Fréttablaðið - 20.12.2014, Blaðsíða 58

20. desember 2014 LAUGARDAGUR| HELGIN | 58
Jón Óttar kemur inn á Hilton Nordica-hótelið veðurbarinn eftir að hafa fest í blindbyl uppi á heiði á leið sinni í við-talið. Eftir að hafa pantað sér grænt te þá fær hann sér
sæti og segir frá því hvernig hann
komst loks á áfangastað eftir að
hafa keyrt á fimm kílómetra hraða
nánast blindandi. Hann lætur það
ekki á sig fá enda ýmsu vanur.
Talið berst að endurkomu Jóns
Óttars í sjónvarpið, á sjónvarps-
stöðina sem hann stofnaði fyrir 28
árum. Sjálfur hvarf hann á braut
frá stöðinni árið 1990 en árin þrjú
sem hann átti á Stöð 2 voru fjörug
og annasöm.
Draumur verður að veruleika
„Það var alltaf draumur minn að
gera svona ævintýraþætti um þetta
ótrúlega land okkar þegar ég var
á Stöð 2. Í stað þess að gera Stöð
2 að vídeóstöð fyrir Reykvíkinga
– eins og bankinn okkar krafðist –
vorum við staðráðin í að gera hana
að sjónvarpi allra landsmanna. Við
fengum því snemma þá hugmynd
að fara með stöðina út á land með
útsendingu frá ótal stöðum allt
í kringum landið. Þátturinn hét
einfaldlega Stöðin á staðnum og
breytti lífi mínu. Ég heillaðist af
landsbyggðinni á þessu ferðalagi.
Náttúruperlurnar og fegurðin í
landslaginu voru auðvitað stór-
brotnar en það var fyrst og fremst
fólkið, líf þess og sögur sem heill-
uðu mig,“ segir hann og fær sér
tesopa áður en hann heldur áfram.
„Síðan, kannski af því að við
búum erlendis, þá sér maður
Ísland í svolítið öðru vísi og ef til
vill rómantískara ljósi. Það sem
mér finnst merkilegast er hvern-
ig ferðamannastraumurinn hefur
gerbreytt Íslandi og sérstaklega
landsbyggðinni. Í byrjun fóru flest-
ir þessir útlendingar á sömu stað-
ina á suðvesturhorninu en síðan fór
fólkið úti á landi að taka í taumana
og í dag sjá ferðamenn – erlendir
sem innlendir – meira og meira af
þessu dulda Íslandi sem beið þeirra
á bak við tjöldin. Ekki aðeins hefur
verið byggður urmull af frábær-
um gisti- og veitingastöðum held-
ur er magnað að sjá öll þessi nýju
söfn og setur sem hafa verið reist
utan um galdra, skrímsli, drauga,
Íslendingasögur og svo framveg-
is. Svo að ekki sé talað um allar
ævintýraferðirnar – á bátum,
jeppum og snjósleðum sem ferða-
fólki til ómældrar gleði leiðir það
ofan í hella, niður í gíga og upp á
jökla. Heimurinn er með öðrum
orðum loks að byrja að kynnast
því undralandi sem Ísland er og
verður alltaf. Það má því segja að
þetta sé hálfgerður óður til lands-
byggðarinnar og alls þess ótrúlega
starfs sem þar er verið að vinna,“
segir Jón Óttar um þættina Dulda
Ísland.
Brennandi áhugi
Jón Óttar stofnaði Stöð 2 árið 1986
ásamt Hans Kristjáni Árnasyni.
Þeir félagar ráku stöðina þessi við-
burðaríku fyrstu þrjú ár. „Ég hef
alltaf haft mikinn áhuga á sjón-
varpi. Þegar ég fór út í þetta á
sínum tíma þá var það ekki síður
vegna brennandi áhuga á þáttagerð
en sjónvarps-„bisness“. Á þeim
tíma fóru yfir 90 prósent af pening-
um til dagskrárgerðar í fréttir og
fréttamagasín. Í dag er sjónvarp að
gerbreytast. Fréttir er eitthvað sem
allir gera lesið á netinu, meira að
segja nýrri fréttir. Í staðinn verður
þáttagerð, þar á meðal leiknir þætt-
ir, æ mikilvægari.
Mér finnst stórkostlegt hvernig
Stöð 2 og RÚV hafa tekið á þessum
breytingum og hvernig samkeppn-
in á milli þeirra hefur bætt báðar
stöðvarnar. Það var auðvitað ómet-
anlegt að endurnýja kynnin við
Stöð 2. Það var alltaf gaman á Stöð
2 og það hefur ekkert breyst. Töku-
og hljóðmennirnir sem unnu þetta
með okkur voru ekki aðeins fram-
úrskarandi allir sem einn heldur
og frábærir ferðafélagar og ekki
er klipparinn okkar og hitt tækni-
fólkið síðra,“ segir Jón Óttar um
þættina Dulda Ísland.
Hefur aldrei litið til baka
Áhuginn á sjónvarpi var það mikill
að hann hætti í góðu starfi sem dós-
ent í efnafræði og yfirmaður náms-
brautar í matvæla- og næringar-
fræði við Háskóla Íslands til þess
að sinna því sem brann á honum.
„Ég var í draumastöðu þarna, en
ég gekk bara út og hef aldrei litið
til baka. Hluti af ástæðunni var að
mér fannst ekki gaman að vinna
fyrir ríkið en það er of löng saga,“
segir hann kankvís.
