Skessuhorn - 23.03.2022, Blaðsíða 14

MIÐVIKUDAGUR 23. MARS 202214
Vinstrihreyfingin grænt fram­
boð kynnti á sunnudaginn fram­
boðslista sinn í Borgarbyggð fyrir
sveitar stjórnarkosningarnar í maí
næstkomandi. Á listanum má sjá
mörg ný andlit en efsta sæti listans
skipar Thelma Dögg Harðardóttir
frá Skarðshömrum í Norðurárdal.
VG hefur á yfirstandandandi kjör­
tímabili skipað meirihluta í sveitar­
stjórn í Borgarbyggð ásamt Sjálf­
stæðisflokki og Samfylkingu. Kem­
ur Thelma ný inn hjá flokknum eft­
ir að Halldóra Lóa Þorvaldsdóttir,
núverandi oddviti flokksins, sóttist
ekki eftir endurkjöri.
Líður best þegar nóg
er að gera
Thelma ólst upp í Kópavogi en
hefur alla tíð litið á sig sem sveita­
stelpu af Vesturlandi. Pabbi hennar
er úr Stykkishólmi og þar á Thelma
stóra fjölskyldu. „Mér hefur alltaf
fundist ég smá Hólmari líka,“ seg­
ir Thelma í samtali við Skessuhorn.
„Við fjölskyldan eignuðumst svo
jörðina Skarðshamra hér í Borgar­
byggð um aldamótin, þegar ég var
fjögurra ára, og ég hef verið hér
með annan fótinn allar götur síð­
an og þetta verið mitt annað heim­
ili,“ segir Thelma sem býr nú á
Skarðshömrum. Hún gekk í Linda­
skóla í Kópavogi og lauk svo stúd­
entsprófi af náttúrufræðibraut frá
Menntaskólanum í Kópavogi. Eft­
ir menntaskóla flutti hún ein upp í
Borgarfjörð og hefur búið þar síð­
an. „Ég tók bara með mér hunda
og hesta, flutti hingað og skráði
mig í viðskiptafræði við Háskól­
ann á Bifröst. Þar sem mér fannst
eitthvað lítið að gera svona í fullu
háskólanámi ákvað ég að skrá mig
líka í diplómanám á Hólum,“ segir
Thelma og hlær. Hún var því í fullu
námi við tvo háskóla í tvö ár. „Þetta
er mjög lýsandi fyrir mig. Mér líður
alltaf best ef ég hef mikið að gera,“
segir hún.
Verkefnastjóri hjá
Markaðsstofu
Vesturlands
Thelma starfar sem verkefnastjóri
hjá Markaðsstofu Vesturlands sem
nú er hluti af Samtökum sveitar­
félaga á Vesturlandi. „Rétt áður
en ég útskrifaðist úr viðskipta­
fræðinni fékk ég starf hjá Upplýs­
ingamiðstöð Vesturlands og var þar
í afgreiðslunni að taka á móti ferða­
mönnum. Ég leiddist svo yfir í starf
verkefnastjóra hjá Markaðsstofu
Vesturlands sem nú er hluti af SSV.
Þar er ég að vinna að fjölbreyttum
verkefnum sem tengjast markaðs­
setningu landshlutans og þróunar­
verkefna á sviði ferðaþjónustunn­
ar,“ útskýrir Thelma. Spurð hvað
hún geri fyrir utan vinnu segist hún
lífið helst snúast um hestamennsku
og ferðalög. „Við erum með litla
hrossarækt og svo er ég aðeins að
temja og þjálfa. Það er eiginlega
nóg að gera í því en svo þykir okkur
Viktori gaman að ferðast, sér í lagi
innanlands.“
Frumraun í pólitík
Aðspurð segist Thelma ekki hafa
áður tekið virkan þátt í pólitík en
að hún hafi þó alltaf haft áhuga og
fylgst vel með, sérstaklega lands­
málum. „Það var aldrei stefnan að
taka þátt í pólitík en svo kom upp
þetta vindmyllumál hér í sveitinni
og þá vaknaði þessi áhugi hjá mér,“
segir Thelma og er þar að tala um
þau áform að reisa vindmyllugarð
á Grjóthálsi, í landi Hafþórsstaða í
Norðurárdal og Sigmundarstaða í
Þverárhlíð. Þá eru einnig áform um
vindmyllugarð í Hvammi. „Það var
ótrúlega magnað að finna hversu
sterk samstaðan hér er gegn þess­
um áformum, bæði hér í Norður­
árdal og Þverárhlíð. Þetta er að
verða orðin tveggja ára barátta hjá
okkur þar sem ég hef lært ótrúlega
margt. Það kom mér í raun mjög
á óvart hversu margt er í höndum
sveitarfélaga í svona málum en ekki
á borði ríkisins. Það var í gegnum
þessa baráttu alla sem áhugi vakn­
aði hjá mér á að þjóna samfélaginu
mínu og að koma okkar málefn­
um á framfæri,“ segir Thelma. „Ég
hafði alltaf hugsað á þann hátt að ég
hefði ekkert að gera með að fara í
pólitík, þó ég hefði mikinn áhuga á
ýmsum samfélagsmálum. En þegar
ég fór svo að taka þátt í þessari
baráttu okkar breyttist margt. Af
hverju ætti ég ekki að bjóða mig
fram eins og einhver annar? Fólk
þarf að stíga fram í þessi verkefni
og ég get ekki bara ætlast til þess að
aðrir geri það,“ bætir hún við.
