Skessuhorn - 10.01.2018, Blaðsíða 16

MIÐVIKUDAGUR 10. JANúAR 201816
Ferðaþjónusta hefur vaxið mjög
hratt á Vesturlandi, og landinu öllu,
undanfarin ár. Að sögn Kristjáns
Guðmundssonar, forstöðumanns
hjá Markaðsstofu Vesturlands,
fer ferðamönnum enn fjölgandi.
„Ferðaþjónustan gekk almennt vel á
Vesturlandi á síðasta ári, en það sem
engin hafði búist við var niðursveifla
sem kom frá apríl fram í miðjan júní.
Það virtist engin skýring vera á því
önnur en sú að mögulega hafa nei-
kvæðar raddir Íslendinga haft þessi
áhrif,“ segir Kristján. „Því mið-
ur eru margir sem sjá aðeins nei-
kvæðar hliðar ferðaþjónustunnar
og hafa hátt um þær skoðanir sín-
ar. Það gleymist stundum allt þetta
jákvæða sem fylgir ferðaþjónust-
unni, eins og aukin atvinna á lands-
byggðinni. Neikvæða umræðan gæti
svo spurst út til ferðaskrifstofa sem
hætta þá við ferðir hingað til lands.
Það er þó ekki vitað hvort þetta sé
nákvæmlega ástæðan fyrir þessari
niðursveiflu en það er ýmislegt sem
gæti bent til þess, eins og að afbók-
anir komu mest frá ferðaskrifstofum
en ekki frá þeim sem voru að ferðast
á eigin vegum. Þá gæti sterkt gengi
einnig haft þessi áhrif.“
Vill sjá fólk gista meira
á Vesturlandi
Ferðaþjónustufyrirtæki á Vestur-
landi eru enn að vaxa jafnt og þétt
og að sögn Kristjáns gæti það tengst
því að trú ferðaskrifstofa á Vestur-
landi hefur aukist. „Það eru fleiri
ferðaskrifstofur að koma hingað
með fólk en enn sem komið er eru
þetta meira dagsferðir þar sem fólk
gistir í Reykjavík en kemur hingað í
leit að afþreyingu og að njóta nátt-
úrunnar. Við myndum vilja sjá fólk
stoppa lengur hér og gista,“ segir
Kristján. „Við finnum líka að ferða-
menn vilja stoppa hér lengur. Við
erum með upplýsingamiðstöð hér á
Markaðsstofunni og hitti ég því oft
ferðamenn sem margir tala um að
þeir vildu hafa meiri tíma á Vestur-
landi. Hér í landshlutanum okkar er
líka að finna fjölbreytta gistiþjón-
ustu og mun hún aukast enn frekar
með hóteli í Borgarnesi og Varma-
landi. Þá hefur gistimöguleikum
einnig fjölgað á Snæfellsnesi og þá
væri gaman að sjá nýtt hótel rísa á
Akranesi einn daginn,“ bætir hann
við. Aðspurður hvaða staðir hafa
verið vinsælastir meðal ferðamanna
á Vesturlandi á nýliðnu ári segir
Kristján þá vera Snæfellsnesið sem
heild og Borgarbyggð. Akranesviti
er líka vinsæll og frá því hann var
opnaður hefur ferðamönnum fjölg-
að þar í bæjarfélaginu. Við bindum
líka miklar vonir við að uppbygging
í Leifsbúð dragi ferðamenn í aukn-
um mæli í Dalina,” segir Krist-
ján og bætir því við að ferðaþjón-
ustuaðilar á Vesturlandi hafi upp til
hópa staðið sig vel og sýnt mikinn
áhuga á að byggja upp betri þjón-
ustu fyrir ferðamenn.
Mannamót Markaðs-
stofanna framundan
Kristján segir margt spennandi vera
á döfinni í ferðaþjónustu á Vestur-
landi árið 2018. „Hjá okkur á Mark-
aðsstofunni er framundan Manna-
mót Markaðsstofanna í Reykjavík
fimmtudaginn 18. janúar. Þar er
vettvangur fyrir ferðaþjónustuað-
ila á landsbyggðinni að kynna sig
og sína starfsemi fyrir ferðaskrif-
stofum á höfuðborgarsvæðinu. Það
er orðið uppselt fyrir fyrirtæki að
skrá sig með bás en 38 ferðaþjón-
ustufyrirtæki af Vesturlandi verða á
Mannamótinu. Næst á eftir er Mid
Atlantic viðburður 27. janúar en
þá mun Markaðsstofa Vesturlands
kynna landshlutann fyrir erlendum
ferðaskrifstofum,“ segir Kristján.
