Morgunblaðið - 22.12.2015, Síða 11

DAGLEGT LÍF 11
MORGUNBLAÐIÐ ÞRIÐJUDAGUR 22. DESEMBER 2015
flísar fyrir vandláta
PORCELANOSA
Skútuvogi 6 - Sími 568 6755
Morgunblaðið/Eggert
Á æfingu Heiðdís Hanna og Ingileif Bryndís eru á sömu bylgjulengd hvað tónlistarsmekk áhrærir.
Valgerður Þ. Jónsdóttir
vjon@mbl.is
V
ið ætlum að flytja ís-
lensk og erlend hátíð-
leg verk, ein- og tví-
radda sönglög í bland
við einleik á píanó,“
segja vinkonurnar Heiðdís Hanna
Sigurðardóttir, sópransöngkona,
og Ingileif Bryndís Þórsdóttir, pí-
anóleikari, sem í kvöld kl. 20 halda
tónleikana Jólaró í Fríkirkjunni.
„Ég fæ að radda tvö lög með Heið-
dísi,“ upplýsir Ingileif Bryndís.
Þær stöllur hafa ekki haft
mörg tækifæri til að koma fram
saman á tónleikum undanfarið því
Ingileif Bryndís býr og starfar í
Rottenburg í Þýskalandi en Heið-
dís Hanna stundar nám við tónlist-
ardeild Listaháskóla Íslands.
Þær kynntust á lokaári Ingi-
leifar Bryndísar í meistaranámi og
fyrsta bakkalárári Heiðdísar
Hönnu við Tónlistarháskólann í
Freiburg fyrir þremur árum . „Ég
er nefnilega alveg fimm árum
eldri,“ útskýrir Ingileif Bryndís.
Vegna aldursmunar höfðu leiðir
þeirra ekki legið saman í MR þar
sem báðar stunduðu nám. „Áður
en ég fór utan höfðum við spjallað
saman á Facebook, en þekktumst í
rauninni ekki neitt. Inga var að-
allega í því að svara spurningum
mínum um námið og skólann. Svo
þegar við hittumst í Freiburg féll-
umst við í faðma eins og við hefð-
um þekkst alla ævi,“ segir Heiðdís
Hanna.
Hugskeytin fljúga á milli
Í Freiburg fundu þær fljótt
hversu vel þeim lét að starfa sam-
an, en upp á síðkastið hefur sam-
band þeirra þó verið mest í hug-
skeytastíl eins og þær segja. „Við
sendum hvor annarri hugskeyti því
þegar ég fæ skilaboð frá Heiðdísi
Hönnu þá snúast þau oftast ein-
mitt um það sem ég er að hugsa –
eða öfugt ...“ segir Ingileif Bryn-
dís. „ ... enda byrjum við oft á að
segja „eins og þú veist þá er ég
búin að vera að hugsa til þín,““
botnar Heiðdís Hanna.
Þær segjast vera á sömu
bylgjulengd hvað tónlistarsmekk
áhrærir sem og margt annað. Til
dæmis hafa þær mikinn áhuga á
Alexandertækni, sem þær kynnt-
ust í Freiburg og er hugar- og lík-
amstækni sem gengur út á að
frelsa líkamann; losa spennu og
auka orkuflæði um líkamann. Báð-
ar hafa gaman af að vinna með og
pæla í ljóða- og sönglagatextum,
einkum þýskum og íslenskum.
Þegar Heiðdís Hanna tók þá
ákvörðun að ljúka bakkalárnáminu
á Íslandi, sammæltust þær um að
láta hvorki höf né lönd koma í veg
fyrir frekara samstarf. Í fyrra
stóðu þær fyrir sumartónleikunum
Brot af því besta í Vídalínskirkju í
Garðabæ, sínu fyrsta verkefni
saman á Íslandi. Báðar tóku svo í
sumar þátt í Pearls of Icelandic
Songs, tónleikaröð sem ætluð er
ferðamönnum.
Með tónleika á
öldrunarheimilum
Hugmyndin að tónleikunum í
kvöld kviknaði fyrir jólin í fyrra.
„Þá tókum við einn dag í að fara á
öldrunarheimili og syngja nokkur
íslensk jólalög. Okkur fannst það
bæði gaman og gefandi og
ákváðum að halda jólatónleika að
ári.“
Síðan hafa mörg hugskeytin
flogið á milli þeirra. „Það er svo
mikilvægt að koma fram með
manneskju sem maður treystir
fullkomlega,“ segir Heiðdís Hanna.
