Náttúrufræðingurinn - 1954, Blaðsíða 29

Steindór Steindórsson frá Hlöðum:
/
Flóra Grímseyjcir
Hinn lð.ágúst 1952 fór ég snögga ferð til Grimseyjar. Enda þótt
viðdvölin væri skömm, aðeins 4—5 klukkustundir, vannst mér tími
til að fara um mikinn hluta eyjarinnar og kanna þar gróður. Vitan-
lega var enginn tími til nákvæmra athugana, en ég gerði þar skrá
yfir þær tegundir, sem ég sá, og um það, hversu algengar þær væru.
Eldri gróðurathuganir úr Grímsey, sem mér eru kunnar, eru
þessar: Sumarið 1884 fór Þorvaldur Thoroddsen þangað. Hafði hann
álíka skamma viðdvöl í eynni og ég nú, og varði tíma sínum einkum
til jarðfræðiathugana. Nokkru safnaði hann þó af plöntum, skrá yfir
þær birtist löngu síðar eða 1902 í ritgerð um Grimsey í Geografisk
Tidsskrift. Er þar alls getið 27 tegunda háplantna. Fann ég þær all-
ar í sumar.
Árið 1898 fór Ólafur DavíÖsson grasaferð til Grímseyjar. Dvald-
ist hann þar um vikutíma og safnaði plöntum, bæði æðri og lægri.
Ekkert hefir hann skrifað um þá ferð sína, annað en bréfkafla til
Stefáns Stefánssonar, skólameistara. I bréfi því getur hann nokk-
urra tegunda, er hann fann þar, og eru þar á meðal tegundir, sem
ekki hafa fundizt síðan. Þess má geta, að hann fann þar í fyrsta
sinni á Islandi afbrigði af efjugrasi, Limosella aquatica var. borealis.
I bréfinu minnist hann einnig á nokkrar algengar íslenzkar tegundir,
sem vantar i Grimsey. Er þannig nokkuð á bréfi Ólafs að græða
grasafræðilega, þótt ekki sé það skrifað í fræðilegum tilgangi. Alls
hyggur hann, að háplöntutegundir í Grimsey séu um 120. Miklu
safnaði hann þar af lægri plöntum, mosum og skófum, og munu þau
söfn hafa verið notuð af öðrum mönnum. Háplöntur þær, sem Ólafur
safnaði i Grímsey, eru geymdar í Náttúrugripasafninu í Reykjavík,
en við hraða yfirferð skrár, sem ég gerði um plöntur safnsins fyrir
nokkrum árum, hefi ég þó ekki fundið ýkjamargar, en vera kann,
að mér hafi sézt yfir eitthvað. Hefi ég notað þá skrá við saman-
tekningu flórulista, sem er í vörzlu Náttúrugripasafnsins i Reykja-
vík og fylgdi grein þessari.