Akureyri - 27.11.2014, Síða 8

8 44. tölublað 4. árgangur 27. nóvember 2014
VILTU SEGJA SKOÐUN ÞÍNA?
Akureyri vikublað óskar eftir að komast í samband við bæjabúa sem
sjaldan eða aldrei hafa veitt viðtöl en væru til í að segja skoðun sína í
blaðinu eða veita stutt viðtöl. Vinsamlegast sendið okkur tölvu-
póst á bjorn@akureyrivikublad.is eða hringið í síma 862 0856.
LOF OG LAST VIKUNNAR
LOF fá afgreiðslumenn í JMJ og Joe‘s
á Akureyri fyrir frábæra og skemmtilega
þjónustu. Svo segir ung kona úr Þingeyjar-
sýslu sem hafði samband við blaðið. Hún
hafi farið nýverið í leit að jólagjöfum fyrir
eiginmann og son. „Þeir kunna sitt fag
þarna, ég keypti miklu meira af fötum en
ég ætlaði mér. Það er bara snilld hjá þeim
sem þarna vinna, þeir eru svo léttir og
skemmtilegir,“ segir þingeyska konan...
LOF fær tillitssamur vegfarandi sem
aðstoðaði ökumann við að skipta um dekk
á Víkuskarði fyrir nokkrum dögum. Svo
segir ungur maður sem hafði samband við
blaðið. Hann segir að hann hafi hreinlega
ekki haft á hreinu hvað gera skyldi þegar
punkteraði að aftan í myrkri og kulda í
skarðinu. Fljótlega bar að mann á Húsavík
sem var enga stund að hjálpa til og ferðin
gat haldið áfram. „Ég var svo vitlaus að
spyrja ekki bjargvættinn um nafn en það
kom fram að hann var frá Húsavík. Takk
Húsvíkingur!“ Segir ungi maðurinn...
LAST fá þeir sem „reyna að útvatna jólin
með því að byrja stemmninguna allt of
snemma“ segir í bréfi sem blaðinu barst frá
konu í Skagafirði. Hún segist hafa skroppið
til Akureyrar um helgina og hafi sem dæmi
kunnað því illa að þurfa að hlusta á jólalög
í verslunum. „Þetta er allt of snemmt. Þetta
útvatnar jólin,“ segir konan sem telur að
fyrst um mánaðamótin sé orðið tímabært
að spila jólalög. Þá þyki henni sem sumir
séu full „seríuglaðir“ og of snemma í tíð-
inni. „Ég veit samt að margir hafa gaman
að því að sjá jólaljósin og vilja að þau lýsi
sem lengst,“ bætir konan við...
LAST fá fjölmiðlar fyrir að sinna illa
ráðstefnu sem fram fór um einelti í Há-
skólanum á Akureyri síðastliðinn föstudag.
Svo segir kona sem sótti ráðstefnuna og
hafði samband við blaðið. „Það er slæmt
þegar stóru fjölmiðlarnir klikka, oft eru
hinir staðbundnu betri en bæði litlir og
stórir miðlar klikkuðu þarna illa, a.m.k. hef
ég enga umfjöllun séð enn, sagði konan í
vikubyrjun...
AKUREYRI VIKUBLAÐ 44. TÖLUBLAÐ, 4. ÁRGANGUR 2014
ÚTGEFANDI Fótspor ehf. ÁBYRGÐARMAÐUR Ámundi Ámundason 824 2466, amundi @ fotspor.is.
FRAMKVÆMDASTJÓRI Ámundi Steinar Ámundason, as @ fotspor.is.
AUGLÝSINGASTJÓRI Ámundi Steinar Ámundason, as @ fotspor.is. 578-1193.
RITSTJÓRI Björn Þorláksson, bjorn @ akureyrivikublad.is, 862 0856 MYNDIR Björn Þorláksson, Völundur Jónsson og fleiri.
UMBROT Völundur Jónsson PRENTUN Ísafoldarprentsmiðja - Svansmerkt prentun. DREIFING
14.500 EINTÖK ÓKEYPIS – UM ALLT NORÐURLAND
AÐSEND GREIN DÝRLEIF SKJÓLDAL
Bækur fyrir BÖRN?
