Skessuhorn - 08.08.2007, Blaðsíða 4

4 MIÐVIKUDAGUR 8. ÁGÚST
Kirkjubraut 54-56 - Akranesi Sími: 433 5500
Skessuhorn kemur út alla miðvikudaga. Skilafrestur auglýsinga er kl. 14:00 á
þriðjudögum. Auglýsendum er bent á að panta auglýsingapláss tímanlega.
Skilafrestur smáauglýsinga er til 12:00 á þriðjudögum.
Blaðið er gefið út í 3.000 eintökum og selt til áskrifenda og í lausasölu.
Áskriftarverð er 1400 krónur með vsk á mánuði en krónur 1300 sé greitt
með greiðslukorti. Elli­ og örorkulíf.þ. greiða kr. 1050. Verð í lausasölu er
400 kr.
SKRIFSTOFA BLAÐSINS ER OPIN KL. 9-16 ALLA VIRKA DAGA
Útgefandi: Skessuhorn ehf. ­ 433 5500 skessuhorn@skessuhorn.is
Ritstj. og ábm. Magnús Magnúss. 894 8998 magnus@skessuhorn.is
Blaðamenn:
Alfons Finnsson, Snæfellsnesi 893 4239
Birna G Konráðsdóttir 864­5404 birna@skessuhorn.is
Halldór Örn Gunnarsson 822 5661 hog@skessuhorn.is
Kolbeinn Ó. Proppé 659­0860 kolbeinn@skessuhorn.is
Magnús Magnúss. 894 8998 magnus@skessuhorn.is
Augl. og dreifing:
Hekla Gunnarsd. 821 5669 hekla@skessuhorn.is
Umbrot:
Ómar Örn Sigurðsson augl@skessuhorn.is
Bókhald og innheimta:
Guðbjörg Ólafsdóttir bokhald@skessuhorn.is
Leiðarinn
Árlega síðla sumars sprettur upp mikil umræða um skattamál Íslendinga
enda eru skattskrár þá lagðar fram í umdæmum landsins öllum til skoðunar.
Menn velta sér óspart upp úr þessum upplýsingum þá tíu daga sem
skattskráin liggur frammi; hverjir borga háa skatta og hverjir virðast svíkjast
undan skyldum sínum við að greiða samfélaginu sitt. Ungir hægri sinnaðir
menn telja það vanvirðu við frelsi einstaklingsins að forvitnir aðilar og
fjölmiðlar geti kafað ofan í þessar upplýsingar, meðan þeim vinstri sinnuðu
finnst það meira en sjálfsagt að einu sinni á ári liggi það fyrir hverjar tekjur
einstaklinga eru. Ég hef lengi haft þá skoðun að menn eigi að vera stoltir af
því að greiða skatta, því hærri því betra. Þá hef ég einnig haldið því fram að
ef allir, ekki bara sumir, greiddu skatta í réttu hlutfalli við tekjur, þá myndu
þeir með hreinu samviskuna á endanum borga minna. Því er opinberun
þessara upplýsinga til góðs tíu daga á ári. Skattalögin eiga að vera einföld
og gegnsæ og ég tala nú ekki um réttlát. Þannig á lágtekjufólk ekki að
greiða skatta, þar sem lágmarkstekjur nægja vart til framfærslu, hvað þá til
að leggja eitthvað af mörkum til samneyslunnar. Þá eiga ýmsir jaðarskattar,
eins og t.d. barnabætur, vaxtabætur og niðurgreiðsla námslána, ekki að vera
það háir að unga fólkinu sé refsað fyrir að fylgja því „normi“ sem því er
ætlað. Að sama skapi eiga þeir sem hafa ofurlaun, hvernig svo sem þau
myndast, að greiða feita skatta, af því einfaldlega þeir eru aflögufærir. Ég
held hinsvegar að íslensk skattalög séu að mörgu leyti meingölluð og snýr
það bæði að einstaklingum sem og tekjuskiptingu í opinbera geiranum.
Þá tel ég stóran galla í skattakerfinu felast í ráðstöfun fjármagnstekjuskattsins.
Þetta er skattur af arði sem menn fá út úr fyrirtækjum sem þeir eiga hluti
í eða skattur af vaxtatekjum hvers konar. Einyrkjar í atvinnurekstri hafa
nýtt sér þessa nýlegu glufu og ótrúlega margir háeffarar fyrirfinnast. Þegar
grannt er skoðað borga margir þeirra ekkert til sveitarfélaganna sem þeir
búa í og þau hafa því tapað tekjum án þess að nokkuð kæmi á móti. Hér
á landi eru nú um 2200 manns sem einungis greiða fjármagnstekjuskatt
til ríkisins, en ekkert útsvar til sveitarfélaganna sem þeir búa í. Þeir lifa
semsagt eingöngu á tekjum af peningum eða hlutabréfum sem þeir hafa
væntanlega áður greitt af skatta til að eignast. Að öðru leyti gera þeir
ekki neitt, samkvæmt skattskrám. Þetta er eitthvað brogað í meira lagi.
