Húnavaka - 01.05.2008, Blaðsíða 139

H Ú N A V A K A 137
Mjög ört vaxandi ferðamannastraumur hefur verið til Þingeyra seinustu
árin. Árið 2005 voru skráðir gestir, sem tekið var á móti í kirkjunni, rúmlega
6000, árið 2006 voru þeir 7000 og árið 2007 voru þeir fast við 10.000.
Því má svo bæta við að föst viðvera er þarna aðeins í júní til ágústloka en
utan þess tíma kemur fjöldi ferðamanna að kirkju og stað. Eins hafa prestar
prófastsdæmisins tekið upp þá nýbreytni að vera með guðsþjónustur eða
helgistundir í Þingeyrakirkju hverja helgi yfir mestu ferðamánuði sumarsins.
Á slíkum ferðamannastað, eins og Þingeyrar eru með sína fallegu kirkju, er
æskilegt að allt umhverfi kirkjunnar og staðarins sé aðlaðandi hverjum sem
þangað kemur.
Kirkjugarðurinn er heilagur reitur sem liggur fast að kirkjunni, kapp hefur
verið lagt á að hann sé alltaf vel um genginn og fallegur. Það er alkunna að
gest ir sem fara um hann virða hann fyrir sér og dáðst að honum og umhverfinu.
Hversu fallegur garðurinn er má meðal annars þakka þeim hjónum, Hávarði
Sigurjónssyni frá Stóru-Giljá og Sólborgu Þórarinsdóttur á Blönduósi. Þau
hafa undanfarin ár lagt mikla natni í að slá garðinn og sjá um trjágróðurinn.
Að málum Þingeyrakirkju hef ég sem þetta skrifa starfað lengst samfellt
allra félagsmála í minni tíð eða samfellt í rúm 40 ár. Þar með er kirkjan og allt
sem að henni lýtur mér afar kært og hugleikið, þar finnst mér að ég hafi aldrei
gert nógu vel. Kannski get ég ekki lýst viðhorfi mínu mikið betur til kirkjunnar
en ég geri með eftirfarandi vísukorni.
Það er svo langt um liðið
að líf mitt er ofið við þig
og þegar ég sveima yfir svæðið
Þá sé ég þig.
E.G.E.
Leiðréttingar
Sigríður Höskuldsdóttir, Kagaðarhóli:
Myndtexti í Húnavöku 2007, bls. 181. Þar stendur 23. maí en á að vera 24. maí.
Aðalbjörg Ingvarsdóttir, Blönduósi:
Í Húnavöku 2007 birtist viðtal við mig. Þar taldi ég upp kennara mína á Laugum.
Svo illa vildi til að ég gleymdi að nefna Guðmund Gunnarsson stærðfræðikennara
og þykir það miður.
❄❄❄