Litli Bergþór - 01.04.2009, Page 3
Ritstjórnargrein
Það er kreppa í Iandinu á því leikur því miður enginn vafi. Hvernig hún bar að og hverjir eiga að bera
ábyrgð á henni eru daglegt umræðuefni. Ekki fæst almennilegur botn í umræðuna né heldur er almenn
samstaða um orsakir kreppunnar. Svokallaðir fjárglæframenn og útrásarvíkingar eru þó taldir aðalmenn
í kreppunni hérlendis þó hún sé líka alþjóðleg. Hver er þá lærdómurinn af þessu? Gróðafíkn og brask
geta komið heilli þjóð í gjaldþrot. Þessi illu öfl fengu að spila frítt vegna almennrar velþóknunar sem
við öll eigum sök á. Við öll nutum góðæris og settum engin spurningamerki við ofurlaun og augljóst
sukk fyrirmenna og fylgifiska þeirra. Hér gleymdust hin gömlu gildi um að verður er verkamaður launa
sinna. Hlutabréfabrask og skuldsetning til frekara brasks var tilskipun dagsins og því meir því betra.
Agaleysi, frekja og yfirgangur voru boðorð dagsins. Ohóf og tillitsleysi þótti sjálfsagt og kunna allir
sögur af slíku.
Hvernig mátti þetta verða. Erum við fbúar þessa lands hallir undir bull og vitleysu? Þurfum við
stjórn annarra til að hafa sæmilegt skikk á okkar málum? Var sjálfstæðisbaráttan
misskilningur og hafa erlendar þjóðir haldið okkur á floti hingað til?
Það skiptir ef til vill ekki öllu máli úr því sem komið er hvernig þetta ástand er til
komið. Mikilvægast er að draga lærdóm af þessu til að slíkt endurtaki sig ekki.
Heyrst hefur að kreppan komi ekki hingað í Tungurnar því góðærið hafi sneitt
hér hjá. Ekki er sú kenning líkleg og betra að búa sig undir komandi tíma eftir því
sem hægt er. Gott er að hafa í huga að verðmæti þau sem mölur og ryð fá grandað
eru og hafa ekki verið þau líMegustu til að veita lífsfyllingu og hamingju. Mannleg
samskipti og samvera á erfiðum tímum kostar lítið en gefur mikið. Útivera og
hreyfing sömuleiðis. Ungmennafélagshreyfingin hefur lifað tímana tvenna og farið
með þjóðinni í gegnum kreppu fyrr. Gildi félags sem hefur að markmiði að efla
félaga sína bæði andlega og líkamlega hlýtur að hafa góðan grunn til starfa við
núverandi aðstæður. Það ríður á að reyna að koma á móts við þarfir fólks á svæðinu
og bjóða upp á sem fjölbreytilegast starf. Stjórn sveitarfélagsins ætti að nýta sér
félög sem starfa hér til góðra hluta með því að styðja þau fjárhagslega og gera
þátttöku í þeim sem ódýrasta.
Sem betur fer hefur atvinnuleysi ekki komið mikið hingað enn, hvað sem verður, en þá fer nú fyrst að
kreppa að. Ferðaþjónustu er spáð sæmilegu gengi vegna falls krónunnar og gæti það komið okkur að
einhverju haldi hér um slóðir. Nú gildir sem fyrr að hollur er heima fenginn baggi og varla þarf að óttast
að Gullfoss og Geysir hverfi úr sveitinni og vonandi að vinsældir þeirra haldist áfram.
Stöndum saman á erfiðum tímum. Styðjum við þá sem eiga undir högg að sækja. Látum ekki buga
okkur með voli og víli.
Það eina sem er víst um kreppur er að þeim linnir það er bara spurningin hvenær, þangað til gerum við
öll okkar besta.
P.S.
|Vélaverkstœði Guðmundar og Lofts
® 486-8840 vgl@simnet.is
Kt: 580102-3010
Viðgerðir á búvélum og öðrum tækjum í landbúnaði. Bifvélaviðgerðir
Smurþjónusta Olíusíur í bíla og dráttarvélar - Framrúðuskipti - Smiðum háþrýstislöngur
3 Litli Bergþór