Hvernig þjónustan
þróast í heimabyggð
Markaðsstofa Vesturlands hefur í
samstarfi við ferðaþjónustuaðila á
Vesturlandi undanfarin ár unnið að
verkefninu Áfangastaðaáætlun Vest-
urlands. „Þetta er stórt verkefni sem
við ætlum að vinna með áfram. Til-
gangurinn er að setja upp áætlun
um hvernig við viljum sjá ferða-
þjónustu þróast á Vesturlandi, eft-
ir svæðum. Við skiptum Vesturlandi
í fjögur svæði; Dalabyggð, Snæ-
fellsnes, Borgarbyggð og Skorra-
dal auk Hvalfjarðarsveitar og Akra-
ness. Við héldum fundi með íbú-
um og ferðaþjónustuaðilum á þess-
um svæðum fyrir jól þar sem farið
var yfir framtíðarsýn og ætlunin er
að halda fundi núna í janúar þar sem
rætt verður um hvernig við ætlum
að ná þessari framtíðarsýn. Fundur
fyrir Borgarbyggð og Skorradals-
hrepp verður þriðjudaginn 16. janú-
ar, í Dalabyggð miðvikudaginn 17.
janúar, Fyrir Akranes og Hvalfjarð-
arsveit mánudaginn 22. janúar og
fyrir Snæfellsnes þriðjudaginn 23.
janúar. Þarna gefst íbúum tækifæri
til að koma á framfæri sinni skoðun
og hvernig þeir vilja sjá ferðaþjón-
ustu þróast í sinni heimabyggð. Við
viljum alltaf að hagsmunir íbúa séu
hafðir að leiðarljósi,“ segir Kristján.
Lætur af störfum
hjá Markaðsstofu
Vesturlands
Kristján hefur unnið hjá Markaðs-
stofu Vesturlands í tæp fimm ár, eða
frá árinu 2013, en stefnir nú að nýj-
um verkefnum og hefur sagt starfi
sínu lausu. „Ég fékk spennandi til-
boð um annað starf í Húsafelli og
ákvað að þetta væri kjörið tæki-
færi til að breyta til. Ég verð hér
hjá Markaðsstofunni út febrúar og
byrja í nýju vinnunni í mars.“ Krist-
ján mun taka við sölu- og markaðs-
málum í Húsafelli. „Mér hefur lið-
ið mjög vel hjá Markaðsstofu Vest-
urlands og þetta starf hefur verið
virkilega lærdómsríkt og skemmti-
legt. Ég hef fengið að fylgjast með
ferðaþjónustunni vaxa og breytast
mikið á þessum tíma og hefur verið
alveg einstaklega gaman að taka þátt
í því. Ég hef ekki tölu um hversu
margir ferðamenn komu hingað
árið sem ég byrjaði hjá Markaðsstof-
unni, en árið á undan komu hingað
um 300.000 ferðamenn. Óstaðfestar
tölur fyrir árið 2017 segja að ferða-
menn á Vesturlandi hafi verið um
800.000 talsins í fyrra. Það hefur því
mjög margt breyst á þessum tíma,
en ég er spenntur að takast á við ný
verkefni og halda áfram að taka þátt
í þeirri þróun sem er að eiga sér stað
í ferðaþjónustu á Vesturlandi,“ segir
Kristján að endingu.
arg
„Ferðaþjónustan blómstrar á Vesturlandi“
Kristján Guðmundsson framkvæmdastjóri lítur yfir farinn veg en hann
hverfur nú til annarra starfa eftir að hafa stýrt Markaðsstofu Vesturlands
Kristján Guðmundsson, forstöðumanns hjá Markaðsstofu Vesturlands, ásamt Rósu Björk Sveinsdóttur á Mannamóti
Markaðsstofanna á síðasta ári. Næsta Mannamót verður fimmtudaginn 18. janúar næstkomandi. Ljósm. kgk.
Haustið 2015 boðaði Lonely Planet, stærsti útgefandi ferðahandbóka í heiminum, til hófs í Samgöngusafninu í Lundúnum.
Tilefnið var útgáfa handbókarinnar Best in Travel 2016, þar sem Vesturland skipaði það ár annað sæti á lista útgáfunnar
yfir eftirsóknarverðustu áfangastaði í heiminum í flokki landssvæða árið 2016. Kristján fór utan og tók við viðurkenningu
þess efnis fyrir hönd Vesturlands. Með honum á myndinni eru fulltrúar Lonely Planet. Ljósm. kgk.
Kristján og Edda Arinbjarnar í Húsafelli á Mannamóti ferðaþjónustunnar. Ljósm. kgk.
Óstaðfestar tölur fyrir árið 2017 segja að ferðamenn á Vesturlandi hafi verið um
800.000 talsins. Hér er hluti þeirra. Ljósm. mm.