Morgunblaðið - 16.04.2014, Síða 40

40 MENNING
MORGUNBLAÐIÐ MIÐVIKUDAGUR 16. APRÍL 2014
Victor Wainwright var í fyrra út-
nefndur besti blúspíanóleikari
Bandaríkjanna, hlaut verðlaun
kennd við Pinetop heitinn Perkins.
Wainwright kemur víða við í blúsn-
um, jafnvígur á trega, boogie woog-
ie, honky tonk og rokk og ról og fjör-
mikill á sviði. Því fá gestir
Blúshátíðar í Reykjavík að kynnast í
kvöld þegar Wainwright treður upp
á Reykjavík Hilton Nordica kl. 20
með samstarfsmanni sínum og
landa, blúsgítarleikaranum Nick
Black, Blússveit Jonna Ólafs, Spott-
unum, Johnny and the Rest og úr-
vali efnilegra íslenskra blúsmanna.
Lærði af föður sínum og afa
Wainwright er ekki gamall í hett-
unni, fæddur árið 1981, og segist
hann hafa lært að spila og syngja af
föður sínum og afa sem báðir eru
tónlistarmenn. „Það var boogie
woogie-, honky tonk- og rokk og ról-
píanóleikur og seinna fékk ég áhuga
á mönnum á borð við Pinetop Perk-
ins og BB King,“ segir Wainwright
um tónlistaruppeldið og blús-
áhugann.
– Það hlýtur þá að vera mikill
heiður fyrir þig að hljóta Pinetop
Perkins-verðlaunin?
„Jú, maður minn, það er mikill
heiður og forréttindi og því fylgir
mikil ábyrgð,“ segir Wainwright.
– Ertu yngsti maðurinn sem hefur
hlotið þessi verðlaun, aðeins 32 ára?
„Ég veit það ekki, kannski,“ segir
Wainwright og hlær rámum hlátri.
Wainwright segist afar spenntur
fyrir því að troða upp með íslensk-
um blúsmönnum í fyrsta sinn og
segist hafa heyrt af því að þeir séu
frábærir, enda hafi þeir leikið með
Pinetop Perkins. Wainwright er
mikill orkubolti, eins og sjá má af
tónleikaupptökum á YouTube og
spurður að því hvaðan þessi orka
komi segist hann sækja hana í tón-
leikagesti. „Það er eins gott að ég
taki vítamínin mín,“ bætir hann svo
við kíminn.
– Hvað á að spila, einhverjir
standardar sem allir ættu að kann-
ast við?
„Já, kannski „Minnie the Mooch-
er“,“ segir Wainwright og hlær, enn
og aftur. Frekari upplýsingar um
hátíðina má finna á blues.is.
helgisnaer@mbl.is
„Það er eins gott að
ég taki vítamínin mín“
Morgunblaðið/Kristinn
Kraftmiklir Victor Wainwright og Nick Black tóku lagið á Reykjavík Hilton Nordica í gær og var það mikið stuð.
 Victor Wainwright leikur á Blúshátíð í Reykjavík í kvöld
Fyrirfram hljómaði hug-myndin að Hamlet litlasem brilljant, enda frá-bært framtak af hálfu
Borgarleikhússins að kynna Hamlet
fyrir unglingum í styttri og að-
gengilegri útgáfu. Að sýningu lok-
inni gat maður hins vegar haft
ákveðnar efasemdir um að flókinn
söguþráðurinn og heimspekilegar
pælingar kæmust nægilega vel til
skila til markhópsins, þrátt fyrir til-
raunir leikstjóra og leikhópsins til
að gera framvindunni skýr og
skemmtileg skil.
Sýningin hófst af miklum krafti
þar sem Kristjana Stefánsdóttir
þandi raddböndin í flottu frum-
sömdu rokklagi meðan Kristín Þóra
Haraldsdóttir og Sigurður Þór Ósk-
arsson skylmdust með flottum
danstöktum þess á milli sem þau
notuðu sverð sín sem gæðinga.
Leikarar sýningarinnar notuðu
óspart eintöl sín til að tala beint til
áhorfenda og fór vel á því.
