Víkurfréttir - 19.05.2011, Blaðsíða 2
2 Fimmtudagurinn 19. maí 2011VÍKURFRÉTTIR
Hagnaður HS Orku
tvöfaldast
Hagnaður HS Orku á fyrsta fjórðungi ársins nam 2.231 milljón króna samanborið við
1.190 milljónir króna á sama tímabili í fyrra.
Lesa má úr reikningnum, að bætt afkoma stafi
aðallega af hækkun á álafleiðum.
Rekstrartekjur félagsins námu 1.953 milljónum
króna samanborið við 1.812 milljónir króna á
sama tíma í fyrra.
Vel steikt sælgæti
á eldavélarhellu
Slökkvilið Brunavarna Suðurnesja var kallað að íbúð við Faxabraut í Keflavík í hádeginu
á mánudag. Nágranni hafði tilkynnt um reyk í
íbúð.
Í ljós kom að kassi með sælgæti stóð á elda-
vélarhellu sem var í gangi svo af hlaust talsverður
reykur. Slökkviliðsmenn opnuðu hurðar og glugga
upp á gátt en ekki þótti ástæða til að setja reyk-
blásara í gang.
Filma.is opnar dyr fyrir
Íslendinga erlendis
Filma.is hefur opnað dyr sínar fyrir Íslend-ingum sem staðsettir eru erlendis en núna
er hægt að leigja íslenskar kvikmyndir og þætti
á netinu. Úrvalið er takmarkað í byrjun en unn-
ið er hörðum höndum að því að stækka það á
komandi mánuðum. Hægt er að leigja þættina
Mannasiðir Gillz, Ameríski Draumurinn, Ham-
arinn og Steindinn okkar og svo má helst nefna
kvikmyndir eins og Blóðbönd, Börn Náttúrunn-
ar, Bíódagar, Englar Alheimsins o.fl.
Filma.is er íslensk síða þar sem hægt er að leigja
stórt úrval af kvikmyndum og þáttum á netinu.
Hún er fyrsta síða sinnar tegundar á Íslandi og
tekur mið af erlendum síðum á borð við Netflix,
iTunes og Amazon VOD. Með þessu er verið að
koma til móts við Íslendinga sem eru annað hvort
búsettir erlendis eða eru að ferðast og vilja geta
nálgast íslenskt afþreyingarefni í gegnum netið.
Hægt er að nálgast heildarlista yfir það efni sem er
í boði á fréttasíðu Filma.is
Breytingu á frumvarpi
um fiskveiðistjórnun
fagnað í Reykjanesbæ
Hjörtur M. Guð-bjartsson tók við
formennsku af Ólafi
Thordersen á aðalfundi
Samfylkingarinnar í
Reykjanesbæ sem hald-
inn var þriðjudaginn
10. maí. Ólafur skilaði
blómlegu búi til hins
nýja formanns, félagið
að verða skuldlaust og
öflugt starf í gangi.
Auk Hjartar þá skipa þau Vilhjálmur Skarphéðins-
son, Ragnheiður Ásta Þorvarðardóttir, Guðný
Kristjánsdóttir og Johan D. Jónsson hina nýju
stjórn.
Fjörugar umræður um bæjar- og landsmál urðu á
fundinum og var neðangreind ályktun samþykkt
einróma:
„Aðalfundur Samfylkingarinnar í Reykjanesbæ
fagnar þeim mikla árangri sem ríkisstjórn Jó-
hönnu Sigurðardóttur hefur náð á erfiðum tímum
og lýsir yfir sérstakri ánægju með að nú á tveggja
ára afmælisdegi ríkisstjórnarinnar sé lagt fram
langþráð frumvarp til breytingar á lögum um
fiskveiðistjórnun sem feli í sér almenningseign
fiskistofna, innköllun aflaheimilda og endurút-
hlutun þeirra.“
›› FRÉTTIR ‹‹
Eins og við greindum frá í síðasta blaði verður ekki grillað í
bráð á heimili einu í Sandgerði. Ástæðan er að starri hefur gert
sér hreiður á grillinu og verpt þar fimm eggjum. Þegar grillið
var opnað á svölunum kom í ljós að það var orðið troðfullt
af grasi og fuglafjöðrum og í miðjan hauginn var svo búið að
verpa fimm fagurgrænum eggjum. Nú eru fimm ungar komnir í
hreiðrið á grillinu og hávær söngur um mat þannig að foreldr-
arnir eru í stöðugum ferðum á grillið með gott í gogginn fyrir
afkvæmin sín. Myndina af ungunum tók Eyþór Sæmundsson
blaðamaður Víkurfrétta nú í vikunni.
Ungarnir komnir á grillið!
Atvinnuleysi á Suður-nesjum í apríl er himin-
hátt og langt fyrir ofan
landsmeðaltal. Þannig voru
13,6 prósent Suðurnesja-
manna án atvinnu í apríl
meðan meðaltal atvinnu-
leysis á landsbyggðinni var
6,9 prósent og 8,7 prósent á
höfuðborgarsvæðinu.
Á vef Vinnumálastofnunar
má finna skýrslu um atvinnu-
ástandið í apríl og m.a. borið
saman atvinnuástandið í dag
og allt aftur til ársins 2002.