Fjármagnstekjuskattur er 10% og á síðasta ári greiddu Íslendingar 16,3
milljarða króna í slíkan skatt og hafði sú tala tvöfaldast frá árinu 2005. Það
er að mínu viti ekki annað en eðlilegt að sveitarstjórnarmenn kvarti sáran
í ljósi þess að þeir sem einungis hafa fjármagnstekjur greiða ekki krónu
til síns nærsamfélags. Þó að þeir eigi börn sem gangi í skóla, aki á götum
sem sveitarfélögin láta gera og njóti annarrar þjónustu sem lögbundið er
að sveitarfélög veiti, þá greiða þeir ekkert fyrir þessa þjónustu. Ég get ekki
annað en tekið undir með þeim sveitarstjórnarmönnum sem telja að það sé
vitlaust gefið. Ég er sannfærður um að það myndi nýtast íbúum þessa lands
betur að hlutfall tekna sveitarfélaga ykist á kostnað þess sem ríkið hefur úr
að moða. Þó ekki væri nema fyrir þær sakir að ég tel að sukk og svínarí í
opinbera geiranum sé almennara á vegum ríkisins en í rekstri sveitarfélaga.
Til að útskýra sukk og svínarí nefni ég sem dæmi utanríkisþjónustu sem vex
í röngu hlutfalli við bættar samgöngur milli landa og batnandi fjarskipti.
Þá tel ég fullvíst að í rekstri margra ríkisrekinna stofnana þrífist vinnusvik,
óeðlilegar sporslur og annar sóðaskapur með almannafé. Slíkur sóðaskapur
þrífst betur ef ríkið fær stöðugt til sín auknar tekjur, þ.e. græðir óeðlilega
mikið. Sveitarfélögin mættu því mín vegna fá alla 16 milljarðana sem ríkið
hirðir nú í fjármagnstekjur. Það er nefnilega betra eftirlit með ráðstöfun
opinbers fjár eftir því sem eyðsla þess er nær almenningi. Af þeim sökum
eiga sveitarfélög að taka að sér fleiri verkefni en þau hafa í dag og ríkið
að fækka sínum á móti. Þá væri um að ræða skilvirkan flutning verkefna
frá ríki til sveitarfélaga og á því myndi landsbyggðin græða sérstaklega því
opinbera apparatið er jú í dag nánast allt á höfuðborgarsvæðinu.
Magnús Magnússon.
Er vitlaust gefið?
Viðbygging við leikskólann
Skýjaborg í Hvalfjarðarsveit var
afhent sl. miðvikudag. Það var
fyrirtækið ART sérsmíði sem sá
um framkvæmdina. Með nýju
byggingunni fjölgar plássum
á leikskólanum úr 30 í 48 og
lýsti Sigurður Sigurjónsson
leikskólastjóri yfir sérstakri
ánægju sinni með framkvæmdina.
Hann segir að viðbyggingin muni
gerbreyta allri aðstöðu í skólanum,
leikrými mun aukast og aðstaða
starfsfólks mun batna til muna.
Hann segir bygginguna mjög
vel hannaða og ekki sjáist að um
viðbyggingu sé að ræða. Hún
henti mjög litlu sveitarfélagi þar
sem hægt er að bæta við hana eftir
þörfum. Sigurður sagði einungis
eitt ár liðið frá því hann vakti athygli
sveitarstjórnar á því að leikskólinn
væri sprunginn og hrósaði þessum
skjótu viðbrögðum.
Það var Hlynur M.
Sigurbjörnsson varaoddviti sem tók
við lyklunum úr höndum Hjalta
Hafþórssonar framkvæmdastjóra
ART sérsmíði, en Hlynur var
formaður framkvæmdanefndar.
Hlynur hrósaði verktakanum fyrir
góð vinnubrögð og að standast allar
áætlanir.
Leikskólinn verður opinn
öllum íbúum Hvalfjarðarsveitar til
sýningar laugardaginn 11. ágúst frá
kl. 14 til 16.
kóp
Jóhanna Halldóra Sigurðardóttir,
skólastjóri Laugargerðisskóla
á Snæfellsnesi síðastliðin sex
ár hefur sagt starfi sínu lausu.
Byggðasamlag skólans, sem Eyja­ og
Miklaholtshreppur og Borgarbyggð
standa að, hefur auglýst starf
skólastjóra laust til umsóknar og
er umsóknarfrestur til 10. ágúst
nk. „Eins og gefur að skilja þarf
viðkomandi að hefja störf sem allra
fyrst og umsóknafrestur stuttur,
eða til föstudagsins 10. ágúst n.k.
