Feykir - 23.10.2014, Blaðsíða 9
40/2014 9
Heilir og sælir lesendur góðir.
Gaman að byrja þáttinn að þessu sinni með
vel gerðum vísum sem allt eru hringhendur.
Höfundur er Þórhildur Sveinsdóttir frá Hóli
hér í Svartárdalnum. Held að þessar ágætu
vísur hafi verið ortar veturinn 1974 og mun
þá hafa verið talsverð umræða orðin um
þjóðhátíðina sem halda átti þá um sumarið.
Áður brosti hjalli og hlíð
-hjartað nostur dáir.-
Nú er frost og norðan hríð
nú eru kostir fáir.
Allt í kring er klaki og snjór
kuldi lyngið beygir.
Aldrei klingir orðasjór.
Allir vingulslegir.
Þó að hríðin hamist stríð
herði á lýða kjörum.
Þegna bíður þjóðhátíð
því mun kvíði á förum.
Aftur hlánar efalaust
allra þánar sinni,
himinn blánar, blíðkast raust
betur lánast kynni.
Þá skal herða hljóð á ný
hefja ferð um strindi.
Þá mun verða vakin hlý
vísnamergð í skyndi.
Gleymast vetrar veðrin hörð
vorið hvetur braginn.
Skýrist letur, lifnar jörð
léttir betur haginn.
Alla gleður gæða fjöld
góðlynd veður kæta.
Dýrin seður, yngist öld
allt vill geðið bæta.
Sól í heiði hýrgar lund,
hverfur neyð og tregi.
Nýta breiðir nægtamund
neinum leiðist eigi.
Þó að frjósi fold og mar
fljótt þó kjósum bætur.
Allar rósir anga þar
eftir ljósar nætur.
Smáu ljóði ljúka fer
lítt er hróður mætur
Þeim sem óð í brjósti ber
bíð ég góðrar nætur.
Höldum áfram í sama dúr og bætum við
einni hringhendu. Höfundur að henni minnir
mig að sé Ármann Dalmansson sem þá mun
hafa átt heima á Akureyri, en vísan var gerð
kringum 1960.
Fjöllin klæðir kaldur snær.
Kristals-þræðir titra.
Ljómar bæði land og sær.
Ljós í hæðum glitra.
Nú síðustu daga hefur talsvert verið rætt um
málefni mjólkuriðnaðar hér á landi. Virðast
mál okkar stóru stofnunar í þeim geira vera
í miður góðum farvegi. Næstu vísur minnir
mig að kæmust á kreik í maí 1979 þegar Adolf
I. Pedersen las í dagblaði um deilur þess tíma
sem þá voru við mjólkurfræðinga.
Vísnaþáttur 628 Hér er sagt um mjólkurmálmargt sem þarf að kanna.
Flosi þambar úr fullri skál
af flautum vísindanna.
Hún er ekki fyrir fólk
fróðir menn það sanna.-
Það drepist, ef það drekki mjólk
að dómi vísindanna.
Síðar mun ef ég man rétt hafa komið fram í
umræddri grein að sumu gömlu fólki yrði
bara gott af mjólk úr íslensku kúnni. Mun þá
Adolf hafa bætt þessari vísu við.
Þeir duga vel sem drekka mjólk
dóminn um það felli.
Glaðværð, segir gamalt fólk,
gefur hún í elli.
Séð höfum við á þessum haustdögum eins
og áður blómin sem voru svo falleg blikna
og fölna. Halla Loftsdóttir frá Stóra-Kollabæ
í Fljótshlíð er höfundur að þessum, sem ortar
eru um deyjandi rós.
Er að hníga höfuð þitt,
hvað er við því að segja?
Unga sumaryndið mitt
áttu nú að deyja?
Bliknar flest er bjartast skín,
blöð og rósir falla.
Þetta eru örlög þín og mín
þau eru jöfn við alla.
Gaman að rifja næst upp tvær ágætar vísur
eftir aðra konu sem lifði tímana tvenna um og
eftir aldamótin 1900. Bjó hún á Tumastöðum í
Fljótshlíð og orti svo á efri árum.
Sigla fyrir sólu ský,
sölna grundir fínar.
Nú er komin kölkun í
kvæði og stökur mínar.
Fækkar dögum förlast sýn
fæðist sjaldan baga.
Alltaf skín þó inn til mín
ást til bernskudaga.
Þá nokkur orð til ykkar lesendur góðir. Ég held
stundum er ég fer að undirbúa nýjan þátt að
ég sé nú loks búinn með allt efni. Ræst hefur
reyndar úr því fram að þessu og ýmislegt tínst
til. Gaman væri að fá frá ykkur lesendur góðir
einhvert framlag í næsta þætti. Alveg sama
hvort þið hafið ort það sjálf, eða lært eftir
aðra höfunda. Tek sem dæmi hve gaman var
að fá vísurnar hennar Þórhildar sem birtast
hér fremst í þættinum. Gott að enda með vel
gerðri hringhendu eftir Dýrólínu Jónsdóttur,
áður húsfreyju í Fagranesi á Reykjaströnd í
Skagafirði.