Þá var atvinnuleysið á Suður-
nesjum 2,2 prósent. Á tíma-
bilinu 2002-2011 var atvinnu-
leysi minnst árið 2006 þegar
það var 1,8 prósent í apríl. At-
vinnuástandið var verst í fyrra
þegar 14,6 prósent Suður-
nesjamanna voru án vinnu í
apríl. Í ár var atvinnuleysið
prósentustigi minna eða 13,6
prósent.
Á bakvið allar þessar pró-
sentutölur eru einstaklingar.
Þeir eru á Suðurnesjum sam-
tals 1583 sem voru án atvinnu
í apríl. Vinnumálastofnun
hefur flokkað atvinnulausa
eftir sveitarfélögum. Flestir
eru þeir án atvinnu í Reykja-
nesbæ eða 1116 talsins. Í
Sandgerði voru 170 manns
án vinnu í apríl, 112 í Grinda-
vík, 100 í Garðinum og 85 í
Vogum.
Athygli vekur að í öllum
sveitarfélögum nema Grinda-
vík eru karlar fjölmennari á
atvinnuleysisskrá. Í Grindavík
voru 66 konur atvinnulausar í
apríl og 46 karlar.
Atvinnuleysi eftir lengd at-
vinnuleysis er greint í skýrslu
Vinnumálastofnunar. Þar
kemur m.a. fram að af þessum
1583 sem eru atvinnulausir
hafa 201 verið án vinnu í yfir
tvö ár. Stór hópur eða 150
manns er einnig búinn að
vera án vinnu í 18-24 mán-
uði. Þá eru 341 sem hafa verið
atvinnulausir í 6-9 mánuði.
Samtals voru 37 atvinnulausir
í apríl sem voru að koma inn
nýir á atvinnuleysisskrá og
höfðu verið án vinnu í 1-3
vikur.
Árni Sigfússon bæjarstjóri í
Reykjanesbæ lýsti því í við-
tali við Víkurfréttir í apríl
að nokkuð væri um að at-
vinnulausir hafi flutt burtu úr
bænum og eins hafi fjölgað
fólki sem komið er á fram-
færslu sveitarfélagsins eftir að
hafa fallið út af atvinnuleysis-
skrá.
Himinhátt atvinnuleysi á Suðurnesjum
Kvikan, auðlinda- og menningarhús var formlega opnað í Grindavík á þriðjudag að viðstöddu fjölmenni. Í Kvik-
unni eru nú tvær sýningar. Annars vegar Saltfisksetrið sem
verið hefur í húsinu frá því það var opnað 2002 og hins vegar
ný sýning sem nefnist Jarðorka sem er ætluð að fræða gesti
um undirstöðuatriði íslenskrar jarðsögu og jarðfræði, skýra á
einfaldan hátt eðli jarðhita, eldvirkni og jarðskjálfta. Þá hefur
verið opnað kaffihús í Kvikunni sem er nú opið alla daga vik-
unnar frá kl. 10-17 og verður húsið nú miðstöð auðlinda- og
menningar í Grindavík.
Róbert Ragnarsson bæjarstjóri og formaður stjórnar Kvikunnar
fór yfir þær breytingar sem gerðar hafa verið á rekstri hússins.
Jarðsögusýningin var áður í Gjánni í Eldborg en var lokað á
sínum tíma en hefur nú verið flutt á efri hæðina í Kvikunni auk
þess sem bætt hefur verið við upplýsingum um Auðlindastefnu
Grindavíkurbæjar og glæsilegum eldgosamyndum. Vel hefur
tekist til við flutninginn en Björn G. Björnsson leikmyndahönn-
uður, sem hannaði báðar sýningarnar í Kvikunni, kom að því
að skipuleggja jarðsögusýninguna í Kvikunni. Stjórn Kvik-
unnar ákvað að leita til aðila í Grindavík sem reka matsölu- eða
kaffistaði til þess að taka að sér rekstur á kaffihúsi í Kvikunni í
umboðssölu. Eitt tilboð barst og var það frá Mömmu míu og var
gengið til samninga við fyrirtækið. Myndarlegt kaffihús verður
því rekið í Kvikunni í sumar.
Við opnunina á þriðjudag voru tvö skemmtileg tónlistaratriði
sem settu tóninn fyrir menningarstarfsemi í Kvikunni. Annars
vegar sungu efnilegar söngkonur lagið ,,Keyrum þetta í gang“
úr árshátíðarleikriti Grunnskóla Grindavíkur og hins vegar tók
hljómsveitin Jón Páll og Pollarnir nokkur lög. Þá opnaði Róbert
Kvikuna með formlegum hætti og gestir skoðuðu sýningarnar
tvær í húsinu.
Hannað hefur verið auðkennismerki fyrir Kvikuna, auðlinda- og
menningarhús og sá Gunnar Júlíusson grafískur hönnuður um
það. Merkið þykir endurspegla vel auðlindirnar tvær sem eru í
húsinu, annars vegar hraunkviku og hins vegar hafið. Gunnar
hannaði einnig auðkennismerki Jarðorkunnar.
Kvikan opnuð - Tvær glæsilegar
auðlindasýningar og kaffihús