Bændablaðið - 12.12.2006, Síða 24

24 Þriðjudagur 12. desember 2006
Það var nóg að gera í Jólagarð-
inum í Eyjafjarðarsveit þegar
blaðamaður Bændablaðsins kíkti
þar inn um daginn í aðdraganda
jólanna. Benedikt Grétarsson og
fjölskylda hans hafa rekið versl-
unina í 10 ár og það er alltaf jafn
jólalegt hjá þeim.
Jólagarðurinn er draumaland
jólabarnsins og margir leggja leið
sína þangað reglulega. Jólatónlistin
tekur á móti manni og Benedikt seg-
ist ekkert fá leið á henni, sér finnist
hún voða mjúk og góð, hann fengi
miklu frekar leið á harðri rokktón-
list. Það fyrsta sem hann gerir er að
bjóða gestum sínum sneið af hangi-
kjötslæri sem hangir niður úr ein-
um loftbitanum. Kjötið er vel reykt
og alveg sælgæti í munni. Þetta er
sérvalið og reykt fyrir Jólagarðinn
í samstarfi við Kjarnafæði. Lærin
eru kölluð Húskarlahangikjöt og
pantanirnar byrja að streyma inn
strax um páska, þá er það stundum
skíðafólkið sem kemur norður sem
pantar svo tímalega.
Jólagarðurinn er opinn allan
ársins hring en þó er þar styttri
opnun frá áramótum og fram á sum-
ar. Benedikt segir að það séu hins
vegar flestar heimsóknir til þeirra
á sumrin, þá sé mikið af erlend-
um ferðamönnum og því opið frá
kl. 10-10. Fyrir jólin sé náttúrlega
líka mikið af gestum en það séu
aðallega Íslendingar. Það er aðeins
lokað fjóra daga á ári, aðfangadag,
jóladag, gamlársdag og nýársdag.
Hann segir að það sé auðvitað mjög
misjafnt hversu mikil verslunin
sé “Það verður að vera hugsjón á
bak við hlutina, það þýðir ekki að
telja allt í peningum. Á meðan þú
ert að gera eitthvað sem þér finnst
skemmtilegt gefur þú meira af þér
og gerir það betur”.
Það er ýmislegt sem þarf að gera
í svona verslun og þau eru alltaf að
leita að jólavörum. Íslenskt hand-
verk er þarna í mörgum hillum og
segir Benedikt að það séu á milli
50-100 aðilar með einhverjar vör-
ur þarna, það sé náttúrlega sveifla í
því eins og öðru
Jólagleðin kemur með fólkinu
Það hefur alltaf verið stefna Jóla-
garðsins að gestirnir njóti sín á eigin
forsendum, það er ekkert gert til að
skemmta fólki heldur kemur jóla-
gleðin með því sjálfu. Benedikt seg-
ir að það sé rosalega gaman að vera
í vinnu þar sem allir séu glaðir, fólk-
ið komi með stemminguna með sér
og andi jólanna komi fram í brosinu
sem það sendir hvert öðru. Hann
vill ekki hafa þetta í neinu ákveðnu
formi heldur að hver einstaklingur
geti fundið sjálfur það sem hann
sækist eftir.
Sérhannaðir íslenskir jólasvein-
ar eru sérkenni Jólagarðsins en þá
létu þau íslenskan hönnuð gera fyrir
sig. Margir safna öllum þrettán, að
ógleymdum Grýlu og Leppalúða og
er þetta mikið notað í gjafir. Einnig
er aðventukarfan vinsæl og selst upp
á hverju ári, í henni eru 24 gjafir fyrir
fullorðna fólkið til að opna á aðvent-
unni. Í pökkunum er þrennt, eitthvað
sem hægt er að borða, eitthvað til að
skreyta með og einnig einhverjir
hlutir sem notaðir eru. Þar gildir því
bara að panta nógu snemma til að ná
einni slíkri fyrir jólin.
Aðspurður hvort lítil börn sjái
hann sem jólasveininn svarar hann
kátur “ég er hann, ég er bara að
rembast við að vera maður núna og
það er svo miklu erfiðara. Honum
er ekki fyrirgefinn nokkur skapað-
ur hlutur á meðan jólasveinninn er
besti vinurinn, fær meira að segja
að kyssa mömmu” segir hann skelli-
hlæjandi og strýkur skeggið eins og
jólasveinum einum er lagið.