Bergur Þór Ingólfsson leikstjóri
og höfundur handrits hefur valið að
fækka persónum verksins og ein-
falda söguna. Þannig var vel til
fundið að færa eintal Kládíusar í
skriftarstólnum og hafa það fram-
arlega í verkinu til að útskýra hik
Hamlets litla og einnig kom það vel
út að láta Hamlet litla ekki hafna
Ófelíu fyrr en að loknu leikritinu í
leikritinu. Aðrar textalegar ákvarð-
anir og umskrif voru hins vegar
ekki eins vel heppnuð. Sem dæmi
varð endurskrifuð einræða Ófelíu
dálítið melódramatísk og löng og
draga hefði mátt úr predikunartón-
inum í lokaeintali Hamlets litla.
Aðeins þrír leikarar túlkuðu allar
persónur verksins, en vel var til
fundið að notast við brúður í lyk-
ilhlutverkum. Þannig vakti það kát-
ínu að sjá málverk af William
Shakespeare fara með hlutverk Pó-
loníusar og góð hugmynd að láta
vofu Hamlets eldri, þ.e. myrta kon-
ungsins, vera túlkaða með haus-
kúpu. Kládíus var brúða í fullri
mannsstærð sem leikararnir skipt-
ust á að stjórna með áhrifaríkum
hætti, en Sigríður Sunna Reyn-
isdóttir á heiðurinn af bæði öllum
brúðum og sjónrænni umgjörð.
Leikmyndin samanstóð af rörum
sem minntu helst á pípur í orgeli
sem geymdu hina ólíku leikmuni, en
píanó öðrum megin á sviðinu og
orgel hinum megin rammaði sviðið
inn. Búningar voru smekklegir og
gáfu persónur skýrt til kynna.
Skemmtilegust var samt brynja La-
ertesar.
Sigurður Þór var flottur í tit-
ilhlutverkinu og kom örvæntingu og
reiði Hamlets litla vel til skila.
Söngatriðið eftir fund Hamlets litla
með vofunni var geysilega flott og
engu líkara en að sviðshreyfingar í
bland við ljósin blekktu áhorfendur
til að halda að leiksviðið væri hring-
svið á ferð. Kristín Þóra brá sér í
hlutverk systkinanna Ófelíu og La-
ertesar sem og Póloníusar föður
þeirra auk þess sem hún stjórnaði
hauskúpunni. Hún hefði mátt draga
aðeins úr grátstöfunum í einræðu
Ófelíu, en sýndi skemmtilega takta í
hlutverki Laertesar. Kristjana
brast reglulega í söng með áhrifa-
ríkum hætti auk þess sem hún túlk-
aði bæði Geirþrúði og Kládíus sem
upplifði sig sem „brúðu örlaganna“
við mikla kátínu áhorfenda.
Orkustigið í sýningunni var hátt,
en á stundum hefði leikstjórinn
þurft að beisla þessa orku betur og
koma í veg fyrir að hún yrði að of
miklum æsingi og hamagangi, eins
og t.d. var raunin í brúðuleikritinu
sem Hamlet litli notaði til að svið-
setja leikritið í leikritinu í því skyni
að sanna sekt Kládíusar. Hamlet
litli var fyrir vikið svolítið brokk-
geng sýning þar sem bestu sen-
urnar risu hátt yfir meðalmennsk-
una en datt þess á milli niður í
senum sem hefði þurft að vinna
markvissar með dramatúrgískum
gleraugum.
Brokkgengur Hamlet
Ljósmynd/Grímur Bjarnason
Orkumikil „Hamlet litli var fyrir vikið svolítið brokkgeng sýning þar sem bestu senurnar risu hátt yfir meðalmennsk-
una en datt þess á milli niður í senum sem hefði þurft að vinna markvissar með dramatúrgískum gleraugum.“
Borgarleikhúsið
Hamlet litli bbbmn
Handrit eftir Berg Þór Ingólfsson, en
byggt á Hamlet eftir William Shake-
speare. Leikstjórn: Bergur Þór Ingólfs-
son. Leikmynd, leikbrúður og búningar:
Sigríður Sunna Reynisdóttir. Lýsing:
Garðar Borgþórsson. Tónlist: Kristjana
Stefánsdóttir. Leikarar: Kristín Þóra
Haraldsdóttir, Kristjana Stefánsdóttir
og Sigurður Þór Óskarsson. Frumsýning
12. apríl 2014 á Litla sviði Borgarleik-
hússins.
SILJA BJÖRK
HULDUDÓTTIR
LEIKLIST