Morgunblaðið - 04.10.2018, Blaðsíða 66

VIÐTAL
Helgi Snær Sigurðsson
helgisnaer@mbl.is
Hrollvekjan Malevolent, í leikstjórn
hins alíslenska Ólafs Jóhannesson-
ar, sem gengur undir listamanns-
nafninu Ólafur de Fleur Jóhannes-
son, verður frumsýnd á streymis-
veitunni Netflix á morgun, föstu-
dag. Frumsýning er kannski ekki
rétta orðið þar sem um streym-
isveitu í sjónvarpi er að ræða og því
réttara að segja að kvikmyndin
verði þá aðgengileg notendum veit-
unnar sem nær til 190 landa, hvorki
meira né minna.
Systkini og svikahrappar
Kvikmyndin er sú fyrsta banda-
ríska sem Ólafur leikstýrir og fóru
tökur fram í Skotlandi, í Glasgow og
nágrenni borgarinnar fyrir um
tveimur árum og var Bjarni Felix
Bjarnason kvikmyndatökustjóri.
Handrit myndarinnar er eftir Ben
Ketai og Evu Konstantopoulos og
byggt á bók Konstantopoulos,
Hush. Í myndinni segir af syst-
kinum, Jackson og Angelu, sem
gefa sig út fyrir að vera drauga-
banar en eru í raun svindlarar, hafa
fé af syrgjandi fólki með fölsuðum
tækjabúnaði, tæknibrellum og
meintri miðilsgáfu Angelu. Syst-
kinin eru fengin til að rannsaka
reimleika á gömlu munaðarleys-
ingjahæli fyrir stúlkur og komast að
því að hryllilegir atburðir áttu sér
þar stað 25 árum fyrr. Fljótlega
átta þau sig á því að reimleikar eru
ekki það versta við staðinn því eitt-
hvað mun verra leynist á hælinu.
Með hlutverk systkinanna fara
ensku leikararnir Florence Pugh og
Ben Lloyd-Hughes en af öðrum
leikurum má nefna Celiu Imrie sem
er einnig ensk og þekkt leikkona.
Endurræsti sig
Ansi langt er um liðið frá því síð-
ast spurðist til Ólafs og engu líkara
en hann hafi lagst í híði. Blaðamað-
ur ræddi síðast við hann í maí árið
2015 og þá um sömu kvikmynd sem
reyndar hét þá Hush og átti að vera
með annarri leikkonu í aðalhlut-
verki, Sophie Cookson. Eins eins og
gengur í kvikmyndabransanum
breyttust áætlanir, Cookson reynd-
ist of upptekin fyrir verkefnið og
önnur leikkona var því fundin í
hennar stað og titli kvikmyndarinn-
ar var líka breytt. Tökur hófust svo
árið 2016.
En hvar hefur Ólafur eiginlega
verið?
„Ég þaggaði aðeins niður í mér
og lærði að lesa og skrifa upp á
nýtt,“ svarar hann, kátur að vanda.
Hvað á hann við með því? „Það er
búið að vera mikið álag á mér, eins
og gengur og sérstaklega eftir að ég
skaut þessa mynd. Ég ákvað því að
fara bara að æfa mig í að skrifa
kvikmyndahandrit.
Ég var búinn að gera mikið af því
en langaði til að endurræsa mig og
tók mér góðan tíma í að hreinsa pal-
lettuna og læra þetta upp á nýtt.
Þetta hefur verið rosalega gefandi
og ég hef verið að skrifa mikið,“
svarar Ólafur. Bæði hafi hann skrif-
að fyrir sjálfan sig og fengið góð
verkefni erlendis frá sem hann sé
að vinna í þessa dagana.
Marineringin er mikilvæg
Ólafur segir langt ferli að baki
Malevolent, nýir leikarar hafi m.a.
verið fundnir og handritið betrum-
bætt áður en ráðist var í tökur. Að
þeim loknum tók svo klippingin við
og stóð yfir í eina 18 mánuði með
hléum. „Þessi marineringartími
gerir oft gæfumuninn,“ segir Ólafur
um þennan langa tíma sem myndin
var í klippiherberginu.
