Fréttablaðið - 16.06.2010, Blaðsíða 2
2 16. júní 2010 MIÐVIKUDAGUR
SPURNING DAGSINS
Hans, er mikið í kortunum?
„Í kortunum eru upplýsingar um
allt nema hvernig á að brjóta þau
saman.“
Kortagerðarmaðurinn Hans H. Hansen
hefur gert nýjan Íslandsatlas í kvarðanum
1:100.000.
HESTAMENNSKA „Það eru vísbend-
ingar um að veirusýkingar valdi
upphafi hrossapestarinnar og
streptokokkasýking valdi erfið-
ari hluta hennar,“ segir Halldór
Runólfsson yfirdýralæknir um
gang rannsókna á hrossapestinni
illræmdu. Halldór segir þessar
vísbendingar hafa komið fram í
rannsóknum á Keldum.
Í gær átti Halldór svo fund með
Susanne Braun og Birni Stein-
björnssyni dýralæknum. Susanne
hefur starfað sjálfstætt við hest-
alækningar á Íslandi um árabil.
Björn er dýralæknir hjá Mat-
vælastofnun, en hefur aðstoðað
Susanne í sínum frítíma.
„Þau hafa gert sjálfstæðar
athuganir á hrossapestinni og
skráð með skipulegum hætti
hesta sem þau hafa skoðað,“
útskýrir Halldór. „Þau gerðu mér
grein fyrir þessum athugunum,
þar sem þau telja fram komnar
vísbendingar um herpesveirusýk-
ingu í hrossunum, en það á eftir
að vinna meira úr þeim áður en
eitthvað er fullyrt. Upplýsingar
þeirra verða lagðar í púkkið, því
hér eru allir að vinna í sömu átt-
ina til að finna lausn. Hér hafa
greinst herpestegundir en það
þarf að elta þessar vísbending-
ar áður en því er slegið föstu að
eitthvað nýtt sé á ferðinni í þeim
efnum.“
Halldór segir enn uppi þá kenn-
ingu að veirusýkingin í upphafi
pestar veiki mótstöðu hrossanna
gegn streptokokkasýkingunni
sem komi eftir á og valdi graftr-
arkenndri vilsu úr nefi og hósta.
„Þetta er eitthvert samspil
sem mikið er lagt upp úr að rann-
saka,“ bætir Halldór við. Hann
segir nú liggja fyrir samþykkt
ríkisstjórnarinnar frá því í gær
um rannsóknarstyrk til Matvæla-
stofnunar og rannsóknastofunn-
ar á Keldum upp á tæpar tuttugu
milljónir.
„Nú geta menn haldið ótrauð-
ir áfram með þá samvinnu sem
verið hefur í gangi og fram undan
er hjá Matvælastofnun og á Keld-
um. Rafeindasmásjáin á Keldum
hefur nú verið biluð um skeið, en
hún er ómetanlegt tæki við þær
rannsóknir sem nú eru í gangi.
Nú hefur fengist fjármagn til að
gera við hana. Það verður lögð
áhersla á að vinna eins hratt og
hægt er því menn hafa áhyggjur
af næsta vetri og að pestin geti
þá magnast aftur upp.“
jss@frettabladid.is
Grunur um herpes-
sýkingar í hestum
Tveir dýralæknar telja fram komnar vísbendingar um herpesveirusýkingu í
hrossum sem veikst hafa af hestapestinni, að sögn yfirdýralæknis. Hann segir
rannsóknum hraðað. 20 milljón króna rannsóknarstyrkur var veittur í gær.
HESTAPESTIN Rannsóknarstyrkur sem ríkisstjórnin samþykkti að veita Keldum og
Matvælastofnun til frekari rannsókna á hestapestinni kemur að góðum notum, að
sögn yfirdýralæknis. FRETTABLADLD/GVA
ÞÝSKALAND, AP Maður vopnaður
skotvopni, líklega skammbyssu,
hélt viðskiptavinum og starfs-
mönnum H&M fataverslunar í
Leipzig í Þýskalandi í gíslingu í
nokkrar klukkustundir í gær.
Maðurinn gafst upp eftir
umsátur lögreglu og var hand-
tekinn. Talsmaður lögreglu sagði
manninn líklega þjást af einhvers
konar geðröskun. Ekki var upp-
lýst í gær hversu mörgum maður-
inn hélt í gíslingu, en engan sak-
aði við gíslatökuna.
Lögregla var með mikinn við-
búnað vegna gíslatökunnar, og
lokaði af stórum hluta miðborgar
Leipzig meðan á umsátrinu stóð.
- bj
Tók gísla í H&M verslun:
Gafst upp og
sleppti gíslum
GÍSLAR Þungvopnaðir sérsveitarmenn
sátu um gíslatökumanninn, en hann
gafst upp án þess að nota vopn sitt.
