Bændablaðið - 14.03.2019, Blaðsíða 33

Bændablaðið | Fimmtudagur 14. mars 2019 33
Um er að ræða frábærar fjölnotavélar með
1200 kg lyftigetu og möguleika á ýmsum
aukahlutum.
Á MultiOne 6.3 SD situr stjórnandi í aftari
hluta þessara lipru og sveigjanlegu véla.
Vélarnar afhendast með skóflu, 184 kg
aukaballest að aftan og taðgreip.
Hafðu samband við Ívar Atla í síma 590 5116
eða sendu línu á iab@klettur.is og kynntu
þér þína möguleika.
KLETTUR / SALA OG ÞJÓNUSTA / KLETTAGARÐAR 8-10 / 104 REYKJAVÍK / 590 5100 / klettur.is
Eigum á lager
MultiOne 6.3 SD
liðléttinga
sveitarfélög í fremstu röð hvað
varðar sorpflokkun á upprunastað.
Það má kannski geta þess að
Bláskógabyggð er í samstarfi með
nokkrum nágrannasveitarfélögum
varðandi verkun á seyru úr rotþróm,
en það er mjög flott verkefni og
umhverfisvænt.“
Ekki stemning fyrir sameiningu
Bláskógabyggð er sameinað
sveitarfélag, sem varð til árið
2002 við sameiningu þriggja
sveitarfélaga í eitt, það voru
Biskupstungnahreppur, Laugardals­
hreppur og Þingvallasveit.
Ásta segir ekki mikla umræðu um
sameiningarmál og reiknar ekki með
að það verði miklar sameiningar
sveitarfélaga í Árnessýslu á allra
næstu árum.
„Það var farið í heilmikla vinnu
2017–2018 við að skoða kosti og
galla þess að sameina alla sýsluna í
eitt sveitarfélag, en mér finnst eins og
andrúmsloftið eftir síðustu kosningar
sé þannig að það sé ekki líklegt að
það verði einhver sameiningarhrina.
Rétt er þó að hafa í huga að ráðherra
sveitarstjórnarmála hefur lagt
áherslu á sameiningar og innan
tíðar verða kynntar tillögur sem
hafa fengið umfjöllun Jöfnunarsjóðs
sveitarfélaga varðandi framlög til
sveitarfélaga sem geta virkað sem
hvatning til sameiningar í ákveðum
tilvikum,“ segir Ásta.
Ungmenna- og tómstundabúðir á
Laugarvatni
Laugarvatn er eitt af þorpunum
í Bláskógabyggð þar sem alltaf
eitthvað nýtt er að gerast, Ásta er
stolt af því verkefni. „Já, það er
mjög áhugavert verkefni að fara af
stað í húsinu sem áður hýsti gömlu
heimavist íþróttakennaraskólans,
en þar mun UMFÍ opna
ungmenna­ og tómstundabúðir
næsta haust. Sveitarfélagið leigir
UMFÍ húsið og er nú verið að
vinna á fullu við endurbætur á
því til að geta tekið við um 80
grunnskólabörnum í viku hverri
næsta vetur. Með þessu verður líka
betri nýting á íþróttamannvirkjum
Bláskógabyggðar á Laugarvatni
og vonandi skapast tækifæri til að
nýta húsakynnin um helgar, t.d.
fyrir æfingabúðir íþróttafélaga.“
Þá má geta þess að nýlega var líka
sett á stofn rannsóknarsetur um
sveitarstjórnarmál á Laugarvatni
en það er samstarfsverkefni
Háskóla Íslands og samgöngu­
og sveitarstjórnarráðuneytisins,
auk þess sem þar er aðsetur
Rannsóknarseturs Háskóla
Íslands á Suðurlandi, sem hefur
rannsóknir á landnotkunarmálum
að meginviðfangsefni.
„Það skiptir miklu máli að hafa
þessa starfsemi og vonandi getur
byggst meira upp í kringum þetta.
Það er líka svolítið um það að
sjálfstætt starfandi sérfræðingar nýti
skrifstofuaðstöðu hjá Háskólanum og
eykur það enn frekar fjölbreytnina,“
segir Ásta.
Ferðamönnum fækkar ekki
Ferðaþjónusta er Bláskógabyggð
mjög mikilvæg enda er sveitarfélagið
með fjölmennustu ferðamannastaði
landsins hjá sér eins og Gullfoss,
Geysi, Þingvelli, Skálholt, Friðheima
og fleiri staði. Hvernig er staðan í
greininni að mati Ástu?
„Ég held að þó svo að það kunni
að draga úr fjölgun ferðamanna,
eða þeim fækka eitthvað, þá verði
þetta svæði áfram eitt af þeim sem
flestir ferðamenn sækja heim. Hér
á svæðinu virðist ekki vera fækkun
ferðamanna í janúar í ár miðað við
janúar í fyrra. Ferðaþjónustan er
mjög mikilvæg fyrir samfélagið
hérna, bein og afleidd störf eru
gríðarlega mörg. Íbúar eru yfirleitt
sáttir við ferðamannastrauminn, þeir
vita að ferðaþjónustan hefur mikil
áhrif á atvinnulífið. Það er helst
að þessi gífurlega mikla aukning á
umferð á vegunum hérna valdi fólki
áhyggjum.“
Margar einbreiðar brýr
Á síðasta ári var gert heilmikið átak
í að laga vegi sem voru algerlega að
niðurlotum komnir í Bláskógabyggð.
