Menntamál - 01.06.1939, Blaðsíða 40

38
MENNTAMÁL
Formenn S. í. B. hafa orðið
BJARNl BJARNASON;
Nokkur orð um stofnun S. í. B.
Bjarni Bjarnason er fæddur 23. okt. 1889.
Hann stundaði nám í Flensborg 1907—09 og
útskrifaðist úr kennaraskólanum 1912. Árið
1913 fór hann utan, stundaði eitt ár nám við
Statens Gymnastik Institut í Kaupmanna-
höfn og lauk þar kennaraprófi í leikfimi og
sundi. B. B. varð kennari við bamaskólann
1 Hafnarfirði 1912 og skipaður skólastjóri þar
1918. Gegndi hann því starfi til 1929, er hann
gerðist skólastjóri héraðsskólans á Laugar-
vatni. Veturinn 1928—1929 ferðaðist hann um
Norðurlönd til þess að kynna sér skólamál.
Jafnframt kennara og skólastjórastarfi við barnaskóla Hafnarfjarðar
kenndi B. B. flest árin við Flensborgarskólann.
Bjarni Bjarnason var fremstur í flokki þeirra manna, sem beittu
sér fyrir stofnun S. í. B. Hann var kosinn fyrsti formaður sambands-
ins og endurkosinn í sjö ár, eða þangað til hann flutti sem skóla-
stjóri að Laugarvatni haustið 1929. Öll þessi ár hafði hann hærri
atkvæðatölu við stjórnarkjör en nokkur annar, og má af því nokkuð
ráða hvílíks trausts hann naut meðal kennarastéttarinnar. Hann
hefur einnig sýnt það, ekki síður eftir að hann hætti barnakennslu,
að hann er þessa trausts maklegur. Á Alþingi hefur hann verið hinn
öruggasti forvígismaður kennarastéttarinnar og skólamálanna. Hann
var t. d. hinn ötulasti baráttumaður fyrir samþykkt fræðslulaganna
1936. Ennfremur flutti hann, ásamt Jörundi Brynjólfssyni, og fékk
samþykkt frumvarp um endurbætur á réttindamálum kennara. B. B.
var kjörinn heiðursfélagi S. í. B. árið 1936. Ég vil við þetta tækifæri
flytja B. B. þakkir sambandsins fyrir öll hin ágætu störf, er hann
hefur þegar unnið, fyrir kennslumálin og kennarasamtökin í landinu.
S. Th.