Skinfaxi - 01.03.2020, Blaðsíða 16

16 S K I N FA X I
Mikilvægi norðurslóða
Halla segir störf sín á sviði loftslags- og umhverfismála veki oft upp
minningar um Grænlandsförina og eigi eflaust hlut að því að hún vinni
núna mikið tengt landinu, með stjórnvöldum jafnt sem stofnunum á
Grænlandi. Þá kennir Halla norðurslóðanámskeið við Harvard-háskóla.
Hún segir miklar breytingar fram undan þegar hlýnar á svæðinu og
hafísinn bráðnar.
„Ég held að allir, sem hafa áhuga á framtíð Íslands, ættu að beina
sjónum sínum að þessum málaflokki. Við fáum stjórnmálaleiðtoga,
fræðimenn og ungt fólk að vettvanginum til að koma saman, skoða
málin vel og kynna tillögur að úrbótum,“ segir hún.
„Það er mikið að gerast á norðurslóðum og margt sem mun gerast
þar í framtíðinni. En ég tók eftir því á sínum tíma að margir voru að
vinna að því einir og sér reyna að leysa þau risastóru vandamál sem
tengjast loftslagsmálum á norðurslóðum. Þetta voru flest allt litlir aðilar.
En þá kom sér vel lærdómurinn frá UMFÍ. Ég stofnaði vettvanginn um
norðurslóðir við Harvard til að fá þá sem vinna að málinu að borðinu
og stækka þar með hópinn. Þegar margir vinna að sama málinu verður
vandamálið líka einfaldara viðfangs og áhrifin meiri. Þetta er alveg
sama hugsunin og hjá UMFÍ,“ segir hún.
Nú starfa 18 manns í þverfaglegu teymi við miðstöð norðurslóða við
Harvard, í samstarfi við háskóla, stjórnvöld og stofnanir um víða ver-
öld. Málin eru fjölbreytt og ólík. Meðal þeirra eru breytingar á hafinu
vegna loftslagsbreytinga, menning fólks í löndum sem landamæri eiga
að norðurslóðum, réttindi frumbyggja, menntun og margt fleira. Að
borði norðurslóðavettvangsins koma leiðtogar fjölda sviða, háskóla-
nemendur og fleiri, sem tengjast norðurslóðum á einn eða annan
hátt, til að leysa málin saman.
Lærdómur UMFÍ
Halla segir að á þeim stutta tíma sem hún hafi komið að götulista- og
trúðanámskeiði UMFÍ á Grænlandi fyrir næstum 20 árum hafi hún lært
mikið. Það hafi verið lærdómur til lífstíðar:
„Í fyrsta lagi lærði ég að ef maður ætlar að koma einhverju í verk
þarf að vinna með mörgum. Gott verk byggir allt á samvinnu margra.
Töfrarnir felast síðan ferðalaginu sjálfu,“ segir Halla og bætir við að
sig hefði aldrei grunað, þegar hún fór á fyrsta fund sinn með UMFÍ,
hvert samtalið gæti leitt hana.
„Í þessu tilviki hefur leiðin heldur betur verið góð,“ segir Halla og
bætir við að hugsun UMFÍ sé leiðarljós og nýtist vel.
„Leikgleðin verður að vera í fyrirrúmi. Maður verður einfaldlega að
hafa hjartað á réttum stað og hafa gaman af verkefnunum sem maður
vinnur. En þá má líka ekki verða of langt í trúðinn,“ segir Halla Hrund
Logadóttir.
Úr sveit í stórborg
Halla segist ung hafa farið heyrt um Ungmennafélag Íslands og
sambandsaðila þess.
„Þótt ég sé úr Árbænum var ég alltaf með annan fótinn hjá afa
og ömmu í Hörgslandskoti á Síðu. Þar var ég vinnumaður öll sumur
til tvítugs. Þarna var það sem ég heyrði ungmennafélagssögurnar
enda voru mamma og systir hennar félagar í Ungmennafélaginu
Ármanni sem var í USVS (Ungmennasambandi Vestur-Skaftfellinga).
Ég hélt alltaf að Ungmennafélag Íslands væri aðeins tengt íþróttum
og það var ekki fyrr en ég fór að skipuleggja námskeiðið á Græn-
landi að ég komst að því hvað það vinnur á mörgum ólíkum sviðum.“
„Þegar margir vinna að sama
málinu verður vandamálið
einfaldara viðfangs og áhrifin
meiri. Þetta er alveg sama
hugsunin og hjá UMFÍ.“