Strandapósturinn - 01.06.2018, Blaðsíða 179

177
Elías á Tóftunum19 í Látravík. Líklega hefur Grímur farið úr
Árneshreppi árið 1880, 11 ára gamall, en gleymst að færa hann
inn í manntalið sem tekið var í Grunnavíkurhreppi þá um
haustið enda langur vegur frá Stað í Grunnavík norður í Látravík
og fréttir berast seint frá afskekktasta bæ sóknarinnar. Hann var
vinnudrengur hjá Elíasi Einarssyni 1883 en þá bjó Elías enn á
Tóftunum í Látravík. Þar var Grímur til ársins 1884 en þá flyst
hann með fósturforeldrum sínum að Horni. Það má vera nokk-
uð ljóst að Grímur hefur fermst í Grunnavíkurhreppi 1882 eða
1883 því hann var ekki fermdur í Árneshreppi né í Staðarsókn
í Sléttuhreppi. Kirkjubækurnar í Grunnavíkurhreppi frá þessum
tíma brunnu.
Grímur og Elísa fara að draga sig saman og giftast árið
1894. Athöfnin fór fram á Stað í Aðalvík þann 9. september.20
Svaramenn voru Elías Einarsson fósturfaðir brúðgumans og
Stígur Stígsson bóndi á Horni. Þá var Grímur vinnumaður á
Horni. Þeim fæddist sonur 16. október það sama ár. Hann var
skírður skemmri skírn 18. október 1894 af Jóhannesi Sakaríassyni
bónda í Rekavík bak Höfn. Skírnin var staðfest af presti 11. ágúst
1895. Skírnarvottar voru Hermann Sigurðsson meðhjálpari á
Læk, Sakarías Sakaríasson bóndi í Stakkadal og Helga Sigurfljóð
Sakaríasdóttir húskona á Sæbóli. Hann hlaut nafnið Kristinn
Plató. Grímur og Elísa búa á Horni til 1900 en Grímur ferst
í Hornbjargi 9. júlí þá um sumarið.21 Allan þennan tíma var
Guðrún með móður sinni og var á Horni til fardaga 1901.
Eftir að Grímur fellur frá þá fór Guðrún sem vinnukona að
Höfn og var þar 1901-1905 hjá Betúel Betúelssyni bónda og
Önnu Jónu Guðmundsdóttur konu hans. Elísa er áfram á Horni
með Kristin son sinn til fardaga 1904. Þá fór hún og gerist
19 Tóftirnar voru smábýli vestan megin við Blakkabás í Látravík. Þar bjó Elías á árun-
um 1880 til 1884 og var sagt að hann hafi efnast þar þótt ótrúlegt sé. Jóhann Hall-
dórsson refaskytta bjó austan megin í Látravík á sama tímabili.
20 Þegar Elísa var komin hátt í átta mánuði á leið var ákveðið að þau skötuhjúin
gengju í hjónaband. Þau fóru gangandi frá Horni, 7 klukkustunda leið, að Hest-
eyri en var vísað þaðan að Stað en þangað var þriggja klukkustunda ganga. Konu
sem aðstoðaði þau á Hesteyri var send ein grá gimbur ári seinna í þakklætisskyni.
21 Grímur mun hafa fengið stein í höfuðið er hann var við eggjatöku niður í Sig-
mundarhillu undir Almenningaskarði. Hann féll úr hillunni og niður í fjöru og
þar fannst hann örendur.