Dagblaðið Vísir - DV - 31.01.2011, Blaðsíða 4

4 | Fréttir 31. janúar 2011 Mánudagur
Slakaðu á heima
• Stillanlegt Shiatsu herða- og baknudd
• Djúpslökun með infrarauðum hita
• Sjálfvirkt og stillanlegt nudd
Verið velkomin í verslun okkar
prófið og sannfærist!
Úrval nuddsæta
Verð frá 29.750 kr.
Opið virka daga kl. 9 -18
og á laugardögum kl. 11 - 16
Stórhöfða 25 • Sími 569 3100 • eirberg.is
Heildarskuldir eignarhaldsfélagsins
Knattspyrnuakademíu Íslands ehf.
námu 1.700 milljónum króna í árs-
lok 2009 og var eigið fé félagsins nei-
kvætt um 135 milljónir króna. Tap
hafði orðið á rekstrinum á árinu upp
á tæpar 100 milljónir króna og lá fyr-
ir að félagið myndi eiga í erfiðleikum
með að standa í skilum við helsta lán-
ardrottin sinn, Landsbanka Íslands.
Þetta er meðal þess sem kemur fram í
ársreikningi eignarhaldsfélagsins sem
skilað var til ársreikningaskrár í sept-
ember í fyrra.
Eigendur Knattspyrnuakademíunnar,
Arnór Guðjohnsen, sonur hans Eið-
ur Smári, Guðni Bergsson, Ásgeir Sig-
urvinsson og Logi Ólafsson, voru því
í erfiðri stöðu þegar þarna var komið
sögu.
Hrunið setti strik í reikninginn
Knattspyrnuakademía Íslands hafði
gert samstarfssamning við Kópa-
vogsbæ árið 2005 sem fólst í því að
akademían byggði íþróttaaðstöðu í
Vallakór í Kópavogi og leigði bænum
síðan afnot af henni. Meðal þess sem
gert var ráð fyrir að eigendur Knatt-
spyrnuakademíunnar myndu byggja
á svæðinu var íþróttahús, sundlaug,
fjölnota knattspyrnu- og sýningarhús
þar sem átti að vera keppnisaðstaða
fyrir knattspyrnu auk þriggja fótbolta-
valla utandyra. Bærinn ætlaði að leigja
íþróttaaðstöðuna til 25 ára samkvæmt
upprunalega samkomulaginu. For-
svarsmenn Kópavogsbæjar töldu að
hagstæðara væri fyrir bæinn að gera
slíkan samning við Knattspyrnuaka-
demíuna frekar en að byggja íþrótta-
mannvirkin sjálfir og eiga þau til fram-
tíðar.
Efnahagshrunið árið 2008 setti hins
vegar strik í reikninginn og eigend-
ur Knattspyrnuakademíunnar stóðu
frammi fyrir því að geta ekki staðið í
skilum við Landsbankann út af fjár-
festingunni og uppbyggingu á svæð-
inu. Viðskiptablaðið greindi svo frá
því í apríl í fyrra að Kópavogsbær þyrfti
að greiða 1.600 milljónir króna fyrir
íþróttaaðstöðuna í Vallakór þar sem
kreppti að hjá eigendum Knattspyrnu-
akademíunnar. Heildarskuldbinding-
ar bæjarins vegna íþróttamannvirkj-
anna fóru með þessu frá því að vera á
bilinu 700 til 800 milljónir króna upp í
á þriðja milljarð króna.
Áttu að greiða 630 milljónir í
fyrra
Skuldirnar sem voru inni í eignar-
haldsfélaginu í árslok 2009 voru því
nokkurn veginn jafnháar og kaup-
verðið sem Kópvogsbær þurfti að
reiða fram fyrir eignirnar, samkvæmt
því sem stendur í ársreikningn-
um. Kaupverðið sem Kópavogsbær
greiddi fyrir eignirnar mun því vænt-
anlega verða notað til að greiða nið-
ur skuldir eignarhaldsfélagsins við
Landsbankann. Ekki er hins vegar
hægt að fullyrða neitt um þetta þar
sem ársreikningur Knattspyrnuaka-
demíu Íslands fyrir árið 2010 liggur
ekki fyrir en ætla má að peningarnir
frá Kópavogsbæ verði notaðir til að
greiða niður skuld knattspyrnumann-
anna við Landsbankann.
