Morgunblaðið - Sunnudagur - 09.12.2018, Side 24

24 MORGUNBLAÐIÐ SUNNUDAGUR 9.12. 2018
MATUR
Jóhanna Vigdís og maður hennar Guð-mundur Magnússon eiga fjögur börn;Guðrúnu Eddu, Hjalta Geir, Erlend og
Sigríði Theódóru. Guðrún Edda mætti með
rúmlega eins árs dóttur sína, Jóhönnu Vigdísi
Melsted, en pabbi hennar var upptekinn við
vinnu. Hjalti Geir var á leið á sundæfingu og
missti því að mestu af matarboðinu en fékk
að stelast í ísinn. Einnig voru mættir for-
eldrar Jóhönnu Vigdísar, Hjalti Geir Krist-
jánsson og Sigríður Theodóra Erlendsdóttir.
Foreldrar hennar búa í sömu götu og Jó-
hanna Vigdís og segir hún nábýlið vera sér-
lega skemmtilegt og dýrmætt fyrir þau öll.
Jóhanna Vigdís hefur gaman af því að
halda matarboð og segir það ekki þurfa að
vera flókið að hittast og borða góðan mat.
„Það má þess vegna bjóða upp á einhvern
einn rétt og meðlæti, það þarf ekki alltaf að
vera búinn að marinera eitthvað í þrjár vikur.
Það er samverustundin sem skiptir öllu máli,“
segir hún og leggur áherslu á að það eigi ekki
að flækja hlutina.
„Það er svo gott að hittast við kvöldverðar-
borðið, eftir að flestir eru búnir að vera á
fullu allan daginn, fá sér gott að borða, fara
aðeins yfir daginn og jafnvel spá í næsta
dag,“ segir Jóhanna Vigdís en henni finnst
skipta máli að geta boðið upp á einfaldan mat
sem er fljótlegt að gera á staðnum eða elda
eitthvað sem er hægt að undirbúa áður og
þarf bara að hita.
Einfaldur matur fyrir
alla daga vikunnar
Jóhanna Vigdís var einmitt að senda frá sér
matreiðslubókina Hvað er í matinn? þar sem
hún gefur uppskriftir að einföldum mat fyrir
alla daga vikunnar.
Hún segir að vel sé hægt að slá upp veislu
með einföldum mat og það sé freistandi ekki
síst í desember þegar fólki finnst gaman að
koma saman. „Með því að hafa þetta einfalt
og bjóða upp á eitthvað sem þú veist að allir
vilja þá þarf þetta hvorki að vera flókið né
dýrt.“
Henni finnst mikilvægt að búa til minn-
ingar, þar með taldar matarminningar. „Eins
og ég segi í bókinni, þetta er arðbærasta fjár-
festing sem til er, að fjárfesta í minningum.
Og ég tala nú ekki um þegar kynslóðirnar
sitja saman og miðla upplýsingum á ólíkan
hátt. Þetta er besta fjárfesting í heimi, allir
græða.“
Góð ráð gegn matarsóun
Jóhanna Vigdís kynntist Selinu Juul, danskri
baráttukonu gegn matarsóun, fyrir nokkrum
árum sem hefur veitt henni mikinn inn-
blástur. „Ég er að reyna að prédika gegn
matarsóun. Þetta er eitt af loftslagsmálunum
okkar. Við hendum svo miklum mat en við
getum lyft grettistaki ef við gerum þetta sam-
an,“ segir hún en eitt ráð sem hún gefur í
bókinni er að setja tiltekt úr ísskápnum á
vikuplanið og alltaf áður en stórinnkaup eru
gerð. Líka mælir hún með því að taka mynd
af því sem til er í ísskápnum áður en farið er í
búð.
Jóhanna Vigdís er hrifin af ítalskri matar-
gerð og endurspeglast það í matarvalinu í
boðinu sem og bókinni. „Ég er mjög hrifin af
ítalska eldhúsinu þó bókin sé íslensk og allt
fáist á Íslandi,“ segir hún og talið berst að því
að margt af þessum ítalska mat sé grunnur-
inn að íslenskum hversdagsmat eins og hann
er í dag. „Spagettí, pítsur og lasagna; þetta er
bara hversdagsmatur á íslenskum heimilum.“
Morgunblaðið/Kristinn Magnússon
Samverustundin
skiptir öllu
Stórfjölskyldan saman komin við matarborðið. Til hægri eru foreldrar Jóhönnu Vigdísar, Sigríður Theodóra Erlendsdóttir og Hjalti Geir Kristjánsson.
Jóhanna Vigdís Hjaltadóttir er upptekin á aðventunni líkt og
svo margir en hana langaði til að eyða notalegri stund með
fjölskyldunni við kvöldverðarborðið og bauð til veislu.
Inga Rún Sigurðardóttir ingarun@mbl.is
Guðmundur Magnússon, eiginmaður Jóhönnu Vigdísar.
Hjalti Geir var á leið á sundæfingu og missti því að mestu af matarboðinu en fékk að stelast í ísinn.