Tölvumál - 01.01.2018, Side 29

29
Eins og margir vita þá á Skýrslutæknifélagið, ský,
50 ára afmæli í ár. Á 50 árum hefur margt breyst
í tengslum við útgáfu á Tölvumálum, tímariti
félagsins, sem hefur verið gefið út frá árinu 1976.
Í upphafi var tímaritið kallað félagsbréf og var um
ein síða með áherslu á fundarboð og tilkynningum
til félagsmanna. Útlit og innihald hefur þróast í
takt við tímann og er blaðið í dag tæpar 50 síður,
prentað í lit í um 1000 eintökum og dreift til
félagsmanna. Einnig eru birtir vikulegir pistlar á
www.sky.is á vegum ritnefndar Tölvumála.
Grétar Snær Hjartarson, fyrrverandi starfs-
mannastjóri hjá Skýrr, er einn af frumkvöðlunum
sem komu að útgáfu blaðsins á upphafsdögum
þess og því langaði okkur að heyra frá honum,
bæði um fyrstu árin en einnig framtíðina.
HVER VAR KVEIKJAN AÐ
ÚTGÁFU BLAÐSINS?
Kveikjan að útgáfu blaðsins var hjá Óttari
Kjartanssyni, sem þá var deildarstjóri vinnsludeildar hjá Skýrr. Skrifstofan
hans var innst á norðurganginum á neðri hæð (nú neðsta hæð) en næst
henni var skrifstofan mín. Óttar var ritari stjórnar Skýrslutæknifélagsins.
Einhverju sinni átti ég erindi við Óttar og í framhaldi af því tókum við tal
saman, enda fundur í skýrslutæknifélaginu framundan. Fundarboðið var
á einni A5 síðu og aðeins getið fundarefnis og framsögumanns.
Óttari fannst þetta ekki gefa nógu góða raun enda fundarsókn ekki mikil.
Hann vildi reyna að auka fundarsóknina með einhverju átaki og helst
með því að gefa út einskonar fréttabréf með nánari lýsingu fundarefnis
og skrifum um málefni félagsins, tölvuvinnslu og fleira. „Áttu við að ritað
verði eitthvað um tölvumál í þessu blaði“ – „Tölvumál“ – sagði Óttar
„þarna nefndirðu það, Tölvumál skal blaðið heita“ – og þar með var
teningunum kastað.
Fyrsta aðkoma mín að blaðinu, sem var bara A4 blað prentað báðum
megin, var að teikna blaðhausinn, sem mig minnir að hafi verið í ljósbláum
lit. Síðar var breytt um svip og ég teiknaði næsta blaðhaus. Þá var blaðið
komið í A5 brot, prentað á hvítan pappír en kápan í gulleitum lit og
sennilega 150 gramma pappír ef ég man rétt.
Í fyrstu ritnefnd vorum við Óttar og Oddur Benediktsson, þá starfsmaður
reiknistofu Háskóla Íslands. Forstöðumaður reiknistofunnar og síðar
forstjóri Skýrr var einmitt Jón Þór Þórhallsson, frummælandinn á fundnum
sem verið var að kynna í þessu fyrsta eintaki Tölvumála.
HVERJAR VORU ÁHERSLUNNAR Í
UPPHAFI?
Þegar fyrsta eintakið af Tölvumálum fór af stað var svo sem ekki vitað
hverjar viðtökurnar mundu verða og því að nokkru rennt blint í sjóinn.
En blaðið fékk fljótlega góð viðbrögð félagsmanna svo vonir glæddust
þá strax um að þarna væri kominn vísir að þarfri útgáfu blaðs um málefni
líðandi stundar og nánustu framtíðar.
TÖLVUMÁL ÞÁ OG NÚ
Viðtal við Grétar Snæ Hjartason
Viðtalið tók Ásrún Matthíasdóttir
Áherslurnar í upphafi voru fyrst og fremst
kynning á því sem hæst bar í tölvutækninni,
nýjungar, framfarir og nýjar uppgötvanir.
Umræður um framgang tölvuvinnslu á Íslandi.
Frásagnir og skrif um tæknileg mál varðandi
tölvuvinnslu og hugleiðingar um framtíð
tölvuvinnslu á Íslandi og almennt í heiminum.
Efnistök, fyrir hverja var blaðið hugsað og hvernig
gekk að fá efni í blaðið?
Blaðið var vettvangur allra þeirra sem unnu að
tölvumálum, tæknimenn og almennir starfsmenn
fyrirtækja í tölvuvinnslu. Blaðið var síður en svo
gefið út vegna einhverrar skipunar „að ofan“ en
yfirmenn gátu, eins og almennir starfsmenn, haft
sín áhrif og komið með tillögur að efnistökum. Það
var samt stjórn Skýrslutæknifélagsins og ritnefnd
blaðsins sem sáu fyrst og fremst um útgáfu
blaðsins og öflun efnis.
Blaðið varð fljótlega vinsæll vettvangur umræðna og skoðana skipta,
aðsendar greinar fóru að berast blaðinu jafnframt tillögum félagsmanna
um ákveðið efni í blaðið og tillögur að fundarefni á fundum
Skýrslutæknifélagsins.
Það gekk vel að afla efnis í blaðið og ágætlega gekk að fá greinar í það
þó í fyrstu hafi ritnefndin þurft að leita meira til manna um greinaskrif.
Vissulega kom eitt og annað frá ritnefndinni en hún þurfti ekki mikið að
aðhafast í þeim efnum
HVERNIG STEMMINGIN VAR Á ÞESSUM
TÍMA?
Stemmingin var góð á þessum tíma enda tölvuvinnsla frekar ung þá og
yfir henni var viss sjarmi og nánast dulúð. Þrátt fyrir þessa ungu grein
leið langur tími þar til kennsla í tölvunarfærði var tekin upp í Háskóla
Íslanda. Einhver námskeið voru samt í gangi um forritun og mig minnir
að bæði Reynir Hugason og Oddur Benediktsson hafi gefið út
kennslubækur, en nokkuð takmarkaðar miðað við síðari tíma.
ÓRAÐI YKKUR FYRIR AÐ BLAÐIÐ SEM KOM
FYRST ÚT 1976 VÆRI ENN AÐ KOMA ÚT Í
MUN STÆRRA UPPLAGI OG BLAÐSÍÐUM
NÚNA 2018?
Okkur, sem fórum af stað þennan einblöðung í nóvember 1976, óraði
ekki fyrir því að blaðið mundi stækka svo mikið sem raunin var á. Við
gerðum okkur samt vonir um að það gæti orðið svo sem fjórar A4 síður
og átt síst von á að blaðið næði þeirri útbeiðslu sem orðin er.
Núna er því sýn mín á framtíð Tölvumála jákvæð og er ég handviss um
að blaðið er komið til að vera um ókomin ár. Það er mér því ánægjuefni
að blaðið sem ég átti þátt í að gefa út 1976 skuli enn lifa. Það er hinsvegar
Óttar Kjartansson sem á allan heiðurinn af því að blaðið var gefið út, hans
var hugmyndin. Hann vildi með því reyna að efla starf Skýrslutæknifélagsins
og skapa umræðuvettvang um tölvumálefni og kynningu á tækninýjungum.