Í ársreikningi Knattspyrnuaka-
demíunnar fyrir árið 2009 kemur fram
að félagið hefði átt að greiða tæplega
630 milljónir króna af þessum tæp-
lega 1.700 milljóna króna skuldum á
síðasta ári, 2010. Hugsanlegt er að for-
svarsmenn Knattspyrnuakademíunn-
ar hafi áttað sig á því að þeir gætu ekki
staðið í skilum með þessar afborganir í
fyrra og hafi þess vegna gert ráðstafan-
ir til að selja íþróttamannvirkin.
Viðræður hófust haustið 2009
Heimildir DV herma að forsvarsmenn
Knattspyrnuakademíunnar hafi kom-
ið að máli við forsvarsmenn Kópa-
vogsbæjar um haustið 2009 með það
fyrir augum að selja þeim íþróttaað-
stöðuna. Samningaferlið var tíma-
frekt, tók upp undir hálft ár, og var ekki
gengið endanlega frá viðskiptunum
fyrr en í mars í fyrra. Af þessu er ljóst að
forsvarsmenn Knattspyrnuakademí-
unnar höfðu verið meðvitaðir um það
í nokkuð langan tíma að þeir þyrftu að
losna út úr fjárfestingunni.
Kópavogsbær fjármagnaði kaupin
á íþróttamannvirkjunum með láni frá
fjármálafyrirtæki, líklega Landsbank-
anum. Bærinn fékk fremur hagstætt
lán – ein heimild DV segir það vera á
4,9 prósenta vöxtum – og keypti að-
stöðuna af eignarhaldsfélagi knatt-
spyrnumannanna. Strax eftir kaupin
byrjaði Kópavogsbær að nota aðstöð-
una og í dag nota skólar og íþróttafélög
í Kópavogi hana.
Hluthafarnir tapa væntanlega
Af ársreikningi félagsins er
einnig ljóst að miðað við
kaupverðið á íþrótta-
mannvirkjunum
munu þeir sjálfir tapa
einhverjum fjármun-
um. Þannig kem-
ur fram í reikningn-
um að félagið skuldi
hluthöfunum rúmar
275 milljónir króna.
Meðal þessara
skulda er um 130
milljóna króna
viðskipta-
krafa Eiðs Smára Guðjohnsen á hend-
ur akademíunni vegna láns upp á 700
þúsund evrur sem hann veitti félag-
inu á sínum tíma. Fjármunirnir höfðu
runnið í fasteignaverkefni Knatt-
spyrnuakademíunnar. Ekki er vitað
hvaðan afgangur lánanna kom.
Um 100 milljóna króna munur var
á heildarskuldum félagsins og þeim
1.600 milljónum króna sem það fékk
frá Kópavogsbæ fyrir íþróttamann-
virkin, auk þess sem gera verður ráð
fyrir því að meira hafi bæst við skuld-
ir félagsins, meðal annars ýmiss konar
kostnaður. Því má reikna með að hlut-
hafar félagsins þurfi að afskrifa kröfur
á hendur félaginu.
Eignir Eiðs ofmetnar
Samkvæmt heimildum DV reyndi
Eiður Smári að selja viðskiptakröf-
una árið 2009 en án árangurs: Enginn
vildi kaupa kröfuna. Ástæðan fyrir því
að Eiður vildi selja kröfuna var sú að
hann vantaði peninga til að grynnka
á um 1.200 milljóna króna skuldum
sínum við Kaupþing í Lúxemborg og
Glitni sem hann hafði stofnað til vegna
ýmissa fjárfestingarverkefna, líkt og
DV hefur greint frá. Ein af ástæðunum
fyrir því að erfiðlega gekk að selja við-
skiptakröfuna var sú að enginn lána-
samningur var gerður á milli Knatt-
spyrnuakademíunnar og Eiðs Smára
og ekkert veð var fyrir láninu frá hon-
um. Viðskiptakrafan við Knattspyrnu-
akademíuna var metin sem hluti af
750 milljóna króna eignum Eiðs
Smára sem koma áttu á móti á
1.200 milljóna króna skuldum.
