Akureyri - 27.11.2014, Blaðsíða 2

2 44. tölublað 4. árgangur 27. nóvember 2014
„Himinlifandi“
„Við erum himinifandi yfir því að
þessu skuli loksins vera lokið.
Nú tekur við tími sátta og upp-
byggingar sem við hlökkum öll til
að taka þátt í á ný,“ sagði Hjörleifur
Örn Jónsson, skólastjóri Tónlist-
arskólans á Akureyri í fyrradag
þegar ljóst varð að sátt hefði náðst
í kjaradeilu tónlistarkennara.
Verkfalli hefur verið aflétt
og hófu tónlistarskólar störf á
þriðjudag eftir um fimm vikna
verkfall. Samninganefndir tón-
listarkennara og sveitarfélaganna
funduðu alla aðfararnótt þriðju-
dags en samningur verður borinn
undir félagsmenn. Niðurstaða
kosninga um samninginn liggur
fyrir 8. desember nk.
„Okkar helsta krafa var að fá
launaleiðréttingu. Þegar maður
kemur að samningsborðinu í þriðja
sinn og það hefur dregið í sundur
milli okkar og annarra kennara þá
er auðvitað á brattann að sækja.
Þetta tók því á, verkfall er erfitt.
En ég held að tónlistarkennarar
hafi minnt á sig og nú pössum við
að halda mönnum við efnið svo að
við gleymumst ekki og hrösum aft-
ur niður brekkuna,“ sagði Sigrún
Grendal, formaður Félags tónlist-
arkennara í samtali við mbl.is eftir
að sátt var náð. a
Landinn gerir vel við sig
Talsmenn hótela og veitingahúsa
sem bjóða upp á jólahlaðborð í ár
eru sammála um að mikil ásókn sé
í hlaðborðin og meiri en í nokkurn
tíma. Sumir skýra ásóknina með
innspýtingu ríkisstjórnarinnar til
eignaheimila. Að fólk virðist tilbú-
ið að eyða peningum sem það muni
fá samkvæmt loforði ríkisstjórnar-
innar um lækkun á höfuðstóli hús-
næðislána.
Icelandair Hotel er einn þeirra
staða sem býður upp á hlaðborð
fyrir jólin. Þar hefur aldrei verið
meira bókað en nú og stefnir í að
aukningin verði um 60% milli ára. Í
fyrra nýttu sér um 500 manns hlað-
borð fyrir jólin en nú hafa um 800
bókað að sögn Sigrúnar Bjarkar
Jakobsdóttur.
„Vinsældir veitingastaða stafa
fyrst og fremst af orðspori. Við
bjóðum upp á glæsilegt og afar
girnilegt hlaðborð þessi jólin, á
undan því vorum við með steik-
arhlaðborð sem mæltust mjög vel
fyrir. Ég er með svo mikla snilldar-
kokka að ég held að það sé það fyrst
og fremst sem skýri vinsældirnar
og svo hlýleg aðstaða á hótelinu.
Landinn gerir vel við sig á þessum
árstíma og það er góður siður hjá
starfsmannahópum eða vinahópum
að fara saman í jólahlaðborð,“ segir
Sigrún Björk Jakobsdóttir, hótel-
stýra á Icelandair hótel á Akureyri.
Á öðrum stöðum þar sem blaðið
leitaði upplýsinga báru veitinga-
menn sig einnig vel og sögðu stefna
í aukningu milli ára, mismikla þó. a
Bærinn hefur sigur
Kærunefnd útboðsmála hefur sýkn-
að Akureyrarbæ eftir málshöfðun
Atlantsolíu ehf. Atlantsolía kærði
útboð Akureyrarbæjar á eldsneyti
fyrir bæinn. Kröfur kæranda voru
að nefndin legði fyrir varnaraðila
að fella niður eftirfarandi skilmála
í útboðslýsingu: „Akureyrarbær
hefur ákveðið að taka einu tilboði
í allar diselolíur og bensín í þessu
útboði. Bjóða verður í allar tegund-
ir þessara vörutegunda“. Þá var þess
krafist að varnaraðila yrði gert að
bjóða innkaupin út að nýju. Krafist
var stöðvunar á samningsgerð.
