Víkurfréttir - 05.01.2012, Blaðsíða 15

15VÍKURFRÉTTIR • FIMMTUdagUrInn 5. janúar 2012
Nú þegar jólin eru að renna sitt skeið styttist í að þorrinn banki á dyrnar með allri sinni þjóðlegu dýrð
og dýrslegu veigum. Keflvíkingar þjófstarta þorranum
þetta árið laugardaginn 14. janúar með glæsilegu
þorrablóti sem haldið verður í íþróttahúsi Keflavíkur við
Sunnubraut. Mörgum kann að þykja þorrablótið heldur
snemma á ferðinni en í fyrri tíð, eða fyrir árið 1700, þegar
notast var við júlískt tímatal kennt við Júlíus Caesar,
hófst þorrinn einmitt í kringum 9. til 15. janúar. Má því
segja að Keflvíkingar séu að hefja gamla tímann upp um
nokkrar hæðir þetta árið. Á boðstólum verður ljúffengur
og vandaður þjóðlegur matur og drykkir ásamt glæsilegri
dagskrá. Gikkirnir þurfa þó engu að kvíða því þeir sem
ekki þora að leggja hinn þjóðlega þorramat sér til munns
eiga kost á því að fá sér „hefðbundnari“ rétti og geta því
mætt og skemmt sér með hinum.
Knattspyrnu- og körfuknattleiksdeildir félagsins standa
sameiginlega að þorrablótinu í ár en áætlað er að um
árlegan viðburð verði að ræða. Leikmenn beggja deilda
munu fjölmenna á þorrablótið og fullvissa markamaskínan
Guðmundur Steinarsson og stórskyttan Magnús Þór
Gunnarsson alla Keflvíkinga um að kvöldið verði hin mesta
skemmtun. „Það var mikið stuð í fyrra á þorrablótinu hjá
körfunni og býst ég við enn meiri skemmtun í ár. Ég ætla
bara að vona að sem flestir sjái sér fært að mæta til að
skemmta sér og borða frábæran mat“, segir Magnús Þór.
„Þegar stuðningsmenn fótboltans og körfuboltans koma
saman er alltaf fjör“, segir Guðmundur sem kveðst þó sjálfur
borða takmarkað af þorramat. „Það er eitt og annað sem
maður setur ofan í sig af þessu. Það er þó fínt að þetta sé
bara einu sinni á ári“, segir Guðmundur. Magnús Þór er
ekki á sama máli og kveðst aðspurður mikill aðdáandi
þorrans. „Auðvitað borða ég þorramat. Ég var alinn upp
við að borða þorramat og afi kom mér t.d. upp á lagið við
að borða hákarl og þá kom mamma mér upp á lagið við
að borða súra hrútspunga. Ég á erfitt með að gera upp á
milli einstakra rétta en ætli mér finnist ekki hrútspungarnir
bestir“. Aðspurður kveðst Magnús Þór vita að Guðmundur
Steinarsson sé rosalegur gikkur en hann ætti þó langt í land
með að vera jafn mikill gikkur og frændi sinn og samherji
Hafliði Már Brynjarsson. „Hann étur bara pizzu eins og hinir
ungu pungarnir“. Guðmundur hefur talsverða trú á því að
ungu leikmennirnir í fótboltaliðinu taki vel til matarins um
kvöldið og segist hann hafa ofurtrú á Ásgrími Rúnarssyni
enda líti hann út fyrir að vera vel uppalinn piltur. „Öðru
máli gegnir hins vegar um Magnús Þór Magnússon, betur
þekktan sem Magga Magg eða Maggi Gauju Magg enda
er það yfir höfuð kraftaverk að hann borði yfir höfuð svo
mikill gikkur er drengurinn“. Magnús Þór var spurður að
því hvort erlendu leikmennirnir í körfunni myndu mæta
og svaraði hann því játandi og kvað þá þegar orðna mjög
spennta. „Við höfum verið að segja þeim að það sé skylda
að smakka allt og þeir þykjast tilbúnir í það. Charles Parker
er reyndar búinn að vera spenntur yfir þorramatnum alveg
frá því að hann kom en hann hafði lesið sér til um þennan
þjóðlega mat áður en hann kom og hefur t.d. spurt mikið
út í það hvort menn borði virkilega andlitið af lömbunum“.
