Læknablaðið - 15.11.1986, Side 9

LÆKNABLAÐIÐ
291
Frá vinstri: Jóhanna F. Jóhannesdóttir hjúkrunarforstjóri, Guðjón Guðmundsson yfirlæknir, Ari Jóhannesson
yfirlceknir og Ásthildur Einarsdóttir hjúkrunarframkvœmdastjóri.
Byggingarsaga Sjúkrahúss Akraness
Upphaf sjúkrahúss á Akranesi má rekja til ársins
1915, en það ár stofnaði stúkan Akurblóm
sérstakan sjóð, Sjúkraskýlissjóð, og fékk hann
skipulagsskrá þá um vorið, eins og segir í grein
Páls Gíslasonar »Sjúkrahús Akraness«, í
Læknablaðinu öðru tölublaði ársins'1960.
Hafist var handa við byggingu sjúkrahússins 1945
og verkinu lokið árið 1952. Það ár tók Sjúkrahús
Akraness til starfa og var tekið á móti fyrsta
sjúklingi þann 4. júní 1952, samkvæmt
áðurnefndri grein Páls Gíslasonar. Fullbúið tók
sjúkrahúsið 25 sjúklinga í rúm, en einnig var íbúð
læknis inni í sjúkrahúsbyggingunni. Árið 1960
var lokið við byggingu sérstaks
starfsmannabústaðar fyrir lækni og starfsfólk,
fjölgaði rúmum þar með um átta og voru orðin
alls 33.
Árið 1963 hófust framkvæmdir við nýja
aðalbyggingu sjúkrahússins. Fyrsti hluti var
tekinn í notkun árið 1968 og var það
handlækningadeild. Hélt svo fram að hver áfangi
fyrir sig var tekinn í notkun um leið og honum var
lokið. Þannig komu í gagnið röntgendeild,
biðstofur, viðtalsstofur, og eldhús. Árið 1977
kom langþráð lyflækningadeild, en í grein sinni
um Sjúkrahús Akraness í Læknablaðinu segir
Páll Gíslason: »Framtíðarvonir okkar hér eru
(þess vegna) þær, að einnig sé hægt að fá betri
skilyrði fyrir meðferð Iyflækningasjúklinga.«
Árið 1978 voru skurðstofa, sótthreinsun og
fæðingadeild tekin í notkun og voru rúm fyrir
sjúklinga þá orðin alls 95. Var að heyra á læknum
sjúkrahússins að þeir hefðu litla löngun að hverfa
aftur til þeirra aðstæðna er ríktu á skurðstofu
gamla sjúkrahússins.
Samt er sjúkrahúsið ekki enn fullfrágengið, þótt
23 ár séu liðin frá því hafist var handa. Eftir er að
ganga frá aðallyftu, súr- og sogkerfi er ókomið,
vararafstöð vantar og brennsluofn,
krufningsaðstaða er léleg og líkgeymslu vantar.
Árið 1977 hafði gamli spítalinn verið gerður að
langlegudeild og þjónar hann því hlutverki fyrst
og fremst. Skipting rúma á milli deilda er þannig
að 30 rúm eru á hjúkrunar- og
endurhæfingardeild, 30 rúm á lyflækningadeild,
19 á handlækningadeild og 16 á kvensjúkdóma-
og fæðingadeild.