Náttúrufræðingurinn - 1951, Side 3

Útgáfa náttúrufræðirita
Hjá fáum menningarþjóðum munu áhrifamenn um fjármál og
stjórnmál vera eins kærulausir um þjóðlegt framlag á sviði náttúru-
vísinda eins og hér á landi. Þetta á að nokkru leyti rætur sínar að
rekja til þess, að við höfum lengst af búið við frumstæða atvinnu-
hætti, rányrkju á landi og sjó. Af þeim siikum liafa náttúruvísindi
átt litlum stuðningi að fagna, enda er þekkingarskortur á náttúru
lands og sjávar atvinnuvegunum nú slíkur þrándur í götu, að fyrir-
sjáanlega verður að leggja ríka áherzlu á að bæta úr vanrækslusynd-
um fortíðarinnar og hygg ég að stjórnmálamönnum verði sú stað-
reynd æ ljósari eftir því sem atvinnuvegir okkar þroskast.
Síðustu árin hafa flest meginrit um náttúrufræði verið gefin út er-
lendis og oft fyrir frumkvæði erlendra manna. Okkar eigin útgáfu-
starfsemi hefur enn ekki komizt á verulegan rekspöl vegna fjárskorts.
Það liggur í augum uppi að þetta er óviðunandi ástand, sem krefst
bráðrar úrlausnar.
Útgáfustarfsemi okkar verður að vera tvíþætt að minnsta kosti.
Annars vegar verður að gefa út íleiri náttúrufræðirit á íslenzku og
efla starfsemi þessa tímarits að mun. Hins vegar verður að sameina
alla náttúrufræðinga um útgáfu vísindarits á erlendu máli. Er mjög
brýn nauðsyn á því að forystumenn náttúruvísindalegra stofnana
hefji samvinnu um útgáfu slíks rits, sem tvímælalaust mundi hljóta
stuðning allra starfandi náttúrufræðinga.
Það eru ekki eingöngu faglærðir náttúrufræðingar, sem nú stunda
rannsóknir af kappi. Þeim áhugamönum fer fjölgandi, sem aflað hafa
sér nauðsynlegrar undirstöðumenntunar til þess að verða að miklu
liði við dýra-, grasa- og jarðfræðilegar athuganir. Hefti það af Nátt-
úrufræðingnum, sem nú berst lesendum í Iiendur, er glöggt dæmi
þess, hve drjúgan skerf áhugamenn leggja nú af mörkum, og á ég þar
sérstaklega við greinar Kvískerjabræðra.
NáttúrufrœSingurinn, 3. h. 1951 7