Þeir Magnús og Guðmundur voru að lokum spurðir að
því hvort leikmenn körfunnar eða fótboltans myndu taka
betur til matarins á þorrablótinu og var hart skotið í báðar
áttir. Guðmundur kvaðst handviss að þar hefðu leikmenn
fótboltans vinninginn. „Ég held að það sé ekki spurning að
við munum borða meira af þorramat en körfuboltastrákarnir,
nema það verði þorrasnakk á boðstólum, þá gæti Maggi
Gunn bjargað andliti körfunnar“. Magnús Þór var hins vegar
á allt öðru máli og skaut hart til baka; „Ég er nú ansi hræddur
um að karfan vinni þetta eins og alltaf þegar þessi tvö lið
mætast. Ætli þeir séu ekki allir eins og Gummi Steinars en
hann er mesti gikkur sem ég hef kynnst á ævinni. Við höfum
verið saman í allnokkrum matarboðum og það er hreinlega
fagnað í þeim boðum ef Gummi borðar matinn sinn. Bara af
þeirri ástæðu skil ég ekki hvernig maðurinn getur alltaf verið
í svona lélegu formi“.
Eins og áður hefur verið komið inn á verður dagskráin öll hin
glæsilegasta og eru hún að öllu leyti úr heimabyggð. Veislustjóri
kvöldsins verður sjentilmennið og fyrrverandi blaðamaður
Víkurfrétta Jón Björn Ólafsson. Hljómsveitin Eldar mun taka
fáein lög en hljómsveitina skipa m.a. Keflvíkingarnir Valdimar
Guðmundsson og Björgvín Ívar Baldursson. Gestum verður
boðið í sjóðandi heita U2 messu þar sem kór Keflavíkurkirkju
mun syngja lög eftir hljómsveitina U2. Stjórnandi messunnar
er Arnór Vilbergsson, organisti Keflavíkurkirkju. Þá verður
fluttur sérstakur Keflavíkurannáll þar sem stiklað verður
á stóru í bæjar- og íþróttalífi Keflavíkur árið 2011 með
kómískum hætti. Kvöldinu verður svo skotið upp með ekta
„Bergás“ 80´s balli að formlegri dagskrá lokinni og verður
það enginn annar en sjálfur Alli „diskó“ sem mun sjá um að
þeyta skífum fram á nótt.
Miðasala er þegar hafin og hefur gengið vel. Ljóst er að
miðaverð er með því ódýrara sem gerist, eða aðeins 5900 kr.
Er það mál manna að hér sé um gjöf en ekki gjald að ræða. Er
þeim sem ekki hafa tryggt sér miða bent á að hafa samband
við Einar Haraldsson, framkvæmdastjóra Keflavíkur, í síma
897-5204 eða Sævar Sævarsson í síma 869-1926.
Gummi Steinars er gikkur en Magnús Þór elskar pungana
›› Keflvíkingar þjófstarta þorranum með risa þorrablóti 14. jan.:
Margrét Snorradóttir sem sigraði
unglingaflokkinn á Landsmótinu
með eftirminnilegum hætti.
Varð hún einnig Íslandsmeistari
í fimmgangi unglinga og
Suðurlandsmeistari í fjór-
og fimmgangi unglinga.
Hestamannafélagið stóð svo
fyrir Íslandsmóti yngri flokka í
hestaíþróttum á sama tíma og
leikið var golf í Leirunni og því
var nóg um að vera í íþróttalífinu
á Suðurnesjum í júlí. Yfir 430
keppendur mættu til leiks en
Máni hélt síðast Íslandsmót
yngri flokka árið 2005.
