Morgunblaðið - 14.10.2020, Síða 11

FRÉTTIR 11Erlent
MORGUNBLAÐIÐ MIÐVIKUDAGUR 14. OKTÓBER 2020
Stefán Gunnar Sveinsson
sgs@mbl.is
Bandaríkjamenn og Þjóðverjar
hvöttu í gær tyrknesk stjórnvöld til
þess að kalla til baka rannsóknaskip
sitt Oruc Reis, sem hélt úr höfn á
sunnudaginn til að kanna olíu- og
jarðgasauðlindir á hafsbotni í aust-
urhluta Miðjarðarhafsins.
Í tilkynningu bandaríska utanrík-
isráðuneytisins sagði að Bandaríkja-
stjórn fordæmdi ákvörðun Tyrkja,
þar sem Grikkir gerðu tilkall til
þeirra svæða sem skipið hygðist
sigla um. „Við skorum á Tyrkland að
binda enda á þessa úthugsuðu ögrun
og hefja könnunarviðræður við
Grikkland þegar í stað,“ sagði í til-
kynningunni. Þá sagði einnig að
þvinganir, hótanir og hernaðarbrölt
myndu ekki draga úr þeirri spennu
sem nú ríkti á austanverðu Miðjarð-
arhafi.
Munu ekki hefja viðræður
Grísk stjórnvöld fordæmdu þegar
um helgina ákvörðun tyrkneskra
stjórnvalda, og ítrekuðu í yfirlýsingu
í gær að engar viðræður myndu fara
fram fyrr en skipið hefði snúið aftur
til Tyrklands ásamt þeim herskipum
sem fylgdu því. George Gerapetritis,
utanríkisráðherra Grikklands, sagði
að Grikkir myndu enn fremur taka
málið upp á leiðtogafundi Evrópu-
sambandsins, sem á að hefjast á
morgun.
Lýsir yfir samstöðu ESB
Heiko Maas, utanríkisráðherra
Þýskalands, hugðist heimsækja
bæði Grikkland og Kýpur í gær
vegna málsins. Sagði hann að Tyrkir
yrðu að láta af ögrandi hegðun sinni
ef þeir vildu að viðræður færu fram,
en þýsk stjórnvöld hafa boðist til
þess að vera með milligöngu í þeim.
Ítrekaði Maas að Grikkland og
Kýpur nytu óskoraðrar samstöðu
Þýskalands og Evrópusambandsins.
Samskipti Evrópusambandsins og
Tyrkja hafa verið til umræðu þar að
undanförnu, og er spennan á milli
Grikkja og Tyrkja einungis eitt af
nokkrum málum, sem valdið hafa
áhyggjum meðal forsvarsmanna
Evrópusambandsins, en afskipti
Tyrkja af deilum Armena og Asera
hafa einnig þótt umdeild, sem og
hernaðaríhlutun Tyrkja í Sýrlandi
og Líbíu.
AFP
Spenna Rannsóknaskipið Oruc Reis sést hér í tyrkneskri höfn í ágúst.
Vara Tyrki við ögrunum
 Bandaríkjamenn og Þjóðverjar hvetja tyrknesk stjórnvöld til að kalla rann-
sóknaskip sitt til baka  Grikkir hyggjast taka málið upp á leiðtogafundi ESB
Alríkisdómarinn Amy Coney Bar-
rett sagði við meðlimi dómsmála-
nefndar öldungadeildar Banda-
ríkjaþings í gær að hún myndi setja
persónulegar og trúarlegar skoð-
anir sínar til hliðar þegar hún
dæmdi í fordæmisgefandi málum,
verði hún skipuð í Hæstarétt
Bandaríkjanna. Barrett sagði þó
ekki hvernig hún myndi dæma ef
málefni eins og fóstureyðingar
kæmu til kasta réttarins.
Barrett var í gær spurð út í skoð-
anir sínar á hinum ýmsu málefnum
sem varðað gætu hæfi hennar til
þess að sitja sem dómari í Hæsta-
rétti, en Barrett hafnaði því alfarið
að hún væri með einhvers konar
stefnuskrá sem hún myndi fylgja ef
öldungadeildin samþykkir skipan
hennar. Þá neitaði Barrett að svara
því hvort hún myndi segja sig frá
málum sem myndu snúa að fram-
kvæmd forsetakosninganna í haust.