Fyrir jól í fyrra skrifaði ég grein um
barnabækur sem gefnar voru út til
þess eins, að því er virtist, að viðhalda
kynjaímyndum og ég hef ákveðið að
gera það áfram þar til bókaútgefend-
ur sjá sóma sinn í öðru. Eins og ég hef
áður sagt þá elska ég Bókatíðindi. Þar
er saman kominn allur sá fróðleikur
sem áhugamanneskja um bækur getur
viðað að sér á einum og sama staðn-
um í örfáum orðum. Bókatíðindin í ár
sýna mér að mörg bókaforlög eru búin
að taka sig á en ástandið er samt sem
áður ekki gott.
Íslenskir barnabókahöfundar
standa undir nafni, þeir eru að skrifa
bækur fyrir börn eins og sjá má þegar
rennt er yfir kaflann um íslenskar
barnabækur. Þó með þeirri undan-
tekningu að mér finnst að Frosen hár-
bókin ætti ekki flokkast undir barna-
bók heldur í flokkinn ,,Fræði og bækur
almenns efnis.“ Enda er sagt um hana
„Lærðu að greiða þér eins og Anna og
Elsa!“
Þegar kemur að kaflanum um þýdd-
ar barnabækur þá er meira um bækur
sem orka tvímælis. Hér koma nokkur
dæmi:
Prinsessa. Bókafélagið BF gefur út.
„Sólbjörtu prinsessu hefur verið boðið
á ball en hún á engan kjól til að fara í.
Leitaðu um allt að gimsteinum, fjöðr-
um og öðru sem Sólbjört þarf fyrir
ballið. Armband fylgir með.“
Önnur bók sem Bókafélagið gefur
út er Búðu til þín eigin Vinabönd. Sú
hefur þann tilgang að kenna „börn-
um að búa til gullfalleg vinabönd”.
Kápa bókarinnar er samt fjólublá með
bleiku letri og með bros-
andi stelpum. Í leikskól-
anum búa bæði strákar og
stelpur til vinabönd enda
eru börn á þeim aldri að
læra að rækta vináttuna
og eignast vini.
Límmiðataskan - fönd-
ur og fjör og Límmiða-
taskan - Litum og leikum.
Setberg gefur út. „Blá og
bleik límmiðabók með lit-
ríkum og skemmtilegum
verkefnum“.
Strumparnir teikni-
bókin mín, bleik og græn. Sögur útgáfa
gefur út. Þessar fjórar gagnvirku bæk-
ur eru með stöðluðum kynjamyndum
þar sem því er komið inn að strákar og
stelpur geti ekki haft sömu áhugamál
og að allt sem ætlað er stelpum verði
að vera krúttlegt, kvenlegt og bleikt.
Dóra landkönnuður er skemmtileg
og kennir börnum margt. Bæði strákar
og stelpur hafa gaman að henni. Enda
segir í umsögn með límmiðabókinni
„Allir krakkar elska Dóru landkönnuð.“
Bókin Ævintýrið um afmælisóskirnar
og 1000 límmiðar sem einnig eru gefn-
ar út af Sögur útgáfu eru samt settar
í „stelpulegan“ búning og með æv-
intýrinu fylgir „fallegt hálsmen fyrir
krakkana.“
Frosen - ævintýri Önnu er sjálfsagt
fín bók fyrir bæði kyn og verður sjálf-
sagt geysivinsæl en hvað
finnst ykkur um þessa
kynningu á efni hennar:
„Hér er saga systranna
Önnu og Elsu, prinsess-
anna af Arendell, sögð frá
sjónarhóli hinnar hug-
rökku og kraftmiklu Önnu.
Hvernig hún sér nýja hlið
á Elsu, hittir Kristján,
Svein, Ólaf og tröllin -og
uppgötvar máttinn sem
býr í sannri ást.“
Ég veit ekki með ykk-
ur en ef ekki kæmi fyrir
orðið tröll þarna þá hefði ég haldið að
ég væri að lesa um rómantíska ástar-
sögu en ekki barnabók.
