Heima er bezt - 01.05.1965, Síða 34

HEIMA_______________
BEZT BÓKAH I LLAN
Loren Fessler: Kína. Reykjavík 1965. Almenna bókafé-
lagið.
Fá lönd eru fyrirferðarmeiri í heimsfréttunum en Kína, sem
ekki er furða um fjölmennasta og eitt víðlendasta ríki jarðarinn-
ar. Það er því ekki að ófyrirsynju, að út sé gefin bók, sem veitir
hlutlausa fræðslu um land og þjóð og sögu hennar. Ekki sízt er
þörf fræðslu um þá atburði, sem þar hafa gerzt síðustu áratugina
og ástandið i dag. Slík fræðsla er það eina, sem gerir oss kleift
að tilteknu marki, að skapa oss hugmyndir um, hvað þarna er
að gerast og gefur um leið forsendur til að unnt sé að kveða upp
dóma um þau atriði af einhverju viti. En þess er líka að minn-
ast, að atburðir nútímans verða ekki skildir nema í ljósi sögu
liðins tima. í bók þessari, sem er ein í flokknum Lönd og þjóðir,
og með sama sniði og hinar fyrri, gefur höfundur greinargóða
landslýsingu þótt hún óneitanlega hefði mátt vera fyllri um svo
stórt og fjölbreytt land. Saga þjóðarinnar er rakin i stórum drátt-
um, bæði hin pólitíska og menningarsagan. En að vonum dvelst
höfundi lengst við atburði nútímans og aðdraganda kommúnista-
byltingarinnar. Ekki verður sagt, að lestur bókarinnar auki les-
andanum samúð með Kínaveldi nútímans eða forystumönnum
þess, til þess er myndin af þvi svartnætti, sem kommúnisminn
leiðir yfir þjóðirnar of ljós. En að vissu leyti er gott að fá þann
fróðleik upp í hendurnar. Og enginn dregur í efa að lestri lokn-
um, hvílík hætta frelsi og vestrænni menningu er búin af Kína-
veldi, og hve vanhugsað það sé, að vanmeta mátt þess, og láta sig
framsókn þess engu skipta. Um vilja Kinverja til árása og yfir-
drottnunar getur enginn efast. Að öllu samtöldu er þetta þörf
, bók og fróðleg, þótt ekki sé hún jafn skemmtileg aflestrar og
sumar fyrri bækur í safni þessu. Þýðandi er Sigurður A. Magnús-
son.
Indriði G. Þorsteinsson: Mannþing. Reykjavík 1965. Al-
menna bókafélagið.
Höfundur hefir hlotið mikið hrós fyrir sögur sínar, sem áður
hafa komið á prent. Enda er hann gæddur góðri frásagnargáfu,
hefir auga fyrir lífinu umhverfis sig, og kann að slá á strengi
samtíðarinnar. Verða því sögur hans góður skemmtilestur mörgu
fólki, og ekki er hætta á að mönnum leiðist við lestur þessara
smásagna. Þær eru flestar vel gerðar, og bregða upp svipmynd-
um hins daglega lífs, en naumast verða þær lesandanum minnis-
stæðar að loknum lestri. Einhver bezta sagan þykir mér Dagsönn
við ána. Hún er skrifuð af hlýju og innlifun og auk þess að lýsa
önn dagsins er hún dag-sönn.
Jóhann Hjálmarsson: Mig hefir dreymt þetta áður.
Reykjavík 1965. Almenna bókafélagið og Bókaverzlun
Sigfúsar Eymundssonar.
Jóhann Hjálmarsson er eitt þeirra ungu skálda, sem vill fara
nýjar leiðir og kasta burtu viðjum rimsins og yrkja ljóð í lausu
máli. í kveri þessu eru víða vel sagðar setningar, og mörg „Ijóð-
anna“ skapa stemningu, án þess þó að þau flytji nokkurn nýjan
boðskap. Lesandinn blaðar gegnum bókina síðu eftir síðu og segir
við sjálfan sig að hitt og annað sé fallega sagt, en fátt loðir í
minningunni að loknum lestri. Ég býst varla við, þótt höfundur
hefði fylgt hinni fornu Ijóðhefð, hefðu áhrifin orðið mikið með
öðrum hætti. En þó er víst, að ýmsar hendingar og jafnvel heilar
vísur hefðu loðað i minninu. Og það er atriði, sem hin ungu
skáld ættu að taka til athugunar, að þau dæma sig sjálf úr sner-
ingu við Iesandann með þessu rímlausa fálmi sínu. Um suma
þeirra sakar það að visu ekki, en svo eru aðrir, eins og Jóhann
Hjálmarsson, sem vissulega hafa margt að segja, og geta sagt það
svo vel, að það er miður farið, að orð hans falli dauð til jarðar
vegna hins óaðlaðandi listforms, sem hann hefur valið sér.
St. Std.
DAVÍÐSHÚS
Eftirtaldar gjafir til húss Davíðs frá Fagraskógi hafa
borizt til Heima er bezt:
Þórunn Þórólfsdóttir, Vöðlum, Helgustaðahreppi kr. 100,00
Guðrún Björg Ólafsdóttir, Miðhúsaseli, Fellum — 100,00
Guðrún Jónsdóttir, Knerri, Breiðuvík ............ — 400,00
Sigrún B. Knaran, Knerri, Breiðuvík.............. — 100,00
Friðgeir Ægir Knaran, Knerri, Breiðuvík......... — 100,00
Sólveig Ingvarsdóttir, Ytri-Tungu, Snæf...........— 100,00
Georg J. Ásmundsson, Miðhúsum, Snæf...............— 100,00
Olgeir Þorsteinsson, Hamraendum, Snæf.............— 100,00
Ingjaldur Indriðason, Stóra-Kambi, Snæf...........— 100,00
Sigríður O. Jónsdóttir, Húsanesi, Snæf............— 100,00
Pétur Pétursson, Malarrifi, Snæf..................— 100,00
Jóna Jónsdóttir, Skjaldartröð, Snæf...............— 100,00
Kristinn Kristjánsson, Bárðarbúð, Snæf............— 100,00
Ögmundur Pétursson, Gíslabæ, Snæf.................— 100,00
Kristín Kristjánsdóttir, Ökrum, Snæf..............— 100,00
Finnbogi G. Lárusson, Laugarbrekku, Snæf........— 100,00
Stella Knaran, Knerri, Snæf.......................— 100,00
Marteinn Knaran, Knerri, Snæf.................... — 100,00
Guðbjartur Knaran, Knerri, Snæf...................— 100,00
Kolbrún Jónsdóttir, Presthúsabraut 27, Akranesi — 100,00
Óskar Jónatansson, Rauðalæk 21, Reykjavík .... — 1000,00
Söfnunamefndin flytur öllum þessum gefendum al-
úðarþakkir, og mundi þykja sérlega vænt um, ef konur
og karlar, sem víðast um landið, vildu gerast styrktar-
menn Davíðs með því að taka að sér söfnunarlista í
sínu byggðarlagi. En söfnunarlista er hægt að fá hjá
Heima er bezt.
F. h. söfnunarnefndar
Sigurður O. Björnsson.
194 Heima er bezt