Á næstunni hefjast svo framkvæmdir
við Reykjaveginn, sem er mikilvæg
samgönguæð, sem tengir byggðirnar
í uppsveitunum.
„Við fögnum þessu, en það
er svo margt annað sem þarf að
laga. Það eru til dæmis margar
einbreiðar brýr í sveitarfélaginu, og
sú umferðarmesta á landsvísu eru
á Tungufljóti á milli Gullfoss og
Geysis. Það væri ekki mikill vandi
að eyða einhverjum milljörðum í
vegabætur hér í uppsveitunum.“
Vilja ekki þjóðgarð á
miðhálendinu
Nú berst tal okkar Ástu að
hugmyndum um þjóðgarð á
miðhálendinu, sem hafa verið
kynntar, þar kæmi Bláskógabyggð að
málum. Hvernig líst henni og íbúum
sveitarfélagsins á hugmyndina?
„Það verður að segjast eins og
er að við erum ekki mjög hrifin af
þessum áformum. Bændur hér um
slóðir hafa lagt mikinn metnað í að
huga vel að afréttinum sínum. Þeir
hafa t.d. unnið að uppgræðslu um
árabil, kortlagt og merkt reiðleiðir,
allt í sjálfboðavinnu, og óttast það
að miðstýring „að sunnan“ verði
ekki til góðs fyrir svæðið. Það
hefur líka ekki verið að öllu leyti
góð reynsla af fyrirkomulaginu
í Vatnajökulsþjóðgarði og ekki
fýsilegt að taka það upp fyrir svona
gríðarlega stórt svæði, allt að 40%
af flatarmáli Íslands, ef hugmyndir
ná fram að ganga.“
Sveitastelpa alin upp í sveit
Ásta er alin upp í sveit því foreldrar
hennar búa á Vestri­Grund, rétt
austan við Stokkseyri, og þar bjuggu
líka föðurforeldrar hennar en þau
voru með blandaðan búskap, en nú
er þar sauðfjárbúskapur.
„Móðurforeldrar mínir bjuggu á
Löngumýri á Skeiðum og þangað
var ég sveitastelpan send í sveit,
þar var líka blandaður búskapur
og útiræktun, ræktað grænmeti og
sumarblóm. Afi keypti garðyrkjustöð
við Selfoss þegar ég var tæpra 10
ára, og ég hætti þá að fara í sveit
að Löngumýri, en vann hjá honum
á sumrin og í páskafríum,“ rifjar
Ásta upp. Hún segist vera búin að
hitta marga bændur í nýja starfinu
og á eftir að hitta fleiri, það sé
mikilvægt fyrir samfélag eins og í
Bláskógabyggð að landbúnaðurinn
sé öflugur.
„Svo er það líka mikilvægt fyrir
okkur öll sem búum í þessu landi
að hér séu framleiddar heilnæmar
landbúnaðarvörur,“ segir hún.
Fullt af tækifærum fram undan
Að lokum er Ásta spurð hvernig
sumarið leggist í hana og íbúa
Bláskógabyggðar?
„ Við erum mjög bjartsýn, sjáum
fullt af tækifærum fram undan. Eitt
af því sem er á döfinni í sumar er
að hefja lagningu á ljósleiðara.
Við erum reyndar með mörg
verkefni á framkvæmdaáætlun
hjá sveitarfélaginu, til dæmis er
fram undan talsverð fjárfesting
hjá öllum veitum sveitarfélagsins,
auk gatnagerðar sem áður er getið
og leikskólabyggingarinnar. Við
munum líka fara í talsvert átak í
frágangi göngustíga og sinna viðhaldi
fasteigna. Áætluð nettófjárfesting í
innviðum sveitarfélagsins á árinu
2019 er fyrir um 488 milljónir
króna, sem gerir um 437 þúsund á
íbúa. Það er mun hærra en í nokkru
sveitarfélagi í Árnessýslu, flest eru
með fjárfestingar fyrir um 115–195
þúsund á íbúa, nema Árborg sem
áætlar að fjárfesta fyrir um 240
þúsund á íbúa, sem er þó nærri
tvöfalt lægra en Bláskógabyggð.
Það verður því í nógu að snúast hjá
okkur.“ /MHH
„Tvær úr tungunum“ er skemmtileg sveitahátíð sem haldin er í Bláskógabyggð
á hverju sumri. Hér er Helgi Kjartansson, núverandi oddviti, að reyna sig í
mjólkurbrúsaþraut 25. ágúst 2012.
Fimmtudaginn 7. mars síðastliðinn var stór stund á Laugarvatni en þá
skrifuðu oddviti Bláskógabyggðar, Helgi Kjartansson (t.v.) og Haukur
Valtýsson, formaður Ungmennafélags Íslands, undir 10 ára samning um
starfsemi ungmenna og tómstundabúða UMFÍ á Laugarvatni. Búðirnar voru
áður á Laugum í Sælingsdal í 14 ár en samningurinn var útrunninn og ákvað
UMFÍ að færa starfsemina á Laugarvatn.