til móts við
óskir íbúa að verulegu leyti.
„Við mótmæltum þessum háhýs-
um sem voru alveg út úr kú og það er
rétt að byggðin var lækkuð og þar
var komið til móts við okkur. Hið
sama má segja um aðkomuna að
hverfinu. En við fórum jafnframt
fram á það að þéttleikinn væri í sam-
ræmi við aðliggjandi byggð og það
hefur ekkert verið hreyft við því.
Sömuleiðis vildum við að hæð húsa
yrði í samræmi við byggðina í kring
en hæstu hús í hverfinu eru einungis
þrjár hæðir.
Auk þess höfum ekki séð neinar
vindfarsmælingar á þessum nýju
húsum. Þar finnst okkur komið aftan
að okkur vegna þess að við, sem
þarna búum, erum búin að fjárfesta í
húsnæði í gisinni byggð vegna þess
að við viljum búa í gisinni byggð.
Sumir vilja búa í þéttri byggð og þá
kaupa þeir sitt húsnæði í þéttri
byggð. En þarna er búið að gera það
svæði, sem við fjárfestum í að miklu
þéttara svæði en það var á sínum
tíma.“
Tillagan verði líklega
ekki auglýst
Að sögn Emils eru íbúar að hugsa
sitt mál og hann segir of snemmt að
segja til um hvað þeir muni gera í
framhaldinu en ljóst sé að um ein-
hver mótmæli verði að ræða. Fund-
armenn hafi gengið á fulltrúa skipu-
lagsyfirvalda á fundinum og innt
eftir því hvort tillagan verði auglýst
og fengið þau svör að þeir teldu að
þess þyrfti ekki þar sem ekki væri
um verulegar breytingar að ræða frá
auglýstri tillögu. „Við erum ósátt við
það ef svo er því við teljum okkur
hafa loforð borgarstjóra fyrir því að
þetta verði gert í fullu samráði við
íbúa.“
Hann segir að í lok fundarins á
þriðjudag hafi formaður skipulags-
og bygginganefndar sagt að eftir-
leiðis myndi hún hafa samráð við for-
mann Íbúasamtaka Grafarvogs og
Hverfisráð um málið og túlkaði Emil
það sem svo að hans atbeina væri
ekki lengur óskað í samráði vegna
málsins.
Íbúar í Rimahverfi ósáttir við nýjar tillögur að deiliskipulagi Landssímareitsins í Gufunesi
Morgunblaðið/Árni Sæberg
Emil segir að íbúar hafi látið mikla óánægju í ljós á kynningarfundinum síðastliðinn þriðjudag.
Telja byggðina
enn of þétta
Grafarvogur
MAGNÚS Sædal, byggingarfulltrú-
inn í Reykjavík, segir að starfsemi
veitingastaðarins Kaupfélagsins við
Laugaveg verði stöðvuð enda verði að
hlíta niðurstöðu úrskurðarnefndar
skipulags- og byggingarmála. Hann
segir að úrskurðurinn muni verða
fordæmisgefandi í sambærilegum
málum í framtíðinni.
Úrskurðarnefndin komst að þeirri
niðurstöðu að veiting byggingarleyfis
til veitingastaðarins Kaupfélagsins
hefði ekki verið í samræmi við deili-
skipulag svæðisins og því bæri að
fella það úr gildi. Að sögn Magnúsar
gerir skipulagið ráð fyrir skrifstofum
og verslunarþjónustu á umræddum
stað og byggingaryfirvöld hafi talið
slíkan rekstur heyra undir verslunar-
starfsemi. „Við töldum að það mætti
leyfa þessa starfsemi þarna en það
var röng niðurstaða hjá okkur að
mati nefndarinnar,“ segir Magnús.
Hann segir ljóst að niðurstöðu
nefndarinnar verði að hlíta. „Það er
svo sem hægt að fara í dómsmál út af
þessu en mér er ekki kunnugt um að
það sé vilji Reykjavíkurborgar að
gera það. Í morgun fór frá mér bréf
þar sem ég geri rekstraraðilum stað-
arins grein fyrir því að úrskurðurinn
hafi það í för með sér að öll núverandi
starfsemi sé óheimil.“
Þannig að staðnum verður lokað?
„Já, ég á ekki von á öðru.“
Skýrir réttarstöðuna
Aðspurður hvort borgin sé skaða-
bótaskyld eins og rekstraraðilar stað-
arins hafa haldið fram segir Magnús
að ekki sé búið að ræða það sérstak-
lega því ekki hafi verið farið yfir lög-
fræðilega þætti málsins. „Rekstrar-
aðilarnir hljóta að gera það sín megin
til að átta sig á því hvað þeir tapa
miklu fé þegar þeir stöðva rekstur-
inn.“
En kallar þetta á breyttar vinnu-
reglur hjá byggingaryfirvöldum?
„Slíkir úrskurðir skýra réttarstöð-
una. Í þessu tilfelli hefst upp úr því að
byggingaryfirvöldum er ljóst að það
sem þau töldu vera leyfilegt er það
ekki á þessum stað. Það ætti þá að
verða skýrara þegar næsta sambæri-
legt mál kemur fyrir. Þannig gefur
þetta ákveðið fordæmi.“
Rekstur
Kaupfélags-
ins verður
stöðvaður
Miðborg