Fréttablaðið - 06.12.2010, Blaðsíða 29

híbýli og viðhald ● fréttablaðið ●MÁNUDAGUR 6. DESEMBER 2010 3
Baldur Öxdal veitingamaður
heillast af gömlum húsum.
Hann gerir sjálfur upp hið
glæsilega Halldórshús á
Bakkafirði en einnig tengjast
honum önnur hús sem bjargað
hefur verið frá niðurrifi.
Baldur sá Halldórshús, eða gamla
kaupfélagshúsið eins og það er líka
kallað, fyrst árið 2000. „Ég var þá
að koma af hreindýraveiðum á
Austurlandi og var á leið heim. Þar
sem ég hafði aldrei komið á Bakka-
fjörð ákvað ég að renna í gegnum
þorpið. Þá sá ég þetta stórkost-
lega hús sem stóð frammi á tanga,“
lýsir Baldur sem hreifst af stað-
setningu hússins og sá glæsileika
þess þrátt fyrir að það væri illa
farið af viðhaldsleysi. „Þetta hús
festist í hausnum á mér.“
Árin liðu og alltaf hugsaði Bald-
ur til hússins. „Ég sá fyrir mér að
gaman væri að eiga svona hús
þegar ég væri orðinn gamall karl.
Þar gæti ég í ellinni verið með veit-
ingastað, kaffihús eða aðra ferða-
þjónustu,“ segir Baldur sem finnst
Bakkafjörður hluti af hinu „gamla
Íslandi“ þar sem gömlu gildin eru
höfð að leiðarljósi.
„Svo var það í janúar 2008 að
ég spyr frænda minn, sem var að
vinna verkefni fyrir Langanes-
byggð, um húsið. Hann segir mér
að séra Brynhildur á Skeggjastöð-
um eigi það og að það sé falt,“ segir
Baldur sem hefur alla tíð búið í
Reykjavík. „Ég var þá orðinn svo
leiður á þessari græðgi sem hér
ríkir að ég gerði mér grein fyrir
að ég vildi ekki eldast í borginni.“
Í kjölfarið hélt Baldur fund með
Brynhildi. „Við héldum svo bjart-
sýnismatarboð því við vildum að
samfélagið þarna fyrir norðan
horfði á björtu hliðarnar,“ segir
Baldur sem keypti af Brynhildi
húsið og hófst handa við uppbygg-
ingu þess.
„Ég fékk formann húsafriðun-
arnefndar til mín og þá kom í ljós
að húsið var nánast óskemmt. Við-
urinn var svo góður,“ segir Baldur
en fyrsti liðurinn í að bjarga hús-
inu var að skipta um þak. Baldur
stefnir á að klæða húsið að utan
næsta sumar. „Svo vona ég að
húsið verði klárt á 110 ára afmæli
þess árið 2012.“
Á sama tíma og hann festi kaup
á Halldórshúsi, keypti Baldur líka
gamlan bóndabæ, Lindarbrekku.
„Hann var einu sinni verbúð og
húsinu var illa við haldið. Það hefur
nú verið gert upp og er stefnan að
reka þar gistiheimili,“ segir Bald-
ur. Við Lindarbrekku standa einn-
ig gömul útihús. „Annar maður átti
þau hús og hugðist rífa þau. Mér
fannst það ótækt og náði að kaupa
þau af honum á tíu þúsund krónur
og sparaði honum þannig mikinn
förgunarkostnað.“
Baldur heillast af gömlum
húsum enda hefur hann nánast
alla tíð búið í slíkum. „Það er ein-
hver sjarmi yfir þeim,“ segir Bald-
ur sem rekur meðal annars veit-
ingahúsið Lindina í glæsilegu húsi
á Laugarvatni. „Því húsi var bjarg-
að frá niðurrifi af Lindarfélag-
inu,“ útskýrir hann. Þá býr Baldur
í öðru gömlu húsi sem einnig var
bjargað. „Kalli í Pelsinum bjargaði
Tryggvagötu 8 sem er með fallegri
húsum bæjarins í dag.“
Baldur segir allt samfélagið
græða á því þegar gömul hús eru
gerð upp. „Það leiðir til þess að
aðrir vilja gera eitthvað fyrir sín
hús. Góðir hlutir gerast þegar fólk
byrjar að framkvæma.“ - sg
Lætur góðu verkin tala
Baldur Öxdal matreiðslumeistari heillast af gömlum húsum með sögu. Hér er hann fyrir framan Tryggvagötu 8 þar sem hann býr í
dag. FRÉTTABLAÐIÐ/GVA
Halldórshús stendur á fallegum stað úti á tanga.
Lindarbrekka er gamall bóndabær sem Baldur hefur gert upp.
Halldórshús, eða gamla kaupfélagshúsið, verður glæsilegt þegar viðgerð lýkur.
Veitingahúsið Lindin á Laugarvatni er í gömlu húsi sem til stóð að rífa.
MYND/ÓSK EIRÍKSDÓTTIR