Margan kól af megni kífs
minnsta skjóli feginn.
Aðrir róla leiðir lífs
lengst af sólar megin.
Verið þar með sæl að sinni.
/ Guðmundur
Valtýsson
Eiríksstöðum,
541 Blönduósi
Sími 452 7154
( GUÐMUNDUR VALTÝSSON ) kristin@feykir.is
Fanney Ísfold Karlsdóttir skrifar
Hreyfiseðill – hvað er það?
Hreyfiseðill er
meðferðarúrræði í
heilbrigðiskerfinu sem læknir
skrifar upp á í samráði við
sjúkling/skjólstæðing og er
ávísun á hreyfingu eftir
forskrift. Læknir vísar
skjólstæðingi í kjölfarið til
hreyfistjóra sem útbýr
hreyfiáætlun í samráði við
hann. Skjólstæðingurinn
framfylgir áætluninni upp á
eigin spýtur en undir eftirliti
hreyfistjóra sem fylgist með
árangri og meðferðarheldni.
Eftirfylgd er svo í höndum
hreyfistjóra og læknis.
Skjólstæðingar sem hafa sjúk-
dóma þar sem hreyfing er
gagnleg sem meðferð eða hluti
af meðferð geta fengið ávísun á
hreyfiseðil hjá sínum lækni.
Viðkomandi hittir þá hreyfi-
stjóra (sem er menntaður
sjúkraþjálfari) í einu upphafs-
viðtali. Í viðtalinu er lagt faglegt
mat á stöðu viðkomandi hvað
Fanney Ísfold Karlsdóttir MYND: ÚR EINKASAFNI
varðar þol, getu, áhugahvöt og
áhugasvið og síðan er lögð upp
áætlun um hreyfingu, hvernig,
hversu oft, hversu lengi og
hversu mikil ákefð er ráðlögð í
hreyfingunni. Skjólstæðingur
skráir svo hreyfingu sína á heim-
síðuna hreyfiseðill.is (eða
hringir inn) og merkir við á
ákveðinn hátt og það gerir
honum og hreyfistjóranum
kleift að fylgjast með árangr-
inum. Nái skjólstæðingurinn
ekki markmiðum hefur
hreyfistjórinn samband við
hann, hvetur áfram og leitar
nýrra leiða ef þörf krefur.
Hreyfiseðillinn getur átt við
sem meðferð eða hluti af
meðferð við ýmsum sjúkdómum
eða sjúkdómseinkennum. Í dag
sýna vísindalegar rannsóknir
fram á jákvæð áhrif hreyfingar
sem meðferðar við mörgum
sjúkdómum.
Algengustu ábendingar fyrir
hreyfiseðlum hérlendis hafa
verið fullorðinssykursýki, offita,
hár blóðþrýstingur, þunglyndi
og kvíði og ýmsir stoðkerfis-
sjúkdómar.
Hreyfiseðillinn gildir í eitt ár
en algengt er að þetta tímabil nái
yfir þrjá mánuði til eitt ár.Hreyfi-
seðill er tiltöluleg nýtt úrræði í
íslensku heilbrigðiskerfi en hef-
ur verið í notkun í nágranna-
löndum okkar í fjölda ára.
Jón Steinar Jónsson læknir
og Auður Ólafsdóttir sjúkra-
þjálfari sem sitja í verkefnastjórn
um Hreyfiseðil komu nú á
haustdögum og kynntu þetta
verkefni og hófu innleiðingu
þess hér á Heilsugæslunni á
Sauðárkróki. Hreyfistjóri verður
Fanney Ísfold Karlsdóttir sjúkra-
þjálfari.
Uppselt á fjórar sýningar
í röð hjá Leikfélagi
Sauðárkróks
Þremur
sýningum
bætt við
á Emil
Bætt hefur verið við
þremur aukasýningum á
Emil í Kattholti í uppfærslu
Leikfélags Sauðárkróks.
Uppselt hefur verið á
fimm sýningar af átta hingað
til.
Leikfélag Sauðárkróks
þakkar góðar viðtökur og
vekur athygli á að auka-
sýningar verða á föstudag,
laugardag og sunnudag, sem
hér segir:
Föstudag 24. október kl. 17:30
Laugardag 25 október kl 14:00
Sunnudag 26 október kl 16:00
Miðasala er í síma 849 9434
og einnig í Bifröst 30 mín.
fyrir sýningar. /Fréttatilkynning