Laugargerðisskólinn er staðsettur á
Snæfellsnesi. Í skólanum eru um 50
börn úr Eyja­ og Miklaholtshreppi
og fyrrum Kolbeinsstaðahreppi
og er þeim að mestu kennt í 4
bekkjardeildum. Við skólann
er starfræktur tónlistarskóli.
Starfsmenn eru alls um 15,“
segir m.a. í fréttatilkynningu frá
byggðasamlaginu.
Skriflegar umsóknir um stöðuna
skulu berast til Ásbjörns Pálssonar
formanns byggðasamlagsins,
Haukatungu, 311 Borgarnesi.
Umsóknarfrestur er, eins og áður
segir, til föstudagsins 10. ágúst.
Nánari upplýsingar veitir Ásbjörn
í síma 435­6762 og 893­6762 og á
netfangið asbjorn­helga@simnet.is.
mm
Ríkisstjórnin mun leggja
alls 1.400 milljónir aukalega í
Byggðastofnun á næstu tveimur
árum. Þar af fara 1.200 milljónir til
að laga skuldastöðu stofnunarinnar
og á hún þá að vera betur í stakk
búin að bregðast við vanda
fyrirtækja, ekki síst í sjávarútvegi.
Þá fara 200 milljónir til sérstakra
átaksverkefna atvinnuþróunarfélaga
til að sinna nýsköpunarverkefnum.
Þetta kom fram í ræðu
Össurar Skarphéðinssonar
byggðamálaráðherra sem hann hélt
við opnun Nýsköpunarmiðstöðvar
Íslands. Í máli hans kom fram að
þessar aðgerðir séu fyrst og fremst
til að stofnunin geti aðstoðað
fyrirtæki sem verða illa úti vegna
niðurskurðar í þorskveiðum og
verði fjármunirnir merktir þeim
svæðum sem verst verða fara úti
vegna hans. Ráðherra sagði að
bankar og fjármálastofnanir hefðu
tekið vel í að aðstoða fyrirtæki í
sjávarútvegi, en líkt og fram hefur
komið höfðaði ríkisstjórnin til
velvilja þeirra vegna niðurskurðar
þorksveiðikvóta.
kóp
Frá örófi alda hafa trébátar verið
gerðir út á Íslandi en á undanförnum
árum hefur þeim farið mjög svo
fækkandi. Sumir hafa verið rifnir
niður og aðrir verið notaðir í
áramótabrennur. Til eru félög
sem hafa einungis trébáta á sínum
snærum eins og Norðursigling
á Húsavík sem er einungis með
trébáta í hvalaskoðun. Þeir eru því
afar fáir eftir sem gera út til veiða
á trébátum hér á landi, plast­ eða
stálbátar hafa tekið við.
Sjómenn eru sammála um að
gömlu eikarbátarnir hafi sálir og
eiga margir góðar minningar af
þeim og því er um ákveðinn söknuð
að ræða í huga þeirra. Í Ólafsvík er
aðeins einn trébátur eftir; Jórunn ÍS
140. Báturinn hefur verið bundinn
við bryggju í eitt ár en nú hefur
eigandi hans, Magnús Snorrason,
ákveðið að taka bátinn í klössun
og fá á hann haffærnisskírteini og
gera bátinn út á skötusel í sumar, en
allgóð veiði hefur verið á skötusel í
Breiðarfirði það sem af er sumri.
Jórunn er skráð 33 brúttótonn
að stærð og er smíðuð í Hafnarfirði
árið 1976. Báturinn hefur borið
mörg nöfn: Kitti BA, Hafsúla BA,
Hafsúla ÍS, Hafsúla ST, Haförn ÍS,
Haförn HU, Dagbjört SU, Már
NS, Hafsúlan RE, Hafsúlan SH og
nú Jórunn ÍS.
af
Það lá vel á útgerðamanninum Magnúsi
Snorrasyni þegar hann var að mála um
borð í Jórunni ÍS í síðustu viku.
Síðasti trébáturinn í Ólafsvík
Jórunn í uppsátrinu í Ólafsvík stærsti báturinn sem hefur lagst þar að.
Starf skólastjóra
Laugargerðisskóla auglýst
Laugargerðisskóli.
Ljósm. Sigurður Jónsson.
Byggðastofnun fær
1.400 milljónir aukalega
Sigurður Sigurjónsson leikskólastjóri var
ánægður með framkvæmdina.
Viðbygging við Skýjaborg tilbúin

Nýja viðbyggingin fellur mjög vel að eldra húsnæði leikskólans.