Morgunblaðið - 21.06.2004, Blaðsíða 30
30 C MÁNUDAGUR 21. JÚNÍ 2004 MORGUNBLAÐIÐ
M
ikil og ör uppbygging á
sér nú stað í austurhluta
Grafarholts og ekki of-
sagt, að byggðin þar
breyti um yfirbragð milli mánaða.
Hvarvetna má sjá byggingarkrana
og stórvirkar vinnuvélar að verki.
Með nútímatækni eru afköstin í
byggingariðnaði orðin miklu meiri en
eitt sinn var.
Austurhlutinn er að fá á sig miklu
meira mót, enda hefur íbúum þar far-
ið ört fjölgandi. Frumbýlingsháttur-
inn er að hverfa. Við Kirkjustétt er að
rísa þjónustumiðstöð, þar sem gert
er ráð fyrir verzlun, bensínstöð og
bankaútibúi. Þetta er mikil framför,
en lengi var aðeins lítil verzlun til
staðar uppi á holtinu.
Miklar framkvæmdir standa yfir
við Ingunarskóla, sem er grunnskóli
og verður eflaust ein glæsilegasta
skólabygging landsins. Þessi bygg-
ing verður væntanlega tekin í notkun
í haust.
Nálægðin við góð útivistarsvæði
gefur byggðinni í Grafarholti aukið
gildi. Fyrir vestan það er t.d. stór
golfvöllur og í austri er m.a. Reyn-
isvatn og skógi vaxnar brekkur.
Dalurinn milli Grafarholts og Úlf-
arsfells verður mikill vettvangur, en
þangað hyggst íþróttafélagið Fram
flytja starfsemi sína. Þar á því eftir
að rísa mikil og fjölbreytt íþróttaað-
staða í framtíðinni, enda svæðið bæði
stórt og fallegt og kjörið fyrir margs
konar íþróttir og útivist.
Nútímahönnun
Kambur ehf. er eitt þeirra bygg-
ingarfyrirtækja, sem hafa haslað sér
völl í austurhluta Grafarholts. Við
Marteinslaug 8–16 er fyrirtækið
langt komið með að reisa fjölbýlishús
með 35 íbúðum fyrir fasteignafyrir-
tækið Martein ehf., en framkvæmda-
stjóri þess er Jónas A.Þ. Jónsson lög-
maður. Húsið er á þremur hæðum
auk bílakjallara. Hönnuðir eru Krist-
inn Ragnarsson arkitekt og sam-
starfsmenn hans.
Stigahús eru fimm og lyfta í þeim
öllum. Í kjallara eru opin, undir-
byggð bílastæði, sex bílastæði fyrir
hvert stigahús, en 30 malbikuð bíla-
stæði utanhúss.
Talsvert er í þetta hús lagt. Það er
steinsteypt á hefðbundinn máta, en
útveggir eru klæddir ýmist með
liggjandi bárujárnsklæðningu og
sléttri álklæðningu, en úthliðar út-
veggja á jarðhæð eru múraðar og
málaðar. Allar útihurðir, fög, K-gler,
þök og þakkantar, niðurföll og svala-
handrið verða fullfrágengin og upp-
sett.
Lóð verður skilað frágenginni með
malbikuðum bílastæðum, steyptum
gangstéttum, 7–8 ferm. hellulögn
fyrir framan íbúðir á jarðhæð og
grassvæðum þar sem við á.
Að innan eru steyptir útveggir og
innveggir slípaðir og sandsparslaðir
en léttir milliveggir klæddir tvöföld-
um gifsplötum á hvorri hlið, sem gef-
ur aukinn styrk og góða hljóðein-
angrun. Ofnalagnir eru lagðar í gólf
að rörum, rör í rör. Í eldhúsi verður
innrétting með keramikhelluborði,
bakaraofni og kolasíuviftu.
Íbúðirnar eru ýmist 2ja, 3ja, 4ra
eða 4–5 herbergja, en í sumum íbúð-
unum eru sér fataherbergi inn af
hjónaherbergi.Verð á íbúðunum er
að sjálfsögðu mismunandi eftir
stærð. Tveggja herb. íbúðirnar eru
72–73 ferm. og kosta frá 12,9 millj.
kr., þriggja herb. íbúðirnar eru 105–
109 ferm. og kosta frá 17,9 millj. kr.,
fjögurra herb. íbúðirnar eru 111–127
ferm. og kosta frá 17,8 millj. kr. og
4–5 herb. eru 125,6–137,4 ferm. og
kosta frá 18,9 millj. kr.
Íbúðunum verður skilað fullbúnum
að utan og innan, en án gólfefna. Ef
kaupandi óskar verður íbúð afhent
með gólfefnum, en þá gegn auka-
gjaldi. Íbúðirnar verða með sjón-
varpssíma (dyrasímakerfi með
myndavél) og tengi fyrir gervihnatta-
disk, sem staðsettur verður á þaki til
nota fyrir alla íbúa.
Raflýsing í innbyggðum bílastæð-
um verður skynvædd (photocellur)
og sameign fullfrágengin með vönd-
uðum teppum á stigahúsi og flísa-
lögðu anddyri að lyftudyrum á jarð-
hæð. Í anddyri verður dyrasími
tengdur myndavél.
