Bændablaðið - 11.09.2007, Síða 12
Bændablaðið | Þriðjudagur 11. september 20071
Hrútaþukl, spuni
og þuklaraball
Síðustu helgina í ágúst stóð Sauðfjársetur á Ströndum fyrir heilmiklu
Strandamannamóti. Rúmlega hundrað manns mættu á þessa vel-
heppnuðu skemmtun sem leysir af hólmi bændahátíð er Sauðfjársetrið
endurvakti fyrir nokkrum árum.
Til skemmtunar voru sýndir tveir leikþættir sem fjölluðu hvor um sig
á kómískan hátt um viðburði í daglegu lífi sauðfjárbænda á Ströndum.
Í fyrri leikþættinum hittust tveir bændur í leitum og sögðu hvor öðrum
svæsnar ýkjusögur. Sá síðari fjallar um bændahjón sem reynt hafa árang-
urslaust að eignast barn og grípa til örþrifaráða með þeim afleiðingum að
sprenghlægilegur misskilningur verður á heimilinu. Veislustjóri og ræðu-
maður kvöldsins var sjónvarpsmaðurinn Gísli Einarsson og var gerður
góður rómur að gamanmálum hans.
Eftir veisluhlaðborð með grilluðu lambalæri í aðalrétt og rabarbara-
graut með rjóma í eftirrétt, var slegið upp þuklaraballi. Ísfirsk-reykvíska
bandið Halli og Þórunn lék fyrir dansi og þrátt fyrir nafngiftina fór dans-
leikurinn afar vel fram.
Á sunnudeginum var svo komið að því að þukla hrúta. Mikill mann-
fjöldi safnaðist í Sævang til að keppa í og fylgjast með meistaramóti í
hrútadómum. Keppnin gengur út á að gefa hrútum stig og sá sigrar sem
næst kemst stigagjöf sérstakrar dómnefndar. Að þessu sinni sigraði 10
ára Skagfirðingur, Sverrir Þór Sverrisson, í flokki óvanra þuklara, Alda
Ingadóttir, 12 ára, á Kaldrananesi varð í öðru sæti og Bjarnheiður Fossdal
á Melum í Árneshreppi í þriðja sæti. Kristján Albertsson á Melum í
Árneshreppi sigraði í flokki vanra hrútaþuklara, Guðbrandur Björnsson,
Smáhömrum í Tungusveit, lenti í öðru sæti og Ólafur Bragi Halldórsson,
Magnússkógum III, Dölum, í þriðja sæti. Þar með varð Kristján fyrstur til
að hreppa titilinn tvö ár í röð.
Á sama tíma fór fram í Sævangi landskeppni í spuna, undir yfirskrift-
inni Ull í fat. Fimm hópar hannyrðafólks kepptu um að búa til frumlega
lambhúshettu. Ullin var tekin af fénu á staðnum, spunnin og síðan prjón-
uð úr henni lambhúshetta. Dómnefnd valdi svo úr höfuðfötunum fimm
og hafði meðal annars til hliðsjónar tímatöku, samvinnu í hópnum, frum-
leika og notagildi hettunnar. Lið Ullarselsins á Hvanneyri sigraði í þessari
æsispennandi keppni.
Fjöldi gesta var í Sævangi þennan dag og var að sjálfsögðu boðið upp á
þjóðlegar veitingar, kjötsúpu og hlaðborð með hnallþórum.
Myndir og texti: kse
Þátttakendur í spunakeppninni á tröppum Sævangs.
Gísli Einarsson var veislustjóri og
mætti með forláta þæft ullarbindi.
Lið Ullarselsins á Hvanneyri kom sá og sigraði í spunakeppninni. Hér er
liðið með margt á prjónunum.
Fyrirsætur sýna afrakstur spuna-
keppninnar, fimm frumlegar lamb-
húshettur.
Sigurvegarar í flokki vanra hrútaþuklara: Ólafur Bragi Halldórsson á Magn-
ússkógum III í Dölum, Kristján Albertsson á Melum í Árneshreppi og Guð-
brandur Björnsson á Smáhömrum.
Sigurvegarar í flokki óvanra hrúta-
þuklara: Alda Ýr Ingadóttir á
Kaldrananesi, Sverrir Þór Sverrisson
á Stórhóli í Skagafirði og Bjarnheiður
Fossdal á Melum í Árneshreppi.
Áhorfendur skemmtu sér stórvel.
Fremst á myndinni er Guðbrandur
Sverrisson á Bassastöðum, en í
baksýn þeir Indriði Aðalsteinsson
á Skjaldfönn og Björn Pálsson á
Þorpum.
Jón Viðar Jónmundsson var for-
maður dómnefndar (ullarvettling-
urinn á myndinni gegndi þvi hlut-
verki að dempa vindhljóðin í hljóð-
nemanum).