Húnavaka - 01.05.2011, Page 105

H Ú N A V A K A 103
nokkrar kindur sem hann fékk að heyja fyrir hjá næstu bændum. Annars
stundaði hann aðallega sjóróðra sumar og haust. Foreldrar mínir höfðu verið
á ýmsum stöðum þegar ég fæddist. Kristján fæddist á Tjörn, Guðmundur á
Kálfshamri og Ásta í Hvammkoti, en við Líney í Hólagerði. Faðir minn var
mikill eljumaður bæði til sjós og lands. Hann hafði gaman af bókum og átti
mikið af góðum bókum, bæði fræðibókum og rímum sem hann las fyrir okkur
á kvöldin þegar tími gafst og setið var við vinnu. Fylgdist hann vel með
þjóðmálum og heimsviðburðum og sagði vel frá. Ég var eins árs þegar
foreldrar mínir fluttu frá Hólagerði að Króksseli sem er nokkru utar á
ströndinni. Vorum við Líney flutt í kláfum þessa leið á sama hestinum, hlýtur
því eitthvað að hafa hallast á þar sem Líney var rúmu ári eldri en ég en faðir
minn hefur haft einhver ráð með að jafna þann mun.
Í Króksseli gátu foreldrar mínir haft tvær kýr og fjölgað kindum að mun en
öll haust reri faðir minn úti á Kálfshamarsnesi. Var þá Kristján eldri bróðir
minn orðinn það stór að hann gat hjálpað móður minni við búið. Ég man
aðeins eftir einum atburði í Króksseli. Ég mun þá hafa verið fjögurra ára.
Þannig var að kýrnar frá næsta bæ, Björgum, komu að Króksseli, en með þeim
var naut sem lét mjög illa og hamaðist í öllum torfveggjum með feikna hávaða
og látum. Við systkinin vorum ein heima því að foreldrar okkar voru við
heyskap nokkuð langt frá bænum en sáu þó hvernig boli lét. Þegar Kristján sá
hvað við vorum hrædd við óhljóðin í bola, raðaði hann okkur öllum upp á
borð og lét okkar fara að syngja svo við heyrðum síður í bola. Hvort boli hefur
verið hrifinn af söng okkar dreg ég í efa. Faðir minn flýtti sér heim þegar hann
sá lætin í bola til að vita hvernig okkur liði. Varð hann ekki lítið hissa þegar
hann sá okkur öll uppi á borði sex í einum hnapp syngjandi. Faðir okkar rak
nú kýrnar og bola langt frá bænum og þar út fyrir á sem rennur á milli
bæjanna.
Tjörn á Skaga en þar er Kristján bróðir fæddur.