Afhending í september
„Byggingarframkvæmdir við fjöl-
býlishúsið við Marteinslaug hafa
gengið vel og ætlunin er að afhenda
íbúðirnar í september nk.,“ segir
Hörður Ragnarsson, trésmiður og
einn af eigendum Kambs.
Fyrirtæki hans á að baki langa
reynslu í byggingarframkvæmdum
og hefur byggt mikið af íbúðarhús-
næði. Í febrúar sl. skilaði Kambur af
sér 63 íbúðum við Andrésbrunn í
Grafarholti og hóf svo fyrir skömmu
framkvæmdir við stórt fjölbýlishús
við Sóleyjarrima á svokallaðri
Landssímalóð í Grafarvogi.
Kambur er einnig með aðra lóð
fyrir fjölbýlishús á Landssímalóðinni
og ætlunin að byrja framkvæmdir við
það í haust. Til viðbótar er Kambur
að hefja framkvæmdir við fjölbýlis-
hús á svokallaðri Rafhalóð við Læk-
inn í Hafnarfirði. Hjá fyrirtækinu
starfa nú um 80 manns með undir-
verktökum.
Markaðurinn hefur tekið þessum
íbúðum vel og nokkrar þeirra eru
þegar seldar. „Þessar íbúðir eru að-
gengilegar fyrir allar fjölskyldu-
stærðir og aldurshópa,“ segja þeir
Kristinn Erlendsson og Ólafur
Haukur Haraldsson hjá fasteignasöl-
unni Húsið – Smárinn, þar sem íbúð-
irnar eru í sölu.
„Bæði hús og íbúðir verða máluð í
ljósum litum. Íbúðirnar verða því
sérlega bjartar og skemmtilegar, þar
sem stigahúsin tengjast saman á
„hornum“ og þess vegna eru fleiri
gluggar og útsýni meira úr íbúðunum
en gengur og gerist. Flestar íbúðirn-
ar hafa útsýni á þrjár hliðar.
Húsið stendur á miklum útsýnis-
stað á endimörkum Grafaholtshverf-
isins í austri, skammt fyrir neðan
Reynisvatn. Það verður því ekkert til
þess að skyggja á útsýnið til austurs,
í átt til Úlfarsfells og Esjunnar.“
Líflegur markaður
Að sögn þeir félaga, Kristins og
Ólafs Hauks, hefur verið mikið líf í
markaðnum að undanförnu og eftir-
spurn eftir íbúðarhúsnæði sennilega
sjaldan verið meiri en í vor. „Síðustu
viku er þó eins og eitthvert hik hafi
komið í suma, sem eru í kauphugleið-
ingum," segja þeir Kristinn og Ólafur
Hörður. „Þeir vilja bíða með að ganga
frá samningum fram til 1. júlí, en þá
eiga bein peningalán að taka við af
húsbréfunum og því er spáð, að vextir
verði þá aðeins lægri. Fólk veltir nú
meira fyrir sér vaxtafjárhæðinni en
áður, enda skiptir það strax máli hvort
hún er 0,1% meiri eða minni.
Á móti kemur, að það er yfirverð á
húsbréfunum, þannig að þau hafa
sjaldan verið hagstæðari fyrir íbúðar-
kaup en einmitt í vor. Þá má ekki
gleyma því, að ásókn í þessar íbúðir
við Marteinslaug hefur verið töluverð.
Þetta eru vandaðar en hagkvæmar
íbúðir og húsið stendur í fögru um-
hverfi með mikilli fjallasýn og góðum
útivistarsvæðum í næsta nágrenni.
Það er því ástæða fyrir þá, sem
áhuga hafa, að láta heyra í sér sem
fyrst, svo að þeir missi ekki af eft-
irsóknarverðustu íbúðunum.“
Hagkvæmni í fyrirrúmi í nýju
fjölbýlishúsi við Marteinslaug
Ásókn hefur verið að
aukast í austurhluta
Grafarholts. Magnús Sig-
urðsson kynnti sér nýjar
íbúðir í þriggja hæða
lyftuhúsi, sem bygging-
arfyrirtækið Kambur
byggir við Marteinslaug.
Húsið stendur austast í Grafarholti, skammt fyrir neðan Reynisvatn. Það er því
stutt í skemmtileg útivistarsvæði og útsýni er mikið til austurs.
Húsið er langt komið, en afhendingartími er áætlaður í september nk. Það vek-
ur athygli, að stigahúsin tengjast saman á „hornum“ og þess vegna eru fleiri
gluggar og útsýni meira úr íbúðunum en gengur og gerist. Flestar íbúðirnar
hafa útsýni á þrjár hliðar.
Morgunblaðið/Árni Torfason
Kristinn Erlendsson, sölumaður hjá Húsinu, Hörður Ragnarsson, trésmiður og einn af eigendum byggingarfyrirtækisins
Kambs, og Ólafur Haukur Haraldsson, sölumaður hjá Smáranum. Í baksýn er fjölbýlishúsið Marteinslaug 8–16, en íbúð-
irnar eru til sölu hjá Húsinu-Smáranum.
Tölvuuppdráttur af fjölbýlishúsinu Marteinslaug 8–16. Í húsinu verða 35 íbúðir, en húsið er á þremur hæðum auk bílakjallara. Stigahús eru fimm og lyfta í þeim öll-
um. Hönnuðir eru Kristinn Ragnarsson arkitekt og samstarfsmenn hans.
magnuss@mbl.is