Bændablaðið - 15.11.2018, Blaðsíða 7

Bændablaðið | Fimmtudagur 15. nóvember 2018 7
LÍF&STARF
F yrr en fram er haldið þessum vísnaþætti þarf að gjöra einni minni kórvillu skil. Í síðasta þætti skráði ég sr. Sigurjón brott
frá Kirkjubæ árið 1965. Máni sonur hans
vissi villu mína. Þaðan fór sr. Sigurjón árið
1956. Afar farsælar eru nú orðnar lyktir
þeirrar fyrirspurnar sem ég gerði um tilvist
vísunnar „Frjálst er í Flókadal, o.s.frv“.
Einn dyggur liðsmaður vísnaþáttarins er
Ingólfur Ómar Ármannsson. Næstu vísur
hans eru ungar oddhendur/ hringhendur
frá þessu hausti og tengdar vetrarkomu:
Lyndi brátt er leikið grátt,
lamast máttur slyngur.
Kári dátt í dyragátt
dæsir hátt og syngur.
Vetur færir klakaklær,
krenkir snærinn hjalla.
Norðanblærinn napur hlær,
nístir tær og skalla.
Heyrast sköll og fellur fjúk,
freðinn völl má líta.
Hamrafjöllin fannadúk
faldar mjöllin hvíta.
En einn er sá er af öðrum ber þegar kemur
að kvaki mínu og bænarefnum eftir nýjum
kveðskap. Davíð Hjálmar Haraldsson á
Akureyri þarf ekki að kynna lesendum.
Davíð átti efni síðasta þáttar hólmalaust.
Varla var sá þáttur kominn í dreifingu þegar
kærkomið netbréf barst mér frá Davíð. Að
vísu getur Davíð þess, að eðlislæg gjörð
hans lúti jafnan að því að gera þeim gott
sem góla eftir hjálp. Þar vísar hann til þess,
að tíðum biðla ég til velunnara þáttarins
um nýtt vísnaefni. Fleira gæti honum þó
gengið til. Hér eftir fer glænýr kveðskapur
frá Davíð ásamt aðfararorðum hans. Flest
vísnabréf mín til þessa falla í skugga þess
kveðskapar er hér fer eftir:
„ Þú kvartar stumdum undan skorti á
nýmeti. Þar sem ég má aldrei aumt sjá án
þess að reyna að bæta úr því, þá er hér
glænýtt ljóð. Þú mátt nota það í blaðið
þegar skyrbjúgurinn ætlar að ganga frá
þér. Bestu kveðjur, DHH“. Ljóðið nefnir
Davíð „ Bjargvættur í sveitum“.
Hér er lítið ljóð um það
sem lesandinn þó veit um:
Alltaf verður Bændablað
bjargvættur í sveitum.
Margir kvillar manninn hrjá:
Mjólkuróþol, hósti,
vænisýki, vagl á brá,
verkur fyrir brjósti,
innantökur, undirbit,
elli, sinadráttur,
ofát svimi, æðaslit
og undirlægjuháttur.
Skaði er að skít í kverk,
skilningsleysi, heimsku,
hægðastíflu, höfuðverk,
hlandsperringi, gleymsku,
andarteppu, yfirvigt,
æðahnútum, skalla,
fótaóeirð, frekju, gigt
og fjölda útlitsgalla.
En þó að bjáti eitthvað á
má alltaf sækja lækni
og þeir sem meiðast mikið spá
í mannviðgerðartækni.
Því bregður ýmsum ekki hót
þótt ærinn virðist skaðinn;
bóndi missti fullur fót
en fékk sér tvo í staðinn.
Annar bóndi drekkur dramm
við drullupest- í leyni-
þá er „ Mælt af munni fram“
mjúkt og gott í skeini.
Hérna lýkur ljóði um það
sem lesandinn þó veit um:
Alltaf verður Bændablað
bjargvættur í sveitum.
Umsjón:
Árni Geirhjörtur Jónsson
kotabyggð1@gmail.com
MÆLT AF
MUNNI FRAM
Hestamannafélagið Léttir á Akureyri:
Glæsileg 90 ára afmælishátíð
„Afmælishátíðin var glæsileg í alla staði og
óhætt að segja að afmælisbarninu farnist
vel. Það leggur nú til móts við tíunda
áratuginn fullt af bjartsýni og um leið stolt
af fortíðinni,“ segir Sigfús Ólafur Helgason,
framkvæmdastjóri Hestamannafélagsins
Léttis á Akureyri, sem fagnaði 90 ára afmæli
sínu með glæsibrag í byrjun mánaðar.
