Strandapósturinn - 01.06.2018, Blaðsíða 123

121
Lýður Benediktsson
frá Kirkjubóli
Mannabeina-
fundir
á Kirkjubóli
Talið er að á Kirkjubóli í Kirkjubólshreppi hafi verið svonefnd
hálfkirkja að kaþólskum sið fram til 1570. Eðlilegt er því að hér
hafi verið kirkjugarður. Það mun hafa verið árið 1920 eða 1921 að
faðir minn, Benedikt Grímsson, lét grafa gryfju á Kirkjubóli sem
átti að nota fyrir súrheysgryfju en þegar búið var að grafa hana
fannst honum hún vera of lítil og ætlaði að breikka hana aðeins
en þá koma úr moldinni þrjár mannshöfuðkúpur. Þarna hefur því
verið grafið of nærri gamla grafreitnum.
Það sem vakti sérstaka athygli manna var að ein höfuðkúpan
var gríðarlega stór. Þennan dag þingaði sýslumaður Strandasýslu,
Halldór Júlíusson, á Kirkjubóli, svo margir sáu kúpurnar. Það
vakti undrun þeirra sem sáu stóru höfuðkúpuna hversu stór hún
var og sem dæmi um það þá setti Jón Magnússon, sem þá bjó á
Kirkjubóli og síðar í Skálholtsvík, kjálkana stóru utan yfir sína
kjálka og þrengdi hvergi að. Var Jón þó ekki smáleitur í andliti.
Það hefði verið fróðlegt að láta rannsaka bein þessa stóra manns
en í þá daga var ekkert hugsað um slíkt og voru beinin sett aftur
á sinn stað og var síðan mokað ofan í gryfjuna aftur því ekki þótti
við hæfi að verka súrhey í nábýli við þennan gamla grafreit.
Árið 1947 keypti pabbi díselrafstöð og átti að staðsetja hana í
geymslu skammt frá íbúðarhúsinu. Geymslan gekk alltaf undir
nafninu Hjallurinn. Þar sem vélin var mjög þungbyggð þurfti
að grafa í gólfið í Hjallinum og steypa undirstöðu. Þar sem við
erum að grafa þarna, ég og pabbi, veltur fram mannshöfuðkúpa