Skipulagsmál
fyrirferðamikil
Andstaðan við vindmyllurnar voru
drifkraftur Thelmu út í stjórnmál­
in en þegar hún var komin af stað
kom í ljós að það var margt í nær­
samfélaginu sem hún hafði áhuga á
að beita sér fyrir. „Eftir að ég kom
að máli við VG fann ég að ég ætti
heima þar og þegar ég fór að skoða
öll málefnin betur og hvað hefði
verið gert á þessu kjörtímabili og
bíða okkar á því næsta, þá fann ég
að þar er margt sem ég hef mik­
inn áhuga á að taka þátt í,“ segir
Thelma. „Skipulagsmálin í Borgar­
byggð eru fyrirferðamikil núna en
fyrir liggur endurskoðun á aðal­
skipulagi sveitarfélagsins. Þar er
að mörgu að hyggja og nauðsyn­
legt að hugsa til framtíðar. Við
þurfum til dæmis að skoða hvern­
ig við viljum sjá Borgarnes byggjast
upp og hvernig dreifbýliskjarnarn­
ir í sveitarfélaginu eiga eftir að
þéttast og breytast þegar fram líð­
ur og þá þurfum við að vera búin
að taka ákvarðanir um innviðaupp­
byggingu í sveitarfélaginu,“ segir
Thelma.
Þátttaka ungmenna
Thelma segist vilja sjá Borgar­
byggð hafa ungmenni meira með í
ráðum í þeirri skipulagsvinnu sem
framundan er. „Eitt af því sem ég
hef tekið eftir síðustu vikurnar er
hversu lítið ungmennum er hleypt
að þeim málefnum sem að þeim
snúa. Okkur ber lagaleg skylda til
að hlusta á ungmennin í þeim mál­
um sem snerta þau. Hér í Borgar­
byggð er starfandi ungmennaráð
sem á að nýta til fulls þegar tekn­
ar eru mikilvægar ákvarðanir sem
tengjast þeim beint, eins og í skóla­
málum. Mig grunar líka að ung­
mennum sé ekki gert nógu vel ljóst
hvar og hvernig þau geta haft áhrif
á pólitíkina og það þarf að bæta,“
segir Thelma og bætir við að þetta
sé eitthvað sem hún vilji beita sér
fyrir að verði bætt. „Skólamálin eru
búin að vera ofarlega á baugi hér í
Borgarbyggð undanfarin misseri og
það mun svo vera í höndum nýrr­
ar sveitarstjórnar að vinna úr þeim
málum. Þar þarf að vanda til verka.
Það er alveg ljóst í mínum huga
að í þeirri vinnu þarf að hleypa
unga fólkinu að með sínar skoðan­
ir og hugmyndir. Við í VG viljum
heyra í bæði foreldrum og börnum
um hvað þau vilja. Við viljum taka
ákvarðanir út frá þeirra reynslu því
þau eru þjónustunotendurnir,“ seg­
ir Thelma.
Málefni aldraðra
einnig mikilvæg
Thelma segir einnig að halda verði
vel utan um málefni aldraðra á
komandi kjörtímabili. Það sé mála­
flokkur sem alltaf verði að hafa
ofarlega. „Ég tel þessi málefni vera
í góðum farvegi í Borgarbyggð en
það má ekki slaka á og við verðum
að halda vel utan um þennan stóra
hóp fólks. Það sem við þurfum
helst að gera núna er að finna gott
jafnvægi með ríkinu í þeim rekstri
sem snýr að eldra fólki. Við slík­
ar aðstæður getur og hafa myndast
aðstæður þar sem ríki og sveitarfé­
lög bendi einfaldlega á hvort ann­
að. Það bitni svo mest á þeim sem
síst skyldi, notendum þjónustunn­
ar. Við verðum að koma með
almennilega stefnu í þessum mál­
efnum í samráði við ríkið svo þjón­
ustan virki sem best. Það er algjört
lykilatriði að þessi þjónusta virki,“
segir Thelma.
„Ég er með stóran hóp af mjög
góðu fólki með mér sem ég er þakk­
lát fyrir. VG hér í Borgarbyggð
hefur sterka grasrót sem okkur hef­
ur verið hampað fyrir á landsvísu.
Ég get því verið spennt og jákvæð
fyrir komandi tímum. Þetta er stórt
verkefni og ef ég næ kjöri mun það
eiga hug minn allan næstu fjögur
ár,“ segir Thelma Dögg Harðar­
dóttir, oddviti VG í Borgarbyggð.
arg
Menntaskóli Borgarfjarðar bauð
síðastliðinn miðvikudag öllum
nemendum í tíunda bekk Grunn­
skóla Borgarfjarðar, Grunnskóla
Borgarness og Auðarskóla í Dölum
í heimsókn. Hefðbundin kennsla
var felld niður fyrir hádegi og nem­
endur menntaskólans tóku að sér
hlutverk gestgjafa og leiddu gestina
um skólann og sögðu frá starfinu. Í
skólanum höfðu kennarar sett upp
ýmsar stöðvar til að kynna hluta
af því námi sem boðið er upp á.
Gerðar voru tilraunir, farið í leiki,
spurningakeppni, starf nemendafé­
lagsins kynnt og ýmislegt fleira. Að
endingu áttu svo nemendur nota­
lega samverustund og sporðrenndu
„menntaborgurum“.
vaks/ Ljósm. MB
Andstaða við uppbyggingu vindmylla leiddu
Thelmu Dögg í pólitíkina
Rætt við Thelmu Dögg Harðardóttur nýjan oddvita VG í Borgarbyggð
Thelma Dögg Harðardóttir skipar fyrsta sæti á lista VG í Borgarbyg gð. Ljósm. aðsend
Þessir gaurar voru flestir sólarmegin í lífinu.
Kynntu skólann fyrir nemendum í 10. bekk
Þessar stúlkur gæddu sér á menntaborgurum.