Afmælishátíðin hófst með mikilli sýningu
á gömlum munum og hestamyndum í
eigu félagsmanna. Vegleg verðlaunasöfn
valinkunnra Léttisfélaga voru einnig til sýnis
og alla afmælishelgina rúllaði kvikmynd sem
tekin var í tilefni þess að félagsmenn fóru fræga
ferð í Grímsey árið 1996 og efndi til kappreiða
á flugbrautinni í eynni. Myndin þykir merkileg
heimild og segir Sigfús gaman ef hægt væri
að koma henni fyrir almenningssjónir einn
góðan veðurdag.
Gestum var boðið upp á gómsætar veitingar
en borð í reiðhöll félagsins svignuðu undan
kræsingum
Uppskeruhátíð fyrir börn og unglinga
Mikil gleði ríkti á afmælis- og uppskeruhátíð
sem efnt var til fyrir börn og unglinga. Þar
voru valdir knapar í þeim aldursflokkum en
afreksknapi unglinga þriðja árið í röð var
valinn Egill Már Þórsson og í barnaflokki varð
hlutskarpastur annað árið í röð Steindór Óli
Tobíasson. Þá var stór stund þegar undirrituð
var viljayfirlýsing nokkurra fyrirtækja um
stuðning við mótahald æskunnar hjá Létti
árið 2019.
Mikill hátíðleiki var yfir og allt um kring
þegar Léttisfélagar mættu í sínu fínasta pússi
í reiðhöllina og troðfylltu Skeifuna, sal á efri
hæð hallarinnar. Þar var stórfín dagskrá allt
kvöldið, m.a. kom fram Drengjakór Léttis
þar sem meðalaldurinn var 55 ár og þandi
kórinn raddböndin svo allt ætlaði að ærast.
Söngdívurnar í Jódísi heilluðu viðstadda einnig
með góðum söng. Hinn kunni Skagfirðingur
Óskar Pétursson, sem Eyfirðingar reyna af
fremsta megni að eigna sér ofurlítinn hlut í,
stjórnaði hátíðinni af alkunnri snilld og kitlaði
hláturtaugar Léttismanna.
Fjölmargir heiðraðir
fyrir störf sín í þágu félagsins
Í tilefni afmælisins voru nokkrir
félagar heiðraðir. Arna Hrafnsdóttir,
Ingólfur Sigþórsson, Þórir Tryggvason,
Haukur Sigfússon og Matthías Jónsson
hlutu silfurmerki Léttis fyrir störf
sín í þágu félagsins, auk þess sem
þær Alda Skarphéðinsdóttir, Elísabet
Skarphéðinsdóttir, Hólmfríður Hreinsdóttir,
Júlía Sjöfn Sigurjónsdóttir og Hjördís
Bjarkadóttir hlutu einnig silfurmerki en
þær höfðu verið í forystusveit kvennadeildar
Léttis á sínum tíma.
Fimm voru sæmdir gullmerki Léttis,
þau Áslaug Kristjánsdóttir, hjónin Haraldur
Höskuldsson og Sigrún Aðalsteinsdóttir, Páll
Alfreðsson og Örn Viðar Birgisson. /MÞÞ
Formaður Léttis og framkvæmdastjóri þess, þeir Björn J. Jónsson og Sigfús Ólafur Helgason,
eru báðir heiðurfélagar Hestamannafélagsins.
Silfurmerkishafar, frá vinstri eru Þórir Tryggvason, Ragnar Ingólfsson, sem tók við merki Ingólfs
Sigþórssonar, Matthías Jónsson, Haukur Sigfússon, Arna Hrafnsdóttir og Björn J. Jónsson,
formaður Léttis.
Þær Júlía Sjöfn Sigurjónsdóttir, Hólmfríður Hreinsdóttir, Hjördís Bjarkadóttir, Elísabet Skarphéðinsdóttir og Alda Skarphéðinsdóttir voru í
forystusveit kvennadeildar á sínum tíma. Þær voru sæmdar silfurmerki. Með þeim á myndinni er Björn Jónsson, formaður Léttis.
Sérstök veisla og uppskeruhátíð var fyrir börn
og ungmenni, hér eru frá vinstri Steindór Óli
og Egill Már Þórsson, afreksknapi Léttis 2018
Gullmerki Léttis afhent. Frá vinstri er Björn J. Jónsson, formaður Léttis, og þá koma þau
Örn Viðar Birgisson, Karítas Thoroddsen, sem tók við gullmerki Páls Alfreðssonar, Sigrún
Aðalsteinsdóttir, Haraldur Höskuldsson og Áslaug Kristjánsdóttir.
Nýir heiðursfélagar Léttis, frá vinstri eru Björn J. Jónsson, formaður Léttis, Sigfús Ólafur
Helgason, Ragnar Ingólfsson, Jón Björn Arason, Hólmgeir Valdemarsson og Garðar Lárusson.