Og Ingileif Bryndís tekur í sama
streng: „Gagnkvæmur skilningur
og samskipti án orða á milli tónlist-
armanna skiptir miklu máli. Þeir
þurfa hvor um sig að geta brugðist
við því óvænta og haldið áfram
eins og ekkert hafi í skorist ef eitt-
hvað fer úrskeiðis.“
Freiburg - Ísland
Þótt Heiðdísi Hönnu sé eftir-
sjá að því að búa ekki lengur í
Þýskalandi, sér hún ekki eftir
þeirri ákvörðun sinni að taka
fjórða og síðasta árið í náminu á
Íslandi. „Mér finnst meira pláss
fyrir nýsköpun og þróun í Listahá-
skóla Íslands þar sem allt er meira
í takt við samtímann heldur en í
háskólanum í Freiburg, sem er
íhaldssamur en engu að síður frá-
bær skóli.“
„Eins og við ræddum oft um
okkar á milli, þá var þar allt rosa-
lega alvarlegt. Stundum fundum
við alveg þyngslin þegar við vorum
að æfa í skólanum,“ segir Ingileif
Bryndís, sem er nú sjálfstætt
starfandi píanóleikari og spilar
aukinheldur með 80 manna sinfón-
ískri blásarahljómsveit í Rotten-
burg. „Fram til þessa hef ég spilað
í bakgrunni en kem fram sem sóló-
isti á tónleikum í vor þar sem við
tökum Rhapsody in Blue eftir
Gerschwin.“
Hún segir framtíðina svolítið
óráðna varðandi búsetu, enda á
hún þýskan kærasta, sem er vatna-
fræðingur og með ágætis stöðu hjá
jarðvarmafyrirtæki í Rottenburg.
Heiðdís Hanna á aftur á móti ís-
lenskan kærasta og hyggur ekki á
búferlaflutninga í bráð að minnsta
kosti.
Margt að gerast
„Kannski fer ég í mastersnám
annað hvort í Listaháskóla Íslands
eða í útlöndum. Það er svo margt
spennandi að gerast núna, til dæm-
is sigraði ég í keppninni Ungir ein-
leikarar sem er samstarfsverkefni
Sinfóníuhljómsveitar Íslands og
Listaháskólans og kem fram með
hljómsveitinni 14. janúar. Draum-
urinn er auðvitað að lifa af listinni,
standa á sviði og syngja,“ segir
hún.
Heiðdís Hanna hefur líka hug-
leitt fleiri möguleika.
„Ég er spennt fyrir að kynna
óperuna sem listform fyrir Íslend-
ingum, jafnvel í verkefnavinnu í
grunn- og framhaldsskólum. Sjálf
vissi ég sem krakki ekki hvað
ópera var. Krakkar kynnast leik-
húsinu gegnum skólastarfið og fara
mörg hver í leikhús en yfirleitt
ekki á óperu. Samfélagið rúllar
miklu hraðar og fáir gefa sér tíma
eða hafa gaman af að hlýða á
þriggja tíma óperu – ekki einu
sinni ég, sem þó er í þessum
bransa. Óperuformið hefur ekki
þróast eins og leikhúsformið og er
orðið svolítið staðnað.“
Hvar sem þær búa og hvað
sem framtíðin ber í skauti sér er
eitt öruggt í hugum beggja: Þær
ætla að halda áfram að spila og
syngja saman, hér heima og/eða í
útlöndum. Þær lofa hátíðlegri, kósí
og afslappaðri stemmningu með
kertaljósum á tónleikunum í kvöld
þar sem verk eftir Bach, Liszt,
Sigvalda Kaldalóns og Jórunni Við-
ar verða í hávegum höfð.
Vinkonur á
sömu nótum
Vinkonurnar Heiðdís Hanna Sigurðardóttir,
sópransöngkona, og Ingileif Bryndís Þórsdóttir,
píanóleikari, efna til tónleikanna Jólaró í Fríkirkjunni
í Reykjavík í kvöld kl. 20. Á efnisskránni verða
íslensk og þýsk sönglög, m.a. eftir Bach, Liszt,
Sigvalda Kaldalóns og Jórunni Viðar.
Kósí kvöldstund Heiðdís Hanna og Ingileif Bryndís lofa hátíðlegri, kósí og
afslappaðri stemningu með kertaljósum á tónleikunum í kvöld.
Miðar á tónleikana Jólaró fást á
tix.is eða við innganginn í Fríkirkj-
unni í Reykjavík.
2005 Heiðdís Hanna fór í sinn
fyrsta söngtíma í Tónlistarskóla
Garðabæjar.
2011 lauk framhaldsprófi frá
Tónlistarskóla Garðabæjar.
2012 - 2015 stundaði söngnám
á bakkalárstigi við Tónlistar-
háskólann í Freiburg í Þýska-
landi.
2015 hóf söngnám á bakkalár-
stigi hjá Þóru Einarsdóttur og
Kristni Sigmundssyni í tónlist-
ardeild Listaháskóla Íslands og
reiknar með að útskrifast um
jólin á næsta ári.
Sópransöngkonan
HEIÐDÍS HANNA
1992 Ingileif Bryndís hóf píanó-
nám sjö ára gömul hjá Sigríði Ein-
arsdóttur.
2007 burtfararpróf frá Tónlistar-
skólanum í Reykjavík.
2011 hóf nám í Tónlistarskólanum í
Freiburg í Þýskalandi 2007 og lauk
bachelorprófi með ljóðaundirleik
sem aukagrein 2011.
2012 - 2013 skiptinám í Vínarborg.
2013 útskrifaðist með masters-
próf í píanóleik frá Tónlistarskól-
anum í Freiburg.
2015 sjálfstætt starfandi píanó-
kennari og tónlistarmaður í
Rottenburg í Þýskalandi.
Píanóleikarinn
INGILEIF BRYNDÍS