Siglingamál - 01.03.1978, Page 15

15
Störf IMCO og framtíð.
Hér að framan hefur verið lýst í stuttu
máli þeim helstu þáttum, sem eru megin
vettvangur starfs Alþjóðasiglingamála-
stofnunarinnar. Þetta stutta yfirlit er þó
væntanlega nægjanlegt til að gefa nokkra
hugmynd um hversu víðtæk þessi verk-
efni eru. Þessi tvítuga stofnun Sameinuðu
þjóðanna er ekki meðal þeirra stærstu,
en því hefur verið haldið fram að Al-
þjóðasiglingamálastofnunin sé meðal
þeirra, sem starfsömust er miðað við
stærð. Aðalstöðvar IMCO eru nú í mið-
hluta London, nr. 101—104 við Piccadilly,
sem er 9 hæða bygging. Þó hefur IMCO
fyrir löngu síðan sprengt þann ramma,
sem þessi fagra og friðaða mikla bygging
er, og hluti deilda stofnunarinnar eru nú
í viðbótarhúsnæði í borginni. Auk þess
eru salir í núverandi aðalstöðvum of litlir
til að hægt sé þar að halda þing IMCO
lengur, og verður því að leigja aðra sali
til þinghalds IMCO og til ráðstefnuhalds.
Nú er hins vegar hafinn undirbúningur
að byggingu á nýju IMCO húsi í London,
sem verður á bökkum Thames-fljóts. Þar
verður aðstaða öll önnur en nú er fyrir
þróun þessarar stofnunar á næstu ára-
tugum.
Ekki er þó gert ráð fyrir að nýju aðal-
stöðvar IMCO verði tilbúnar fyrr en eftir
ein 3—4 ár.
Þing IMCO hefur nú ákveðið að breyta
heiti þessarar alþjóðastofnunar úr Inter-
governmental Maritime Consultative
Organization, sem skammstaðað er
IMCO, í heitið International Maritime
Organization, sem mun verða skamm-
stafað IMO á enskri tungu.
IMCO heitið er orðið tamt þeim, sem
því hafa kynnst, en tafsamt hefur stund-
um reynst að skýra fyrir ókunnugum þetta
nafn. Þess vegna m. a. er nú fyrirhugað
að stytta heitið og gera einfaldara, og
enginn efi er á því, að heitið IMO á eftir
að verða eins tamt í munni, vel þekkt og
eins viðurkennt meðal allra þeirra, sem
láta sig siglingar og öryggi á sjó og varn-
ir gegn mengun sjávar varða, eins og
IMCO er nú. Hjálmar R. BárSarson.