Frjáls verslun - 01.02.2008, Side 45

F R J Á L S V E R S L U N • 2 . T B L . 2 0 0 8 45
Árni Harðarson
„Hjá Actavis meðhöndlaði ég
einnig peninga annarra og
maður reynir að gera slíkt af
ábyrgð. Stærstu ákvarðanir eru
teknar í samráði við Róbert
en þetta varðar náttúrulega
líka persónulega fjármuni
stjórnendanna,“ segir Árni
Harðarson, framkvæmdastjóri
Salt Investment.
Eru ekki fjölmörg kauptækifæri á markaðinum í dag?
„Sjálfsagt er það svo en það er líka mikill ótti í mönnum þar sem
alltaf hefur verið haldið að nú væri botninum náð og síðan opnast
eitthvert hyldýpi sem enginn þorir að veðja á. Ég er þó ekki í vafa
um að á næstu mánuðum muni bjóðast áhugaverð kauptækifæri en á
móti kemur spurningin um hver geti fjármagnað þau og þetta fer ekki
almennilega af stað fyrr en það fjármagn verður til staðar.
Þetta sýnist mér vera stærsta vandamálið á markaðinum núna,
þeir sem eiga fjármagn eru ekki tilbúnir að lána eða fjárfesta heldur
sitja og bíða. Það er það sama uppi á teningnum hjá okkur eins og
fleirum, menn eru að meta stöðuna og peningarnir eru dýrir í dag.
Það þarf að bjóðast reglulega gott tækifæri til að menn láti vaða
enda fylgja flestir ákveðinni stefnu varðandi arðsemi og á meðan
fjármagnið er svo dýrt sem raunin er þá verða verkefnin að vera enn
betri. Nú þurfa menn fyrst og fremst að hlúa að þeim fjárfestingum
sem þegar eru tryggðar í stað þess að hlaupa til og kaupa allt sem er falt
þó mikið sé í boði. Það verður að stíga varlega til jarðar,“ segir Árni.
Hræðsluáróður hefur áhrif
Árni segir menn nú vona að botninum sé náð og þeir geti á nýjan
leik farið að vinna á eðlilegum hraða og forsendum. Þá segir hann
mikilvægt að hafa í huga að í mörgum tilvikum sé neikvæð umræða
jafnvel orðin um of og stundum ekki nægilega ígrunduð.
„Persónulega finnst mér að í ákveðnum prentmiðlum sé áhersla á
neikvæðnina alveg ótrúleg. Menn mega ekki gleyma því að svartmáluð
mynd og hræðsluáróður geta haft þau áhrif að aðilar sem væru annars
að halda markaðinum gangandi halda líka að sér höndum og fyrir
vikið verður ástandið enn verra því það þarf náttúrulega veltu til að
eðlileg verðmyndun haldist.
Markaðurinn leitar aldrei jafnvægis á eigin forsendum ef
mennirnir sem standa að honum eru lamaðir af ótta. Um leið er ég
ekki að segja að fegra eigi hlutina. En það er allt í lagi að hugsa sig
um og kanna málið ítarlega áður en sagt er að hlutir séu alslæmir
eða að fyrirtæki séu við það að fara á hausinn. Eitt sem þarf að hafa í
huga er að samkeppnin er grimm og það geta verið samkeppnisaðilar
að baki umræðu eða jafnvel greiningum á stöðum fyrirtækja. Það
eru til mörg dæmi um það að fyrirtæki hafi verið nánast töluð í
gjaldþrot og það af svokölluðum viðurkenndum markaðsaðilum,“
segir Árni að lokum.