Sveitarstjórnarmál - 01.10.1984, Síða 10

ISAMT ALIÐI
„Fljótahreppur“
Samtal við Georg Hermannsson, vara-
oddvita og hreppstjóra Haganeshrepps
Samhliða síðustu hreppsnefndarkosningum í
Haganeshreppi og í Holtshreppi í Skagafjarðarsýslu var
könnuð afstaða kjósenda til sameiningar þessara hreppa
í eitt sveitarfélag. Hér er um að ræða svokallaða
Fljótahreppa, sem óhætt er að telja eitt og sama
byggðarlagið, jafnan nefnt Fljótin. í skoðanakönnun
þessari voru þeir, sem tóku þátt í
hreppsnefndarkosningunum, spurðir: „Ertu með eða á
móti sameiningu Holtshrepps og Haganeshrepps?"
Úrslit urðu þau, að í báðum hreppunum var meiri hluti
kjósenda samþykkur sameiningu hreppanna. í
Haganeshreppi voru 30 meðmæltir, 6 andvígir, en einn
skilaði auðum seðli. í Holtshreppi voru 17 með, en 14 á
móti. „Skoðanakönnun þessari var skellt á með stuttum
fyrirvara án undangenginnar umræðu meðal íbúa
hreppanna," sagði Valberg Hannesson, oddviti
Haganeshrepps, er hann skýrði Sveitarstjórnarmálum
frá niðurstöðum skoðanakönnunarinnar í símtali. „En
ég geri ráð fyrir, að málið nái fram að ganga á
kjörtímabilinu, og væri þörf á að ræða það nánar og
kynna, áður en endanlega verður látið reyna á afstöðu
íbúanna, því tekið var skýrt fram, að skoðanakönnunin
1982 væri ekki á nokkurn hátt bindandi. En málefni
þessara hreppa eru svo samtvinnuð, að í raun yrði
nánast engin breyting á, þótt hrepparnir yrðu
sameinaðir."
Þegar Georg Hermannsson, varaoddviti og
hreppstjóri Haganeshrepps, kom á skrifstofu
sambandsins á dögunum, var hann tekinn tali um
framhald sameiningarmálsins og um Fljótin fyrr og nú,
þetta sérstæða byggðarlag, sem fáir þekkja, nema af
afspurn.
„Stærsta sameiginlega málefni hreppanna nú,“ segir
Georg, „er bygging skólahúss að Sólgörðum, en svo
heitir skólinn, sem reistur var í landi jarðarinnar Barðs í
Haganeshreppi á árunum 1939 og 1940 sem
heimavistarskóli beggja hreppanna. Samstarf þeirra um
skólann hefur gefizt vel, og nú er í smíðum nýtt
skólahús, sem er um 500 m2 að stærð. Þar eru fyrir fleiri
mannvirki, sem hrepparnir eiga sameiginlega, s.s.
skólastjórahús og sundlaug."
— Er jarðhiti í Barðslandi?
„Já, þar er heitur hver. Vatn úr honum er notað til
upphitunar á öllum húsum að Sólgörðum og í
sundlaugina. Á staðnum var boruð grunn hola, þegar
sundlaugin var byggð á árunum 1972-1974. Pá fékkst
nægilegt vatn til hennar, og síðan hefur ekki verið reynt
að bora frekar."
— Var sundkennsla fyrr á tímum í Barðslaug?
„Sundlaug hefur verið í Barðslandi í Fljótum um
langan aldur. Heimildir eru til um, að þar hafi verið
byrjað að kenna sund árið 1880, og mun það vera með
fyrstu stöðum norðanlands. Þó var byrjuð sundkennsla
nokkru áður við Steinstaðalaug í Lýtingsstaðahreppi,
eins og fram kemur í 3. tbl. Sveitarstjórnarmála í ár.
Fyrst var þar aðeins um að ræða fyrirhleðslu úr torfi, en
síðan byggðu ungmennafélagar í Haganeshreppi
steinsteypta laug, sem lengi var notuð eða á árunum frá
1930 til 1970. Var sú laug geysimikið notuð á þessu
árabili. M.a. komu unglingar frá nágrannastöðunum,
einkum Siglufirði og Hofsósi, á hverju vori og sumri til
þess að læra sund. Fjölgaði þá heldur betur í sveitinni,
og var oft líflegt við sundkennsluna, sem unglingarnir
tóku sem leik miklu fremur en nám. Ég tek líka eftir
því, þegar ég bregð mér í sund hér í Reykjavík, að þar
sé ég fjöldann allan af miðaldra fólki, sem tók sín fyrstu
sundtök í gömlu lauginni á Barði, og virðast þetta vera
fastagestir í laugunum enn þann dag í dag. Sundlaugin
að Sólgörðum er opin einn til tvo daga í viku allan ársins
hring og er mikið notuð, bæði til sundkennslu á vetrum
og af almenningi á sumrin, en þá er hún opin á hverju
kvöldi og um helgar.“
200 SVEITARSTJÓRNARMÁL