Foreldrar, ömmur, afar, frænk-
ur, frændur, vinir og vinkonur gefum
börnum bækur, lesum með þeim, hvetj-
um þau til lesturs, segjum þeim sögur
og umfram allt, gefum góðar bækur.
p.s. allar tilvitnanir eru úr áður-
nefndum Bókatíðindum.
Höfundur er sundþjálfari og leik-
skólakennari
Að klúðra
siðbót
Það er með eindæmum hvað oddamenn ríkis-stjórnarinnar eru miklir klaufar í samtali sínu
við þjóðina. Kannski er það vegna þess að þeir hafa
ekki þurft á félagslegum hreyfanleika að halda sjálfir.
Kannski vegna þess að þeir fæddust með silfurskeið
í munni. Kannski þekkja þeir ekki annan heim en
veröld annarra silfurskeiðunga. Það gætu verið eins
og 5% þjóðarinnar. En hvers eigum við hin, við 95%
þjóðarinnar að gjalda?
Kornið sem fyllti mælinn er viðbrögð Sigmundar
Davíðs Gunnlaugssonar og Bjarna Benediktssonar að
kvöldi dags í síðustu viku, daginn sem Hanna Birna
hrökklaðist loks frá ráðherravöldum. Látum yfirlýsingu
hennar eina og sér eiga sig. Það var viðbúið að hún gæti
ekki stigið til hliðar með þeirri reisn sem fylgir því að
segja sannleikann heldur hafi reynt að kenna ákvörðun
sína við persónulegar aðstæður og hafi enn einu sinni
reynt að nota eigin fjölskyldu sem plástur á eigið van-
hæfi. En að bæði forsætisráðherra og fjármálaráðherra
skyldu klúðra tækifærinu til siðbótar, tækifærinu sem
þessi dagur var Nýju Íslandi er þyngra en tárum taki.
Að hvorugur oddamanna stjórnarinnar skyldi sjá að
föstudagurinn síðasti var dagurinn sem kveikti von í
hugum almennings. Þetta var dagurinn sem von kvikn-
aði um að stuðningur við okkar minnstu bræður, gæti
fellt risa, dagurinn sem að stjórnmálaelítan myndi nýta
til að reyna að byggja upp nýtt traust við almenning,
dagurinn sem réttlætið fékk framgang.
En ekki töluðu þeir þannig að hægt væri að nýta
daginn sem upphaf nýrra tíma. Hvorki Bjarni Ben né
Sigmundur Davíð sögðu neitt sem gaf fyrirheit um
að nýtt og betra siðferði ætti von. Þess í stað ræddu
oddamenn ríkisstjórnarinnar báðir Hönnu Birnu sem
fórnarlamb heimskrar og vondrar þjóðar. Þeir voru bara
reiðir vegna þess að réttlætið hafði haft sigur! Í stað þess
að nota daginn til samræðu við almenning ákváðu þeir
að beina einkum orðum sínum til ímyndaðra þjóðníð-
inga og svo hinna valdhafanna hér á landi. Vilja Bjarni
og Sigmundur fá að vinna verk sín í myrkri? Af hverju
er forsætisráðherra einkum svona reiður? Af hverju er
hann með þessa þráhyggju að hjólar í fjölmiðla, einmitt
þegar þeir gera skyldu sína? Hann kennir öllum öðrum
um en sjálfum sér. Honum tókst, í félagi við Bjarna, að
klúðra siðbótinni sem síðastliðinn föstudagur gaf fyr-
irheit um. Hann kaus að breyta deginum í föstudaginn
langa með því að snúa öllu á haus. Enn einu sinni.
Stundum finnst manni eins og forsætisráðherra geti
ekki séð heiminn í kringum sig frá öðrum sjónarhóli
en sjálfri Golgata hæðinni. Að lokinni ímyndaðri eigin
krossfestingu. Ef forsætisráðherra ætlar áfram að láta
vænisýki, oflæti og dramb ráða för er ekki von á góðri
siglingu þjóðarskútunnar. Framkoma forsætisráðherra
er dapurleg , því margt virðist honum ágætlega gefið.
Með ritstjórakveðju
Björn Þorláksson
Dýrleif Skjóldal
Bless sagði hún og veifaði sæfarendum til heilla. Völundur