Skinfaxi - 01.11.2013, Blaðsíða 8

8 SKINFAXI – tímarit Ungmennafélags Íslands
„Það mun margt breytast í nýju áætlun-
inni. Flest þau verkefni, sem við höfum
verið að styrkja, eins og ungmennaskipti
og sjálfboðaliðaverkefni, verða þó meira
eða minna óbreytt. Síðan bætast við nýir
flokkar sem við eigum eftir að læra á en
gefa mikla möguleika. Vonandi nýtast þeir
styrkþegum okkar eins og ætlast er til en
tíma tekur að þróa slík verkefni. Þessi verk-
efni kallast Stefnumiðuð samstarfsverk-
efni og er gert ráð fyrir að þau séu til
tveggja til þriggja ára. Það verður spenn-
andi að sjá hvernig þetta kemur út. Mögu-
leikunum fjölgar líka og gert er ráð fyrir að
hægt verði meira en áður að veita fjár-
magni í kannanir af ýmsum toga. Slíkt hef-
ur vantað í starfið hér á landi. Þrátt fyrir að
kannanir hafi verið gerðar í mörg ár meðal
ungs fólks í grunn- og framhaldsskólum
hefur lítið verið um að þær hafi t.d. beinst
að því að meta árangur í æskulýðsstarfi.
Víða í samstarfslöndum okkar er miklu
meira unnið út frá könnunum og starfið
byggt á niðurstöðum þeirra,“ sagði Anna
R. Möller, forstöðumaður Landsskrifstofu
Evrópu unga fólksins, EUF, sem er íslenska
heitið á núverandi ungmennaáætlun
Evrópusambandsins, sem á ensku heitir
Youth in Action. Evrópa unga fólksins hef-
ur verið samstarfsverkefni milli Evrópu-
sambandsins, mennta- og menningar-
málaráðuneytisins og Ungmennafélags
Íslands.
Anna sagði að örlítið minna fjármagn
fáist fyrir árið 2014 miðað við árið sem er
að líða en síðan muni fjármagnið vaxa ört
til 2020. Útlitið væri bjart
og spennandi að
fylgjast með
hvernig þróun-
in yrði. Aðspurð
um fleiri breyt-
ingar sagði Anna að frá
og með ársbyrjun 2014 yrði ein áætlun
sem heitir Erasmus+ sem mun veita styrki
til menntunar, æskulýðsstarfs og íþrótta
en skrifstofurnar verða tvær, menntahlut-
inn verður hjá Rannís og æskulýðshlutinn
áfram hjá UMFÍ eins og verið hefur síð-
ustu sjö árin. Það eru ýmsir þættir sem
skrifstofurnar þurfa að hafa náið samstarf
um.
Ný íþróttaáætlun
„Það verður sameiginleg heimasíða
og ýmsar áætlanir sem við þurfum vinna
sameiginlega og senda frá okkur. Þetta
verður ögrun og skemmtilegt verkefni að
fást við,“ eins og Anna komst að orði.
„Í nýrri áætlun kemur fram hin svokall-
aða íþróttaáætlun. Þar opnast ýmsir mögu-
leikar sem kannski fara hægt af stað í byrj-
un en þetta á að gefa íþróttahreyfingunni
ákveðin tækifæri til að styrkja það sem við
höfum ekki getað sinnt fram að þessu eins
og keppnisferðir, æfingabúðir og þvíum-
líkt. Það mun í raun byggjast á grasrótar-
starfinu en ekki afreksstarfinu,“ sagði Anna.
Anna R. Möller sagði að sannarlega væru
spennandi tímar fram undan. Hún sagði
margt nýtt koma með nýrri áætlun og
einnig væri margt óbreytt. Það megi vænta
mikilla breytingu hjá þeim sem að þessu
starfi en þau hefðu komið ný inn 2007 og
vissu þá kannski ekki alveg út í hvað þau
voru að fara. Anna sagði að núna, þegar
maður þekkti hlutina og hefði fylgst með
þróuninni, væri mikið tilhlökkunarefni að
takast á við komandi tíma.
Anna Möller, forstöðumaður Landsskrifstofu Evrópu unga fólksins:
Fram undan er fullt af tækifærum
með auknu fjármagni
„Fjármagnið mun
aukast hægt og bítandi
næstu ár þar til það nær
hámarki árið 2020“
Helga Dagný Árnadóttir,
verkefnastjóri Evrópu unga
fólksins, Anna R. Möller,
forstöðumaður Landsskrif-
stofu Evrópu unga fólksins,
og Ragnheiður Sigurðardótt-
ir, verkefnastjóri Æskulýðs-
vettvangsins.