FRÉTTABLAÐIÐ/AP
ALÞINGI Forsætisráðherra seg-
ist mjög ánægð með samkomulag
formanna flokkanna, um þinglok,
sem náðist í gær. Samkvæmt því er
stefnt að þinglokum í dag.
„Það náðist niðurstaða í þessum
stærstu deilumálum. Komið var í
veg fyrir að vatnalögin taki gildi,
sem hefði styrkt stöðu landeigenda
á kostnað almennings,“ segir hún.
Jóhanna vonaðist í gær að til-
laga um stjórnlagaþing yrði sam-
þykkt í nótt. Það væri ekki útþynnt
frumvarp, eins og haldið hefur
verið fram. „Það hefur frekar verið
styrkt en hitt. Ég held að þetta feli
í sér að fólkið fái nýja stjórnarskrá,
sem lengi hefur verið beðið eftir,“
segir hún.
Jóhanna fagnar mjög sátt um
aðgerðir vegna skuldavanda heimil-
anna, en sérstakur þingfundur verð-
ur um þau mál á fimmtudag í næstu
viku. Þá verður til að mynda rætt
um stofnun umboðsmanns skuldara
og nánari útfærslu á greiðsluaðlög-
un ásamt frumvarpi um bílalán.
Þórunn Sveinbjarnardóttir, for-
maður þingflokks Samfylkingar,
segir tvær ástæður fyrir því að
heimilispakkinn sé ekki afgreidd-
ur strax.
„Það hefur þurft að
fá yfirlestur frá réttar-
fars nefnd og svo er að
falla hæstaréttardómur
sem hefur áhrif á þessi
mál,“ segir hún og vísar til
væntanlegs dóms þar sem
skorið verður úr um lög-
mæti lána í erlendum
gjaldeyri.
Á yfirstandandi þingi
skal einnig afgreiða
frumvarp um varnar-
málalög, með breyting-
um. Rammaáætlun fer
í nefnd og frumvarp um
breytingar á stjórnarráðinu einn-
ig. Forsætisráðherra minnir á að
rannsóknarnefnd Alþingis hafi
lagt mikla áherslu á fækkun og
styrkingu ráðuneyta í rannsókn-
arskýrslunni.
Þórunn Sveinbjarnar-
dóttir segir að væntanlega
náist að ljúka málum um
miðjan daginn í dag. „Við
verðum hér fram á nótt
ef með þarf,“ sagði
hún í gærkvöldi. - kóþ
Aðgerðir til aðstoðar skuldugum heimilum eru háðar niðurstöðu Hæstaréttar um lögmæti gengislána:
Ný stjórnarskrá í vændum og vatnalög bíða
VIÐSKIPTI Slitastjórn Straums telur að samn-
ingur sem Íbúðalánasjóður gerði við fjár-
festingarbankann eftir fall bankanna í okt-
óber 2008 fela í sér ívilnun fyrir sjóðinn og
krefst riftunar á honum. Samningurinn fól
í sér að Straumur lokaði skuldabréfasamn-
ingum, sem Íbúðalánasjóður hafði gert við
bankana áður en skilanefndir tóku þá yfir.
Samningurinn hljóðar upp á milli þrjá til
fjóra milljarða króna, sem Íbúðalánasjóð-
ur gæti þurft að greiða til baka. „Við teljum
samninginn riftanlegan samkvæmt þeim
reglum sem gilda um slitin á Straumi,“ segir
Þórður Hall, sem sæti á í slitastjórn fjárfest-
ingarbankans.
„Við höfnum þessu algjörlega og teljum
ekki koma til greina að rifta samningnum,“
segir Guðmundur Bjarnason, framkvæmda-
stjóri Íbúðalánasjóðs. Hann segir engin rök
fyrir áliti slitastjórnar Straums. Þvert á álitið
hafi báðir aðilar talið samninginn hagstæðan
á sínum tíma. Standi slitastjórnin fast á sínu
verði að láta reyna á málið fyrir dómstólum.
Ekki er gert ráð fyrir þessum bakreikningi í
bókum Íbúðalánasjóðs, að sögn Guðmundar.
Slitastjórnin kynnti kröfuhöfum í gær
helstu niðurstöður rannsóknar endurskoð-
endafyrirtækisins PriceWaterhouseCoopers,
á viðskiptum bankans í aðdraganda falls hans
í fyrravor og drög að nauðasamningum, sem
fela í sér að kröfuhafar taka bankann yfir.
Rannsóknin var gerð í því augnamiði að
kanna hvort finna megi viðskipti, útlán og
gjörninga sem megi rifta. Viðskipti bank-
ans við Björgólf Thor Björgólfsson, fyrrver-
andi stjórnarformann fjárfestingarbankans,
og föður hans Björgólf Guðmundsson og félög
sem þeim eru tengd voru skoðuð sérstaklega.