Árið 2011 hefur verið viðburðaríkt
fyrir Taekwondodeild Keflavíkur.
En félagið er sterkast allra
félaga á landinu í þessari
upprennandi íþrótt. Alls
komu 18 Íslandsmeistaratitlar
í hús hjá deildinni.
Grindvíkingurinn Björn Lúkas
Haraldsson varð tvöfaldur
Íslandsmeistari unglinga í
júdó. Á þessu keppnistímabili
hefur hann unnið öll þau mót
sem farið hafa fram í hans
aldursflokki. Björn Lúkas er einnig
tvöfaldur Norðurlandameistari
unglinga í júdó og á tvo
Íslandsmeistaratitla í brazilian
jiu-jitsu. Sannarlega magnaður
íþróttamaður þar á ferðinni.
Júdóíþróttin hefur vaknað til
lífsins í Njarðvík en stofnuð
var júdódeild UMFN árið 2010
sem kom sterk inn árið 2011.
Liðsmenn deildarinnar eru nú
um 100 talsins og hafa strax
komið í hús Íslandsmeistaratitlar
í Brazilian Jui Jitsu.
Heiðrún Rós Þórðardóttir sem
hefur lengi verið ein öflugasta
fimleikastúlka Suðurnesja náði
frábærum árangri á árinu. Í
byrjun árs hélt hún í danska
fimleikaskólann Ollerup.
Með skólaliðinu varð svo
hún bæði Danmerkur- og
Norðurlandameistari í Mix
flokki, sem er blandað lið kynja.
Erla Dögg Haraldsdóttir
sundmaður ÍRB átti sérlega
gott ár. Hún keppti með ÍRB
á Íslandsmeistaramótinu í 50
metra laug þar sem hún vann
þrjá Íslandsmeistaratitla og setti
tvö Íslandsmet. Hún sigraði 50
metra bringusund á glæsilegu
Íslandsmeti, 31,96 og var það þá
sjöundi besti tíminn í heiminum.
Hún bætti þriggja ára gamalt
Íslandsmet sem hún átti sjálf og
sigraði í 200 metra fjórsundi.
Að lokum vann hún síðan 200
metra flugsund á góðum tíma.
Með þessum góða árangri
á ÍM 50 náði Erla Dögg
lágmörkum fyrir HM í Kína.
Í ágúst keppti Erla Dögg síðan
í 50 m bringusundi á HM þar
sem hún lauk keppni í 17. sæti.
Hún var einu sæti og 10/100 frá
því að komast í milliriðla. Erla
Dögg var með bestan árangur
íslenskra sundmanna á mótinu.
Erla keppti einnig fyrir Íslands
hönd á Smáþjóðaleikunum í
Liechtenstein. Þar vann hún
silfur í 100 og 200 m bringusundi
og 200 m fjórsundi.
Sundmenn ÍRB fögnuðu sigri á
Aldusflokkameistaramóti Íslands
sem fram fór í lok júní. En þar
er keppt í aldursflokkum 12-
18 ára í hinum ýmsu greinum.
Ólöf Edda Eðvarsdóttir varð
stigahæsta stúlkan 13-14 ára en
fjölmargir efnilegir sundmenn
eru nú innan félagsins sem stefnir
hátt á næstu árum með öflugan
erlendan þjálfara í brúnni.
Heilt yfir var íþróttaárið 2011
nokkuð gott hér á Suðurnesjum
og ýmsir ungir íþróttamenn
létu að sér kveða. Njarðvíkingar
áttu sigursælan drengjaflokk í
körfunni sem varð Íslands- og
Bikarmeistarar á tímabilinu
2010-2011 og fóru í gegnum
allt tímabilið án þess að tapa
leik. Þeir strákar urðu svo líka
Íslandsmeistarar í Unglingaflokki
og eru þessa stundina að stíga
sín fyrstu skref með með
meistaraflokki félagsins. Það
sama er hægt að segja um ungu
strákana í fótboltanum í Keflavík.
