Framkvæmdafréttir Vegagerðarinnar - 11.12.2023, Blaðsíða 28

Gaman að geta greitt götu fólks
Hvað hefur þú unnið lengi hjá Vegagerðinni?
Ég byrjaði hjá Vegagerðinni í ágúst 2019 eftir u.þ.b. 16
ára starf í lögreglunni. Það voru mjög ánægjuleg skipti og
ég mæli frekar með Vegagerðinni heldur en lögreglunni ef
einhver skildi vera að spá.
Í hverju felst starfið?
Þetta er svakalega fjölbreytt starf og yfirleitt frekar
skemmtilegt. Það getur verið allt frá því að sitja inni
á skrifstofu nánast heilu dagana yfir í að standa úti í
kolvitlausu veðri að aðstoða vegfarendur í vandræðum og
allt þar á milli.
Ég er verkstjóri á þjónustustöðinni á Ísafirði. Helstu
verkefnin eru dagleg verkstjórn, skipulagning og
forgangsröðun verkefna. Áætlanagerð og verðkannanir
fyrir hin ýmsu smáverkefni, allt í góðu samstarfi við
yfirverkstjórann. Ég er í miklum samskiptum við flesta
verktaka á svæðinu og svo auðvitað nærliggjandi
þjónustustöðvar. Samstarfið milli þjónustustöðva finnst
mér vera að aukast sem hlýtur almennt að vera jákvætt.
Lán og tilfærsla á tækjum og búnaði og líka aðstoð með
mannskap ef þannig ber undir.
Hvernig er hefðbundinn vinnudagur?
Hefðbundinn vinnudagur hjá okkur er varla til. Við reynum
að vinna samkvæmt áætlunum hjá okkur en það koma
oft breytur inn í dæmið sem setja áætlunina alveg á hvolf.
Á vetrum geta vinnudagarnir byrjað upp úr klukkan
fimm og staðið langt fram á kvöld þegar veðrið er með
vesen. Símtölin verða stundum það mörg á slíkum dögum
að ég hef ekki nennt að telja þau og síminn grátbeðið
um hleðslu nokkrum sinnum yfir daginn. Sumrin geta
líka verið strembin á köflum, pressa við að skipuleggja
verkefnin þannig að þau passi saman. Eitt þarf að klárast
svo hægt sé að byrja á því næsta o.s.frv.
Hvað er mest krefjandi við starfið?
Að standast og uppfylla þær kröfur og væntingar sem
gerðar eru til okkar. Bæði kröfur sem Vegagerðin gerir
til starfsmanna sinna, til dæmis að fara ekki fram úr
fjárveitingum, og líka þær sem almenningur gerir til okkar.
Það vilja allir fá þjónustu sem fyrst og það á auðvitað að
vera vel gert. Það vilja allir fá sína vegi mokaða að vetri
eða heflaða að sumri sem fyrst og enginn sáttur við að
þurfa að bíða, eðlilega.
Hvað er skemmtilegast við vinnuna?
Kynnast nýju fólki, bæði samstarfsfólki og öðrum. Ég hef
samanburðinn úr lögreglunni, þar kynntist ég helling af
fólki en færri kynnin komu til af góðu, merkilegt nokk.
Hérna er þetta allt öðruvísi sem betur fer. Samskiptin
almennt eru mun jákvæðari þó auðvitað komi eitt og eitt
neikvæðara tilvik.
Það er frábært að geta orðið við óskum almennings um
aðstoð Vegagerðarinnar og þannig „greitt götu þeirra“ í
alls konar skilningi þessa orðalags.
Svo er líka mjög skemmtilegt hvað vinnan er fjölbreytt.
Maður fær eiginlega ekki tíma eða tækifæri til að fá leið
á tilteknu verkefni, það næst ekki að sinna því nógu lengi
því það er annað verkefni tekið við.
Hver eru þín áhugamál?
Klassískt svar - fjölskyldan, elta krakkana á fótboltamót,
útilegur og sumarbústaðaferðir. Svo væri hægt að nefna
skotveiði þó henni hafi verið lítið sinnt undanfarið. Og líka
flest sem tengist sveitinni og vinnunni þar.
Vegagerðin í nærmynd
Yfir 300 manns starfa hjá Vegagerðinni og störfin eru bæði fjölmörg og fjölbreytt á láði, legi og í lofti.
Í þessum greinaflokki verður skyggnst inn í hin ólíku störf sem unnin eru hjá stofnuninni.
Haukur Árni Hermannsson, verkstjóri á þjónustustöð
Vegagerðarinnar á Ísafirði, segir starf sitt svo
fjölbreytt að ekki er möguleiki á að fá leið á
verkefnunum.
↘
Haukur segir verkefni sín hjá
Vegagerðinni það fjölbreytt
að ekki sé hægt að fá leið á
þeim.