Fréttablaðið - 02.05.2015, Side 16

2. maí 2015 LAUGARDAGUR| FRÉTTIR |
➜ Vangaveltur verkalýðsins
16
BARÁTTUHUGUR Það var mál manna að jafn margir hefðu ekki mætt í kröfugöngu svo árum skipti. Lögregla metur það svo að um 9.000 manns hafi mætt í gönguna. FRÉTTABLAÐIÐ/PJETUR
VERKALÝÐSDAGURINN
KJARAMÁL „Krafan er að fólk fái
borguð mannsæmandi laun fyrir
vinnu sína,“ sagði Árni Stefán
Jónsson, formaður SFR, í ræðu
sinni á verkalýðsdaginn. „En
hverju svara atvinnurekendur?
Svarið er nei! Við höfum ekki efni
á þessu. Það er ekki til peningur
fyrir alla, bara suma,“ sagði hann.
„Það er tími til kominn að almenn-
ingur á Íslandi fari að taka í taum-
ana!“
Fjöldi fólks lagði leið sína í mið-
borg Reykjavíkur í gær til að
taka þátt í kröfugöngu. Lúðra-
sveit verkalýðsins og Lúðrasveit-
in Svanur spiluðu með göngunni
og Reykjavíkurdætur sungu fyrir
samkomuna. Auk Árna Stefáns
flutti Hilmar Harðarson, formað-
ur Samiðnar, barátturæðu. Að
lokum söng hópurinn Maístjörn-
una og Internationalinn.
Lögregla telur að 8 til 9 þúsund
manns hafi mætt í kröfugöngu í
Reykjavík. Fulltrúar fjölda stétt-
arfélaga voru á staðnum og mikill
baráttuhugur virtist í fólki. - srs
Halla Þorvaldsdóttir hefur verið í
verkfalli undanfarnar vikur en hún
er í Félagi sálfræðinga. „Þetta er stór
dagur, gríðarleg þátttaka í göngunni.
Það hlýtur að endurspegla að það er
eitthvað mikið að gerast í samfé-
laginu,“ segir hún.
„Við erum búin að vera í verkföll-
um í nokkrar vikur án þess að nokk-
urt útspil komi frá ríkinu. Það finnst
okkur gríðarlega alvarlegt mál.“
Jón Svavarsson, vaktstjóri hjá
Strætó, er ekki mjög bjartsýnn hvað
stöðu mála varðar en kjarasamningar
hans stéttarfélags urðu lausir í gær.
„Staðan er ekkert jákvæð í augna-
blikinu þegar allt stendur stál í stál,“
segir hann. „Það eru margar stéttir
sem hafa dregist aftur úr og tekið á
sig byrðar sem þarf að skila til baka.
Því miður er ekkert annað gert hjá
þessari ríkisstjórn en að gera hina
ríku ríkari og hina fátæku fátækari.“
Halla Halldórsdóttir og Þórarinn
Snorri Sigurgeirsson voru að syngja
Internationalinn hástöfum þegar
blaðamaður spurði þau út í stöðu
mála.
„Ástandið í þjóðfélaginu er ein-
hvern veginn hrikalegra en nokkru
sinni áður hvað vinnumarkaðinn
varðar. En maður getur verið bjart-
sýnn þar sem maður finnur að það
er einhver samtakamáttur að fæðast
aftur,“ segir Þórarinn.
„Ég vil alltaf vera svolítið bjartsýn
þó að stjórnin sé eins og hún er,
greyin,“ segir Halla. „En ég vona að
þjóðin læri eitthvað af þessu og kjósi
eitthvað annað næst.“
„Það er ekki nóg að vera bara
bjartsýnn. það þarf að berjast fyrir
betri kjörum,“ segir Þórarinn. - srs
Fram þjáðir menn í þúsund löndum