Framkvæmdafréttir Vegagerðarinnar - 11.12.2023, Page 17

Framkvæmdafréttir nr. 728
6. tbl. 31. árg.
17
Berglind Hallgrímsdóttir hjá EFLU hélt erindið
Umferðaröryggisaðgerðir og áhrif á leiðarval.
Markmið rannsóknarinnar var að meta áhrif
umferðaröryggisaðgerða á leiðarval ökumanna,
hraða og meta mögulega vænta fækkun slysa
og samhagandi samfélagslegan sparnað vegna
hraðalækkunar. Helstu niðurstöður eru að
hraðatakmarkandi aðgerðir virðast hafa lítil áhrif á
leiðarval.
Thijs Kreukels hjá VSB verkfræðistofu hélt erindið
Leiðbeiningar um hönnun gatna í þéttbýli. Fram kom að
hérlendis skortir samræmdar leiðbeiningum varðandi
hámarkshraða í mismunandi hverfum. Samræming
er mikilvæg vegna umferðaröryggis og skilvirkni. Nú
er unnið að samræmdum leiðbeiningum í samstarfi
Vegagerðarinnar, Reykjavíkur og Skipulagsstofnunar.
Sæunn Gísladóttir hjá Rannsóknamiðstöð Háskólans
á Akureyri hélt erindið Áhrif fjarvinnu á vegakerfið.
Covid-heimsfaraldurinn gjörbreytti fjarvinnu en kannað
var hvort breyting varð til lengri tíma og hvort það
gæti haft áhrif á vegakerfið. Niðurstöður benda til að
meðalfjöldi daga sem keyrt var í vinnu sé aðeins lægri
nú en fyrir Covid en þörf er á frekar í rannsóknum.
Þorsteinn Sæmundsson, hélt erindi fyrir hönd
Jöklahóps Jarðvísindastofnunar Háskóla Íslands. Það
hét; Grímsvötn: vatnsgeymir, jökulhlaup, upphaf og
rennsli. Frá því að Grímsvötn fundust árið 1919 hafa
þau verið til rannsóknar en þau eru alltaf að breytast.
Með betri mælingum og mælitækjum er hægt að spá
betur fyrir t.d. um hlaup.
Þorsteinn Sæmundsson, Halldór Geirsson og Hafdís
Jónsdóttir stóðu að erindinu Rannsóknir á tengslum
veðurfarsbreytinga og hreyfinga á og við vegstæði
Siglufjarðarvegar um Almenninga. Tilgangur
rannsóknarinnar er að finna eðli og orsakir hreyfinga
í og við vegstæði Siglufjarðar við Almenninga. Árið
2022 voru settar upp níu síritandi GNSS stöðvar til
að mæla hreyfingar. Samanburður á eldri hreyfingum
og veðurfari bendir til að flestir atburðir eigi sér stað í
tengslum við úrkomu og leysingar.
Einar Sveinbjörnsson hjá Veðurvaktinni hélt erindið
Mælaborð úrkomuvöktunar í Almenningum. Hann fór
m.a. yfir hvernig svæðið er vaktað og hvers vegna.
Úrkomumæli var bætt við veðurstöðina Siglufjarðarveg
í september í fyrra. Í október sama ár var tilfærsla um
22 cm eftir miklar rigningar.