Nesfréttir - 01.12.2022, Qupperneq 22

22 Nesfrétt ir
G R Ó T T U S Í Ð A N www.grotta.is
6. flokkur karla stendur í ströngu
6. flokkur karla hefur staðið í ströngu síðustu
vikur. Eldra ár flokksins lék á heimavelli í
Íþróttahúsi Gróttu, Hertz-höllinni helgina 18. –
20. nóvember. Grótta tefldi fram þremur liðum
sem léku í 2. deild, 3. deild og 4. deild á mótinu.
Það er skemmst frá því að segja að liðin stóðu
sig vel á móti erfiðum andstæðingum. Lið 1
vann tvo leiki og tapaði tveimur. Lið 2 vann
einn leik en tapaði þremur og lið 3 vann tvo og
tapaði tveimur.
Yngra árið lék helgina 25. - 27. nóvember í
Origo-höllinni að Hlíðarenda. Líkt og hjá eldra
árinu þá tefldu strákarnir fram þremur liðum
sem léku í 2. deild, 3. deild og 4. deild mótsins.
Gróttuliðin stóðu sig vel. Lið 3 vann tvo leiki og
tapaði tveimur. Lið 2 vann einn leik en tapaði
þremur. Lið 1 gerði sér svo lítið fyrir og vann
alla sína leiki, vann deildina og er því komið
upp í 1. deild.
Strákarnir lögðu allt í sölurnar og uppskáru
samkvæmt því. Eldra árið vann sínar deildir á
Akureyrarmótinu í byrjun nóvember og því ekki
sjálfgefið að halda sér uppi í deildunum sínum
á þessu móti.
40 strákar æfa í 6. flokki þessa dagana og
taka framförum með hverri æfingunni. Þjálfari
flokksins er Andri Sigfússon en honum til
aðstoðar eru Antoine Óskar Pantano, Kári Kvaran
og Viðar Sigurjón Helgason.
Kjartan Kári Halldórsson og
knattspyrnudeild Gróttu hafa
gert samkomulag við norska
úrvalsdeildarfélagið FK Haugesund
um að Kjartan gangi til liðs
við félagið.
Haugesund endaði í 10. sæti norsku
deildarinnar á liðnu tímabili en
félagið hefur leikið í úrvalsdeildinni,
Eliteserien, frá árinu 2010 og best
náð þriðja sæti. Kjartan Kári, sem er
19 ára gamall, er fæddur og uppalinn
Seltirningur og hefur leikið með
Gróttu frá 5 ára aldri. Eftir að hafa
farið í gegnum allt yngri flokka starf
félagsins spilaði Kjartan sína fyrstu
keppnisleiki með meistaraflokki
sumarið 2020, þegar Grótta lék í
úrvalsdeild, en var svo lykilleikmaður í
liðinu ári síðar. Í sumar sprakk Kjartan
út í Gróttuliðinu og varð markakóngur
Lengjudeildarinnar með 17 mörk
ásamt því að vera kosinn efnilegasti
leikmaðurinn. Þrátt fyrir ungan aldur
hefur Kjartan spilað 48 leiki í deild og
bikar fyrir meistaraflokk Gróttu og
skorað í þeim 29 mörk. Hann á einnig
að baki 13 leiki fyrir yngri landslið
Íslands og æfði á dögunum í fyrsta
sinn með U21 árs landsliðinu. Grótta
óskar Kjartani Kára og fjölskyldu
hans innilega til hamingju með
áfangann og hlakkar til að fylgjast með
ævintýrum hans í Noregi.
Kjartan Kári
til Haugesund
170
GETRAUNANÚMER GRÓTTU
GETRAUNIR.IS
Melkorka Katrín ráðin
aðstoðarþjálfari
Melkorka Katrín Flygenring Pétursdóttir
hefur verið ráðin sem aðstoðarþjálfari
meistara flokks kvenna hjá knattspyrnudeild
Gróttu.
Melkorka var í haust ráðin sem þjálfari 4. og
5. flokks kvenna hjá Gróttu en hún kemur frá FH
þar sem hún hefur þjálfað undanfarin átta ár, nú
síðast 4. og 5. flokk kvenna. Melkorka, sem er fædd
1998, er fyrrum leikmaður FH og stundar í dag meistaranám í sjúkra þjálfun
og hefur lokið UEFA B þjálfararéttindum. Knattspyrnudeild Gróttu fagnar
því að hafa samið við Melkorku um starfið og hlakkar til komandi samstarfs.