Þeir eru margir hverjir að leika
stór hlutverk í meistaraflokki
liðsins og urðu einnig
bikarmeistarar í 2. flokki í sumar.
Sundlið ÍRB er ákaflega ungt
og gríðarlegur efniviður þar
innanborðs. Ekki mun líða á
löngu uns afreksmaður kemur
þaðan fram á sjónarsviðið. Yngri
íþróttir eins og Teakwondo eru
í mikilli sókn og margir af bestu
bardagaíþróttamönnum landsins
koma frá Suðurnesjum. Þríþraut
er íþrótt sem fer ört vaxandi
á svæðinu en Njarðvíkingar
stofnuðu þríþrautardeild á árinu
sem er í miklum vexti. Fjöldi
unglingalandsliðsfólks kemur
af svæðinu og því er ekki að
kvíða framtíðinni sem virðist
afar björt um þessar mundir.
Innandyra æfingaaðstaða Golfklúbbs Suðurnesja í HF húsinu að Hafnargötu 2 opnar mánudaginn 9. janúar næstkomandi. Þar
geta meðlimir Golfklúbbs Suðurnesja nýtt sér þessa inniaðstöðu án
endurgjalds, til að slá í net og til að æfa pútt á góðum 18 holu púttvelli.
Auk þess er stefnt að því að taka í notkun golfhermi, sem GS félagar
geta fengið aðgang að gegn sanngjörnu gjaldi.
Púttmótaröð GS hefst einnig 9. janúar.
Púttmótaröð GS 2012 hefst mánudaginn 9. janúar nk. kl. 19:00. Mótin eru
aðeins fyrir félagsmenn GS
Veitt verða verðlaun fyrir efstu sætin í hvorum flokki í hverju móti ásamt
verðlaunum fyrir besta skor hjá 14 ára og yngri unglingum. Verðlaun verða
einnig fyrir heildarkeppni sem spilað verður fram að páskum. Mótsgjald er
kr. 500 en kr. 300 fyrir börn og unglinga. Mótin eru til styrktar barna- og
unglingastarfi klúbbsins.
Pálína María Gunnlaugsdóttir,
körfuknattleikskona
úr Keflavík var kjörin
Íþróttamaður ársins í
Reykjanesbæ á gamlársdag
en athöfnin fór fram í
Íþróttamiðstöð Njarðvíkur.
Pálína sem einnig er
Íþróttamaður Keflavíkur
náði einstökum árangri á
árinu 2011 en hún var besti
maður meistaraflokks kvenna
sem var bæði Íslands- og
bikarmeistari í vor.
Pálína sagði í samtali
við Víkurfréttir að það
eftirminnilegasta við árið 2011
væru bikararnir tveir sem
áskotnuðust Keflvíkingum,
bæði fyrir Íslandsmót og
bikarkeppni. Henni er minnisstæð rimman við erkifjendurna úr
Njarðvík í úrslitunum um Íslandsmeistaratitilinn. Hún segist samt ekki
alveg skilja þann ríg milli liðanna sem hefur verið í gangi í áratugi.
Hún hefur lagt hart að sér til að ná sem bestum árangri
en hún vill þakka þjálfurum og stjórn Keflvíkinga sem
hafa hjálpað henni mikið og stutt við bakið á henni.
Þegar Pálína er spurð um fyrirætlanir sínar á árinu 2012 þá segir hún
að alltaf megi setja sér ný og hærri markmið. „Maður vill alltaf bæta sig
og þó svo að ég hafi núna unnið nánast allt sem í boði er nema kannski
prúðasta leikmann hjá KKÍ þá stefni ég á að bæta mig enn frekar í ár,“
sagði Pálína Gunnlaugsdóttir Íþróttamaður Reykjanesbæjar 2011.
Golfarar geta tekið gleði sína á ný
Pálína íþróttamaður
Reykjanesbæjar 2011