Af ársreikningi Knatt-
spyrnuakademíunnar verður
því ekki annað séð en að eign-
ir Eiðs Smára hafi verið of-
metnar í skuldauppgjöri hans
við Kaupþing og Glitni og að
hann muni ekki endurheimta
alla þá fjármuni sem hann lánaði
til Knattspyrnuakademíunnar.
Eiður Smári, líkt og Kópa-
vogsbúar, kemur því
illa út úr þessum
viðskiptum
með Knatt-
spyrnu-
akademí-
una.
Komu 1.600 milljóna
skuld yfir á almenning
n Kópavogsbúar greiða niður skuldir Knattspyrnuakademíunnar við Landsbankann n Eigendur
akademíunnar áttu að borga 630 milljónir í fyrra n Félagið tapaði tæpum 100 milljónum 2009
n Eigið fé var neikvætt n Eiður Smári þarf væntanlega að afskrifa lán sem hann veitti félaginu. „Kaupverðið sem
Kópavogsbær
greiddi fyrir eignirnar mun
því væntanlega verða
notað til að greiða niður
skuldir eignarhaldsfélags-
ins við Landsbankann.
Ingi Freyr Vilhjálmsson
fréttastjóri skrifar ingi@dv.is
Skrifað undir Gunnar Birgisson, bæjarstjóri Kópavogs-
bæjar, sést hér skrifa undir samkomulagið við fjóra af fimm
aðstandendum Knattspyrnuakademíunnar árið 2005.
Fjárfestingin til almennings Eiður Smári
fjárfesti í Knattspyrnuakademíu Íslands
ásamt nokkrum öðrum þekktum knatt-
spyrnumönnum, meðal annars föður sínum.
Sú fjárfesting endaði á því að Kópavogsbær
keypti af þeim íþróttamannvirki í bænum.
Krónan eins og þriðji
bjór í þynnku
Dagur B. Eggertsson, oddviti Sam-
fylkingarinnar í Reykjavík og for-
maður borgarráðs, lá ekki á skoðun
sinni á gjaldeyrismálum á Facebook
á sunnudaginn. Dagur skrifaði: „Að
dásama krónuna sem bjargvætt eftir
hrun er einsog þegar örlaga alkó-
hólisti dásamar (þriðja) bjórinn í
þynnkunni (í afneitun á hlut hans í
ruglinu, þynnkunni og draslinu sem
einhver þarf að þrífa og ógreiddu
reikningunum sem einhver þarf að
borga).“ Síðar bætti Dagur B. því
við að þessi orð væru stolin og stíl-
færð „frá þeim eðalsnillingi Óttari
Proppé“, eins og hann komst að orði.
Ófært á
Norðurlandi
Ófært var yfir Öxnadalsheiði á
sunnudag vegna stórhríðar sem
þar geisaði. Í tilkynningu frá Vega-
gerðinni á sunnudag, kom fram að
á Norðurlandi hafi verið hálka og
stórhríð. Þrátt fyrir það voru flestar
aðrar leiðir greiðfærar, þó snjóþekja
hafi verið á Vatnsskarði og hálku-
blettir á Hálsum og Brekknaheiði.
Vegagerðin minnir vegfarendur
á að víða sé ekki mokstur eða önnur
þjónusta á vegum á kvöldin og nótt-
unni. Raunar séu sumir vegir ekki í
þjónustu nema fáa daga í viku. Nú
um hávetur er rétt að minna á að
upplýsingar um færð á vegum má
fá í síma 1777 og á vef Vegagerðar-
innar.
Krónan bjargaði
okkur
Ólafur Ragnar Grímsson, forseti Ís-
lands, sagði við bandarísku sjón-
varpsstöðina CNBC að viðreisn ís-
lenska efnahagslífsins sé krónunni að
þakka og þeirri staðreynd að íslensku
bankarnir voru látnir falla. Ólafur
Ragnar hefur verið viðstaddur al-
þjóðlega efnahagsráðstefnu í Davos í
Sviss. Forsetinn sagði Íslendinga hafa
nýtt sér krónuna sem sérstakan gjald-
miðil til þess að laga sig að breyttum
aðstæðum í kjölfar efnahagshruns-
ins. Gengisfelling krónunnar hefði
haft mikið að segja við viðreisnina.