„Ég hef ekki lofað neinum neinu,
hvorki í öldungadeildinni né í Hvíta
húsinu, um hvernig ég myndi dæma
í nokkru máli,“ sagði Barrett.
BANDARÍKIN
AFP
Hæstiréttur Barrett svaraði spurn-
ingum þingmanna nefndarinnar í gær.
Segist setja skoð-
anir sínar til hliðar
Bandaríska lyfjafyrirtækið John-
son & Johnson tilkynnti í gær að
það hefði sett prófanir á bóluefni
sínu gegn kórónuveirunni í bið-
stöðu á meðan veikindi eins þátt-
takandans væru könnuð. Mun óháð-
ur aðili fara yfir einkenni hans og
reyna að skera úr um hvort þau
tengdust bóluefninu.
Fyrr í haust varð að gera tíma-
bundið hlé á prófunum Oxford-
háskóla á sínu bóluefni, en þær hóf-
ust svo aftur að lokinni rannsókn.
BANDARÍKIN
Prófanir settar á
ís vegna veikinda
Enn var barist í Nagornó-Karabak-
héraði í gær, þrátt fyrir ítrekuð
áköll helstu stórvelda heims um að
stjórnvöld í Armeníu og Aserbaíd-
sjan myndu virða vopnahléssam-
komulag sem þau undirrituðu um
helgina. Samkvæmt staðfestum töl-
um hafa nærri 600 manns nú fallið í
átökunum, þar af 73 óbreyttir
borgarar, en Rauði krossinn varaði
við því í gær að átökin hefðu nú
þegar haft áhrif á hundruð þús-
unda manna, og að heilbrigðisþjón-
usta í héraðinu væri nú á fallanda
fæti.
Mike Pompeo, utanríkisráðherra
Bandaríkjanna, kallaði í gær eftir
því að báðar þjóðir myndu virða
samkomulagið, en því var ætlað að
gefa þeim tækifæri til þess að
skiptast á föngum og sækja lík.
Skoraði Pompeo jafnframt á báða
aðila að hætta að skjóta á svæði
þar sem óbreyttir borgarar hefðust
við.
Þá sendu fulltrúar Frakklands,
Rússlands og Bandaríkjanna í
Minsk-hópnum svonefnda frá sér
yfirlýsingu þar sem Ilham Aliyev,
forseti Aserbaídsjan, og Nikol
Pashinyan, forsætisráðherra Arme-
níu, voru hvattir til þess að virða
vopnahléið þegar í stað. Sagði í yf-
irlýsingu hópsins að afleiðingarnar
gætu annars orðið geigvænlegar.
Mannfall meðal
vígamannanna
Spurningar hafa vaknað um þátt
Tyrkja í átökunum, en þeir hafa
meðal annars verið sakaðir um að
hafa greitt leið sýrlenskra víga-
manna til átakasvæðanna til stuðn-
ings stjórnvöldum í Aserbaídsjan.
Bresku mannréttindasamtökin
Syrian Observatory for Human
Rights áætlar að um 1.450 slíkir
hafi farið til Aserbaídsjan, þar af
250 í þessari viku. Þá eru 119
þeirra sagðir hafa fallið í átökun-
um, en 78 lík hafa verið send aftur
til Sýrlands.
Enn barist þrátt fyrir vopnahlé
 Pompeo hvetur Armena og Asera til
að virða samkomulag helgarinnar
AFP
Í skjóli Þessar konur í borginni Ter-
ter í Aserbaídsjan leituðu skjóls
undan sprengjuregni í kjallara.
WWW.LIFSTYKKJABUDIN.IS
Sláum nýjan
tón í Hörpu
Við óskum bæði eftir áhugasömum
rekstraraðilum og hugmyndum
einstaklinga að skemmtilegum
nýjungum á neðri hæðum í Hörpu
Nánar á harpa.is/nyr-tonn
.
ÞÚ FINNUR ALLT Á FINNA.IS
VEISTU
UM GÓÐAN
RAFVIRKJA?