Þar sem Benedikt er einnig mat-
reiðslumaður fengum við hann til að
lauma með einni ljúffengri uppskrift
fyrir matgæðingana.
Höfðingjamedalíur Harðar bónda
1 stk. nautalund
2 stk bananar
6 msk aprikósusulta
2 dl nautasoð
svartur pipar
salt
basilikum
1 – 2 dl rjómi ef vill
Lundirnar skornar í medalíur,
steiktar á heitri pönnu og kryddaðar
að smekk Harðar. Medalíurnar tekn-
ar af pönnunni og bananarnir skorn-
ir að endilöngu og snöggbrúnaðri.
Hellið soðinu ásamt apríkósusultu
á pönnuna og kryddið eftir smekk.
Rjóma bætt út í ef vill. Látið sjóða
smá stund og hellt yfir nauta-medal-
íurnar.
Gott meðlæti er t.d. rösti-kartöfl-
ur og ferskt grænmeti.
Ég sá mömmu kyssa jólasvein
Jólagarðurinn í Eyjafjarðarsveit ber nafn með rentu.
Sýnishorn af jólaskrauti sem Jólagarðurinn hefur á boðstólum.
Fátt er skemmtilegra en að bjóða góðum
gestum í mat og prófa nýjar og spennandi
uppskriftir. Hér koma nokkrar slíkar ein-
faldar, fljótlegar en umfram allt bragðgóð-
ar þar sem mismunandi osttegundir gefa
góðan keim.
Forréttur
Mangó- og klettasalat
2 knippi klettasalat (rucola)
2 mangó-ávextir
½ agúrka
100 g kasjúhnetur
1 camembert
Vinaigrette-sósa:
2 msk. ferskt dill, fínt saxað
½ tsk. laukur, fínt saxaður
1 msk. Pernod
½ dl ólífuolía
½ tsk. Dijon-sinnep
2 msk. balsamedik
1 msk. sítrónusafi
salt
nýmalaður pipar
Aðferð:
Klettasalatið er rifið niður og mangóið og
agúrkan sneidd. Ristið kasjúhneturnar á
pönnu og brytjið ostinn í litla bita. Blandið
öllu hráefninu í vinaigrette-sósuna vel sam-
an og smakkið til með salti og pipar. Bland-
ið öllu saman og berið fram með vinaigrett-
es-sósu.
Aðalréttur
Lambavöðvi með kartöflu- og beikonosts-
fylltum sveppum
Fyrir 4
2 lambahryggsvöðvar (fillet)
8 stórir sveppir
2 bökunarkartöflur
3 msk. beikonsmurostur
50 g rifinn gratínostur
Aðferð:
Bakið kartöflurnar og skafið innihaldið úr
með skeið. Blandið beikonostinum saman
við. Saltið og piprið. Takið stilkinn innan úr
sveppunum og fyllið sveppina með kartöflu-
og ostablöndunni, stráið gratínostinum yfir
og bakið við 200°C í 10 mínútur eða þar til
osturinn er bráðnaður og sveppurinn er gull-
inbrúnn.
Steikið lambakjötið á pönnu í 6 mínút-
ur, 3 á hvorri hlið. Látið kjötið standa í 10
mínútur áður en það er skorið. Saltið og pipr-
ið. Skerið í sneiðar. Gott að bera fram með
béarnaise-sósu.
Eftirréttur
Bökuð appelsínu- og súkkulaðiostaterta
1 pakki hafrakex
2 msk. smjör
50 g rifið, dökkt súkkulaði
500 g rjómaostur
150 g sykur
6 tsk. sýrður rjómi
6 tsk. rjómi
3 egg
1 msk. vanilla
30 g rifið mjólkursúkkulaði
2 appelsínur, safi úr tveimur en börkur af
einni
Aðferð:
Myljið saman kexið, bætið út í dökku súkku-
laði og smjöri og þrýstið í botninn á teflon-
húðuðu smelluformi. Kælið.
Hrærið rjómaostinn þar til hann verður
léttur og loftkenndur. Blandið öllu öðru í
uppskriftinni saman við, byrjið á sykrinum
og endið á eggjunum. Bakið við 110°C í 80
mínútur.
Girnilegt og gómsætt – með ostaívafi
Benedikt Grétarsson sker sér hangikjötsbita. Ljósm GBJ.