Fram kemur í skýrslunni að lánveitingar
til feðganna hafi farið yfir mörk um stórar
áhættuskuldbindingar. Slitastjórnin er þessu
ósammála. „Við teljum að þeir [innskot: PwC]
hafi spyrt saman hluti sem ekki áttu saman,“
segir Þórður en slitastjórn telur viðskipti
bankans fyrir fall hans innan marka. - jab
SÍÐASTI FUNDURINN William Fall var forstjóri Straums
áður en skilanefnd tók hann yfir í fyrravor. Slitastjórn
telur gjörninga hans fyrir fallið í lagi. FRÉTTABLAÐIÐ/GVA
Slitastjórn Straums telur lánveitingar til félaga sem tengjast Björgólfsfeðgum í lagi:
Vill rifta samningi við Íbúðalánasjóð
DÓMSMÁL Hæstiréttur hefur fellt
úr gildi úrskurð héraðsdóms
og úrskurðað að þýski bankinn
Dekabank eigi að fá efnismeð-
ferð í héraðsdómi í máli sínu
gegn íslenska ríkinu. Héraðsdóm-
ur Reykjavíkur hafði vísað mál-
inu frá.
Dekabank var einn af stærstu
lánardrottnum Glitnis og er
meðal helstu kröfuhafa. Bank-
inn telur fjölmörg mistök hafa
verið gerð af hálfu stjórnvalda
í aðdraganda bankahrunsins og
höfðaði skaðabótamál á hendur
íslenska ríkinu. Krafa hans hljóð-
ar upp á 338 milljónir evra, um
53 milljarða króna. - jab
Dekabank í mál við ríkið:
Krefst 53 millj-
arða króna
JÓHANNA
SIGURÐARDÓTTIR
NEYTENDUR N1 lækkaði listaverð á
95 oktana bensíni um ellefu krón-
ur í gær. Algengasta hæsta verðið
hjá olíuversluninni fór við það úr
201 krónu í fyrradag niður í 188,8
krónur. Hæsta
verðið var hjá
Skeljungi á höf-
uðborgarsvæð-
inu í gær, 192,5
krónur á lítr-
ann.
„Við höfum
breytt um
stefnu og
ætlum að bjóða
sama verð á
mönnuðum
stöðvum og ómönnuðum,“ segir
Hermann Guðmundsson, for-
stjóri N1. Hann segir þetta nýj-
ung hjá félaginu. Erfitt sé að spá
því hvort verðið haldist lengi
á þessu róli. „Það fer allt eftir
því hvað þetta verðstríð stend-
ur lengi yfir. Verðið gæti verið
svona í allt sumar,“ segir hann
en ítrekar að það þyrfti að vera
hærra. - jab
N1 lækkar listaverð á bensíni:
Fer niður um
ellefu krónur
HERMANN
GUÐMUNDSSON
NÁTTÚRA Aldrei hafa fleiri frjó-
korn mælst í Reykjavík en í apríl
og maí síðastliðnum. Þá mældust
2000 frjókorn á rúmmetra á sól-
arhring. Þetta kemur fram í frjó-
mælingum Náttúrufræðistofnun-
ar Íslands.
Mestu munar um birkifrjó, sem
hafa ekki verið fleiri síðan árið
2006. Asparfrjó voru líka yfir
meðallagi, en þau voru þó færri
en verið hefur undanfarin ár.
Frjótalan var um og yfir 300
fjóra daga í röð í lok maí. Það
er afar óvanalegt. Það er vegna
þess að tíðarfar var einstaklega
hagstætt fyrir frjódreifingu í lok
maí, en þá var þurrviðri og hlýtt.
- þeb
Náttúrufræðistofnun Íslands:
Metfjöldi frjó-
korna í loftinu
SJÁVARÚTVEGUR Línu- og hand-
færabáturinn, Eyjólfur Ólafsson
GK-38 sem leit hófst að klukkan
hálf níu í gærkvöldi fannst rúmri
klukkustund síðar um fjörutíu
sjómílur suðvestur af Reykjanesi,
eða á svipuðum slóðum og þegar
síðast heyrðist til hans.
Varðstjórar Landhelgisgæsl-
unnar höfðu ítrekað reynt að ná
sambandi við bátinn en þyrla
Landhelgisgæslunnar og varð-
skipið Týr, auk báta á Reykjanesi,
tóku þátt í leit að honum.
Bátnum var vísað til hafnar
þar sem hann gerðist brotlegur
við þrenn lög. Báturinn er gerð-
ur út frá Sandgerði. Fimm ár eru
síðan hans var leitað á svipuðum
slóðum. - jab
Handfærabátur fundinn:
Síðast leitað að
bátnum fyrir
fimm árum