Golf á Íslandi - 01.06.2016, Side 26

Nýtt gullaldartímabil
fram undan?
Það hafa fjölmargir Íslandsmeistarar komið
úr röðum GS í gegnum tíðina. Þar ber hæst
árangur Karenar Sævarsdóttur sem varð
Íslandsmeistari átta sinnum í röð. Örn Ævar
Hjartarson er sá síðasti úr röðum GS sem
fagnað hefur Íslandsmeistaratitli en það
gerði hann árið 2001 í Grafarholtinu.
„Við vonum að nýtt gullaldartímabil sé
fram undan hjá okkur í afreksstarfinu.
Því er ekki að neita að það hefur ekki
staðið undir væntingum undanfarin ár.
Karen Guðnadóttir hefur verið mest
áberandi og staðið sig mjög vel. Við höfum
átt marga Íslandsmeistara í golfi og okkur
langar að fá fleiri slíka. Það eru gríðarleg
efni í barna- og unglingastarfinu hjá okkur.
Þar má nefna systurnar Kingu Korpak og
Suzönnu Korpak.“
Íslandsmótið í golfi fór fram á Hólmsvelli í
Leiru árið 2011 og segir Jóhann að GS-ingar
séu ávallt tilbúnir að taka við slíku verkefni.
„Miðað við gæði vallarsins erum við ávallt
reiðubúnir að taka Íslandsmótið að okkur og
það væri heiður að fá mótið á ný, hvenær
sem það verður. Við höfum náð að halda
okkur réttu megin við núllið. Höfum ekki
farið í fjárfestingar á undanförnum árum
en framkvæmdir við fjórðu brautina munu
kosta eitthvað. Einnig mun uppbygging á
inniaðstöðu í haust kosta eitthvað en það
er bara tilhlökkunarefni að takast á við þau
verkefni. Við ætlum ekki að steypa okkur
í skuldir og markmiðið er að fjármagna
t.d. golfhermi með framlögum og styrkjum
frá fyrirtækum og einstaklingum áður en
græjan verður keypt. Langtímaskuldir GS
hafa lækkað jafnt og þétt á undanförnum
árum. Við teljum okkur vera á góðum
stað með reksturinn, klúbburinn er ekki
skuldlaus en við erum að lækka skuldir og
eru með gott aðhald í rekstrinum,“ sagði
Jóhann Páll.
Karen Guðnadóttir
úr GS hefur verið
að gera góða hluti
í keppnisgolfinu
undanfarin ár.
Ein sú efnilegasta:
Kinga Korpak að keppa
í sveitakeppninni
síðasta sumar.
Formaðurinn fékk að
vera á pokanum hjá
henni.
Íslandsbankamótaröðin hófst í lok maí á Hólmsvelli.
Hér má sjá keppendur á 10. flötinni.
26 GOLF.IS