– Marineringin er líka lykilatriði
þegar maður er að grilla …
„Jú, jú, nákvæmlega og það er
ekki oft sem það er hægt en þarna
var það blessunarlega hægt,“ segir
Ólafur. Allur gangur sé á því hversu
langan tíma klipping taki í kvik-
myndagerðarferlinu. „Yfirleitt eru
þetta þrír mánuðir sem maður fær í
leikstjóraklippið og svo tekur annar
klippari við. Svo kem ég inn aftur
og sá þriðji og svo gengur þetta
bara hægt og rólega,“ útskýrir
hann.
Ólafur segir það hafa verið
áhugaverða reynslu að vinna í
bandarísku kvikmyndabatteríi og
geta einbeitt sér alfarið að leik-
stjórninni. Hann hafi oftast fram-
leitt sjálfur sínar kvikmyndir og
blessunarlega getað sleppt þeim
hluta kvikmyndagerðarinnar að
þessu sinni.
Draugalegur kastali
Malevolent er fyrsta hrollvekja
Ólafs og segist hann hafa stúderað
slíkar kvikmyndir til að undirbúa
sig fyrir tökur. „Þetta er mikil list
og það þurfti þó nokkurn undirbún-
ing til að geta tekið almennilega
þátt í þessu,“ segir hann um hroll-
vekjuformið. Hann hafi skoðað vel
bæði gamlar hrollvekjur og nýjar,
til dæmis Shining og aðrar sígildar.
Hrollvekjan var tekin í gömlum
kastala í Skotlandi og heyra má á
Ólafi að tökustaðurinn hafi verið
frekar draugalegur. Spurður að því
hvort hann hafi ekki gist í kastal-
anum segist Ólafur alls ekki hafa
verið til í það. „Það sem var eigin-
lega skemmtilegast við þetta var að
vinna með átta ára telpum. Þær
voru að vinna við mjög erfiðar að-
stæður en voru oftast þær fullorðn-
ustu á tökustað,“ segir Ólafur en
eins og sjá má af stillum og stiklum
úr kvikmyndinni eru þessar stúlkur
heldur hrollvekjandi.
Nýi völlurinn
„Þetta er bara nýi völlurinn,“
segir Ólafur um sýningarvettvang
kvikmyndarinnar, hina gríðar-
vinsælu streymisveitu Netflix. „Að-
gengi er orðið svo rosalega gott að
þetta verður varla mikið betra, að
komast upp á svona svið,“ bætir
hann við.
– Hefurðu fengið fleiri verkefni
út á þessa kvikmynd?
„Það á bara eftir að koma í ljós,“
svarar Ólafur sem er að vanda með
nokkur verkefni á teikniborðinu.
„Ég hef verið að skrifa og líka
kenna svolítið handritaskrif. Svo hef
ég verið að æfa fólk í kvikmynda-
leik, litla hópa,“ segir hann.
En hvert er næsta leikstjórnar-
verkefni Ólafs de Fleur Jóhannes-
sonar? „Ég er að fara að gera heim-
ildarmynd í Los Angeles á næsta
ári og svo er ég bara að skoða nokk-
ur verkefni,“ segir Ólafur. Um
heimildarmyndina vill hann sem
minnst segja að svo stöddu.
Á rauðu teppi í IKEA
Blaðamanni leikur forvitni á að
vita hvernig Ólafur muni fagna
frumsýningunni sem fer að þessu
sinni ekki fram í bíói heldur í þús-
undum, ef ekki milljónum, sjón-
varpstækja víða um heim. Ætlar
hann að sitja heima með poppkorn í
skál og opna kampavínsflösku?
„Nei, ég fer upp í IKEA, fæ rautt
teppi þar og ætla að ganga eftir því
og vera með myndina í eyrunum. Þá
er eins og ég sé á rauða dreglinum
og enginn veit hvað er í gangi.“
Fjör Ólafur með leikurunum Ben
Lloyd-Hughes, Florence Pugh,
Georgina Bevan og Scott Chambers.
„Verður varla mikið betra“
 Ólafur de Fleur frumsýnir nýjustu kvikmynd sína, Malevolent, á streymisveitunni Netflix sem nær
til 190 landa  Fyrsta Hollywood-mynd Ólafs  Hrollvekja sem var tekin upp í skoskum kastala
Í kastala Ólafur leggur þeim Imrie, Hughes og Bevan línurnar í tökum.
Ljósmyndir/Graeme Hunter
Einbeittur
Ólafur
við tökur
í Skotlandi.
66 MENNING
MORGUNBLAÐIÐ FIMMTUDAGUR 4. OKTÓBER 2018