Eftir að Stöðvar 2-ævintýrið tók
enda flutti hann ásamt eiginkonu
sinni, Margréti Hrafnsdóttur, á vit
annarra ævintýra í kvikmynda-
borginni Los Angeles. Þau settust
bæði á skólabekk. Fyrst lærði hann
handritaskrif og þar næst kvik-
myndagerð. Síðan kynntust þau
Herbalife og hafa starfað við það
á annan áratug og eru í dag hlut-
hafar í fyrirtækinu. „Það passaði
auðvitað vel fyrir mig því ég var
með þessa menntun í næringar-
fræði,“ segir hann. Hjónin eru enn
búsett erlendis en bjuggu hér að
hluta á árunum 2007-2012 á meðan
Ragnar, sonur þeirra, gekk hér í
menntaskóla.
Ferðuðust á ævintýrastaði
Jón Óttar og Margrét hafa und-
anfarin ár verið að sinna hinum
ýmsu verkefnum, meðal annars
framleiðslu kvikmynda og sjón-
varpsþátta. Þau komu heim síð-
asta sumar til þess að taka upp
Dulda Ísland og ferðuðust þá um
landið þvert og endilangt á hina
ýmsu ævintýrastaði. Í hverjum
þætti fær Jón Óttar þekkta Íslend-
inga sem ferðafélaga. Meðal ferða-
félaga eru Magnús Scheving, Yoko
Ono, Eiður Smári Guðjohnsen,
Þorvaldur Davíð, Björn Hlynur,
Eivör Pálsdóttir og Vilborg Arna
Gissurardóttir. „Þetta er eitt það
skemmtilegasta sem ég hef gert.
Við vildum lenda í ævintýrum, fá
söguna á bak við staðina og hitta
frábært fólk,“ segir hann.
Eins gamall og hann vill vera
Það eru ekki allir sem snúa aftur
í sjónvarp komnir á sjötugsaldur-
inn. „Ég hugsa lítið um aldurinn,
segir Jón Óttar. Mér líður eigin-
lega alltaf eins og ég sé þrítugur.
Þú ert í rauninni eins gamall og
þér líður. Það eru alltaf að koma
fleiri og fleiri rannsóknir sem sýna
það. Ef þér finnst þú vera gamall
þá ertu gamall. Ef þér finnst þú
vera ungur þá ertu ungur,“ segir
hann hugsi.
Hann segir það líka leika stórt
hlutverk hvernig lífsstíl við velj-
um okkur. „Við erum í þessu kolvit-
lausa mataræði og lífsstíl. Ég hef
alltaf reynt að hugsa vel um þetta.
Það er komið frá mömmu sem var
mikið náttúrubarn og kenndi okkur
systkinunum að nýta náttúruna. Ef
ég hefði ekki lifað eftir þessu þá
væri ég steindauður því ég er með
frekar léleg gen. Það er mikið af
hjartasjúkdómum, krabbameini
og sykursýki í báðum ættum hjá
mér. Í dag eru allir að gera sig
veika með því að vera of þungir og
borða vitlaust. Það sem gerist hjá
eldra fólki er að líkaminn fyllist af
bólgum og það hrannast upp sjúk-
dómar. Við þurfum að huga betur
að þessu. Vð þurfum öll að komast
á þennan stað, gerbreyta hugsun
okkar og taka ábyrgð á lífi okkar.
Átta okkur á því að við erum bara
eins gömul og við viljum vera.“
Fylgja draumum sínum
Aðspurður hvað taki við eftir
Dulda Ísland segir hann margt
vera í farvatninu. Bæði sjónvarps-
þætti og kvikmyndaverkefni víða
um heim. „Það eru fullt af hlutum
í gangi sem eru á mismunandi þró-
unarstigum. Það kemur bara í ljós.
Það sakar heldur ekki að við lifum
á ótrúlega spennandi og hættuleg-
um tímum,“ bætir hann við hugsi.
„Við Margrét vinnum í því sem
okkur langar að gera og fylgjum
okkar draumum.“ Inntur eftir því
hvort þau hjónin séu svona sam-
rýnd þar sem þau vinni flest allt
saman segir hann: „Það fyndna er
að við Margrét erum um það bil
eins ólík og hægt er að vera, eigin-
lega algjörar andstæður. Það sem
hefur alltaf sameinað okkur eru
draumarnir og sú sameiginlega
ákvörðun að elta þá hvað sem taut-
ar og raular. Annars hefði þetta
sjálfsagt aldrei gengið,“ bætir
hann við brosandi.
Viktoría
Hermannsdóttir
viktoria@frettabladid.is
ÓTTAST EKKI ALDURINN Jón Óttar verður sjötugur á næsta ári en segist ekki óttast það að eldast vegna þess að hann hugsi vel um sig og líður eins og hann sér þrítugur.
FRÉTTABLAÐIÐ/VILHELM
Á BRÚÐKAUPSDAGINN Jón Óttar og Margrét gengu í það heilaga
28. desember í fyrra eftir að hafa verið saman í um 25 ár.
FYRSTA ÚTSENDING Hér sést Jón Óttar í fyrstu útsendingu
Stöðvar 2.
DULDA ÍSLAND Í þættinum ferðast Jón Óttar um landið með þekktum
ferða félögum og kannar dulda ævintýrastaði.
Snýr aftur í sjónvarpið eftir 25 ár
Jón Óttar Ragnarsson snýr aftur á Stöð 2, sjónvarpsstöðina sem hann stofnaði, með þáttaröðina Dulda Ísland. Hann er
að verða sjötugur á næsta ári en hefur ekki áhyggjur af því að eldast enda hugsar hann vel um sig og honum líður eins og
hann sé þrítugur. Hann hefur haft það að markmiði að elta drauma sína og ætlar sér að gera það svo lengi sem hann lifir.