Skessuhorn - 22.08.2007, Blaðsíða 31

31 MIÐVIKUDAGUR 22. ÁGÚST
www.skessuhorn.is
Hefur þú farið nýlega á:
www.skessuhorn.is?
Sæmundur við planka úr Skeiðarárbrúnni sem rak í Beruvík eftir hlaupið 1996.
Ljósm. Guðrún Lára Pálmadóttir.
Landbrot í
Melabökkum
Eins og sjá má á meðfylgjandi
myndum hefur orðið ansi mikið
landbrot í Melabökkum í Melasveit.
Sigrún Sólmundardóttir, húsfreyja
í Belgsholti sagði í samtali við
Skessuhorn að brotið hefði
gríðarlega mikið á þessu horni
og miklar breytingar hefðu orðið
á ásýnd svæðisins vegna ágangs
sjávar. Sé gengið fyrir hornið blasir
við hellir sem sjórinn hefur myndað
tiltölulega nýlega. „Það er ótrúlegt
að sjá hvað sjórinn er öflugur og vel
þess virði að gagna þarna niður og
fylgjast með þessu,“ segir Sigrún.
Bóndi hennar, Haraldur
Magnússon, er alinn upp í
Belgsholti og staðfestir hann hve
sjórinn hefur breytt landslaginu.
„Hann Jón Magnússon í Melaleiti
sagði mér frá því fyrir mörgum
árum að þegar byggt var íbúðarhús
þar fyrir 1960 hafi hann mælt
vegalengdina frá húsi og fram á
bakkann. Fimmtán til tuttugu árum
síðar hafi hann fundið miðann sem
hann hafði hripað töluna niður á og
mælt aftur. Þá hafi komið í ljós að
hrunið hafði fram af bakkanum um
56 cm. á ári. Hann hefur ekki gert
nákvæmar mælingar á því síðan
en hann heldur að það hafi ekkert
minnkað.“
kóp
Hellirinn sem sjórinn hefur myndað í bergið. Ljósm. Sigrún Sólmundardóttir.
Þriðja strandgangan á
Snæfellsnesi
Á laugardaginn var genginn
þriðji áfanginn af sex í strandgöngu
Þjóðgarðsins Snæfellsjökuls og var
það jafnframt síðasta skipulagða
ganga sumarsins á vegum hans.
Gengið var frá Skálasnaga að
Beruvík og tók gangan rúmlega
fimm klukkustundir. Sæmundur
Kristjánsson landvörður og
leiðsögumaður frá Rifi leiddi gesti
um sögusvæði vitavörslu, bjargnytja,
skipsstranda og búskapar ásamt því
að fugla-, plöntu- og dýralífinu voru
gerð góð skil. Rákust göngumenn
m.a. tófu sem þeim erlendu þótti
sérlega gaman að sjá. Einnig rakst
hópurinn á rjúpnahreiður með
eggjum en ólíklegt er að rjúpan sú
komi ungum á legg svona seint.
Kíkt var í hverja gjótu eftir
ferlaufungi sem vex á þessu svæði
en hann fannst þó ekki í þetta
skiptið enda er ferlaufungur ein af
sjaldgæfustu plöntum landsins og
friðlýst tegund. Í Beruvíkinni fannst
planki úr Skeiðarárbrúnni sálugu
sem rak vestur með suðurströnd
landsins og allt á Rauðasand á
örfáum dögum eftir hlaupið 1996.
Þáttaka í sumardagskrá
þjóðgarðsins hefur verið mjög
góð og þakka þjóðgarðsvörður og
landverðir gestum fyrir þátttökuna
og ánægjulega samveru í viðburðum
sumarsins. Þess má geta að
Gestastofa þjóðgarðsins á Hellnum
verður opin alla daga frá 10-18 til
og með 10. september.
glp
Fuglalífið í Saxhólsbjargi skoðað. Ljósm. Guðrún Lára Pálmadóttir.