Akureyrarbær taldi að sér hafi ver-
ið heimilt að gera þær kröfur í útboð-
inu sem samrýmdist þörfum bæjarins.
Hagræði sé að því að fá umræddar
vörur frá sama aðila. Reynslan hafi
sýnt að annað fyrirkomulag leiði af
sér óhagræði og rugling.
Í niðurstöðu kærunefndar segir:
„Það er meginregla við opinber inn-
kaup að kaupandi hafi forræði á því
að skilgreina lögmætar þarfir sínar
í útboðsgögnum. Af gögnum máls-
ins verður ekki ráðið að varnaraðili
hafi tengt saman ólíkar vörur eða
með öðrum ómálefnalegum hætti
hagað skilmálum útboðsins þannig
að þeir yrðu sérstaklega sniðnir
að einum eða fleiri þátttakendum.
Þannig er ekkert fram komið um að
skilyrðið um að fyrrgreindar vörur
verði keyptar af einum þátttakanda
brjóti gegn jafnræði fyrirtækja eða
öðrum reglum um opinber innkaup.
Hafa því ekki verið leiddar slíkar
líkur að broti gegn lögum um opin-
ber innkaup að fullnægt sé skilyrð-
um 1. mgr. 96. gr. laga um opinber
innkaup. Verður kröfu kæranda um
stöðvun útboðsins því hafnað.“
Ákvörðunarorð: „Hafnað er
kröfu kæranda, Atlantsolíu ehf.,
um stöðvun á útboði varnaraðila,
Akureyrarbæjar, á eldsneyti.“ a
Þessar myndir voru teknar sl. sunnudag við Voga á austurbökkum Ytri-Flóa í Mývatni. Árni Einarsson sem fer fyrir Náttúru-
rannsóknarstöðinni við Mývatn telur ekki útilokað að mengun frá eldgosinu hafi áhrif á lífríki vatnsins. Hann telur brýnt að
fylgjast vel með.
Brennisteinsbakteríur
lita botn Mývatns
Dæmi eru um að allstórir bleik-
hvítir flekkir sjáist nú á botni
Mývatns, einkum á grynningum.
Forstöðumaður Náttúrurannsókna-
stöðvarinnar við Mývatn telur
ástæðu til að fylgjast vel með. Á
mynd sem fylgir fréttinni sést þessi
einkennilegi litur. Myndin var tek-
in við austurbakka Mývatns í landi
Voga. Blaðið sendi Árna Einarrsyni,
forstöðumanni RAMÝ, eintak af
myndinni til skoðunar. Hann telur
að um brennisteinsbakteríur sé að
ræða líklega mest af ættkvíslinni
Thiocapsa.
„Þær mynda skán á botninum
þar sem jarðhitavatn kemur upp, á
svæðinu frá ca. Langavogi og út í
Helgavog. Þær ná aldrei mjög langt
út frá vatnsbakkanum fremur en
jarðhitinn. Hingað til hafa bakter-
íurnar myndað litla flekki (nokkra
fermetra) hér og þar en það eru vís-
bendingar um að útbreiðsla þeirra
hafi aukist á seinni árum, t.d. í
Helgavogi,“ segir Árni.
Hann segir að myndin sýni
óvenjulega stórt svæði miðað við
það sem hann hafi áður séð. „Í
Helgavogi eru bakteríurnar farn-
ar að mynda fagurbleikar skellur
og stundum blöðrur á botninum.
Þetta er þróun sem ástæða er til að
fylgjast með. Ég vil ekki útiloka að
brennisteinsmengun frá gosinu hafi
áhrif, en það er ókannað mál sem
stendur, breytingin var hafin löngu
fyrir gos. Það er þarna hvítur litur
líka, en það er erfitt að meta hvort
það eru bakteríur eða kísill,“ segir
Árni. -BÞ