Goðasteinn - 01.09.2016, Blaðsíða 193

191
Goðasteinn 2016
irbragð var hann fastur fyrir, ekki síst ef honum var misboðið á einhvern hátt.
En allt hans hljóðláta svipmót og atferli ber með sér sálarjafnvægi og alúð.
Kristinn talaði ekki af sér, var lítt málgefinn, en hann gat afgreitt langt mál
með einni setningu sem hitti gjarnan beint í mark. Hann var afar verkhagur,
brýningamaður góður og einstaklega útsjónarsamur þegar kom að greiningu
og viðgerðum hvers konar bilaðra tækja og tóla. Má því máli til stuðnings nefna
það að hann setti mjaltarvél fjóssins upp, einn og óstuddur, en það verk þótti
ekki á færi annarra en sérfróðra manna á því sviði.
Kristinn var traustur vinum sínum og hjálpsamur öllum þeim sem til hans
leituðu. Þeir sem á annað borð kynntust honum fundu fljótt að þar fór góður
drengur, sem lét ekki hnjóð eða níð um aðra falla.
Kristinn lét sig heimsmálin litlu varða og taldi sig ekki þurfa að leggjast í
löng ferðalög. Helst vildi hann vera heima á Glæsistöðum við störf sín, þar var
heimur hans og heimili í djúpri merkingu þess orðs. Átthagarætur hans voru
afar djúpar og sterkar. Hér var hans reitur, bræðurnir, skepnurnar og landið.
Hann var partur af því öllu sjálfur og undi hag sínum vel.
Á síðari misserum fór heilsu hans að hraka og þá urðu öll störfin þyngri.
En eins lengi og unnt var sinnti hann sínum verkum. Hann fékk blóðtappa við
heila sem olli nokkurri lömun og var fluttur á sjúkrahús í kjölfar þess og síðan
á Kumbaravog hvar hann fékk góða aðhlynningu og skal það af heilum hug
þakkað hér og nú.
Kristinn lést á Kumbaravogi þ. 15. feb. 2015. Útför hans fór fram frá Ak-
ureyjarkirkju þ. 7. mars 2015.
Önundur S. Björnsson, Breiðabólstað
Linda María Jónsdóttir
Linda María Jónsdóttir var fædd á jóladag 1971,
þegar öld var liðin frá fæðingu föðurafa hennar Páls
Árnasonar. Foreldrar hennar eru Guðrún Birna Garð-
arsdóttir fædd 1945 og Jón Helgason fæddur 1937.
Systkini hennar eru Hrafnhildur Björk fædd 1964,
Sigurbjörg Kristín fædd 1967 og Garðar og Helgi
fæddir 1969. Hún ólst upp á Hellu og gekk í Grunn-
skólann þar.
Henni var ungri úthlutað móðurhlutverkið þegar hún var aðeins 15 ára göm-
ul og eignaðist Maríu Hödd, hún er fædd 20. apríl 1987. Sambýlismaður henn-