Frjáls verslun - 01.08.2010, Blaðsíða 65

F R J Á L S V E R S L U N • 8 . - 9 . T B L . 2 0 1 0 65
Hvenær telur þú að fjárhagslegri
endurskipulagningu fyrirtækja ljúki og
þau geti byrjað að fjárfesta aftur?
Ég vona að það fari að sjá til botns
í þeirri vinnu og með samstilltu átaki
fjármálastofnana, hins opinbera og
fyrirtækjanna sjálfra vona ég að það
geti orðið á fyrri hluta næsta árs. Ég tel
líka mikilvægt að þau fyrirtæki sem hafa
svigrúm til að fjárfesta nýti tækifærið til
þess nú og örvi þannig hagkerfið. Sem
betur fer eru þau fyrirtæki til.
Finnur þú á meðal viðskiptavina þinna
að þeir fái ekki nægilega fyrirgreiðslu í
bönkum?
Það er alltaf afstætt hvað maður telur að
sé nægileg fyrirgreiðsla og einkum við
þær sérstöku aðstæður sem við búum
nú við. Ég held að þeir sem óska eftir og
geta staðið undir eðlilegri fyrirgreiðslu geti
fengið hana á grundvelli greiðslugetu.
Málefni annarra eru enn í meðferð og
margir eru í leiðréttingarferli með erlend
bíla- og húsnæðislán og fá þar af leiðandi
ekki fyrirgreiðslu meðan óvissa ríkir
um þær málalyktir. Almennt held ég að
fjármálafyrirtæki séu varkár í að veita
fyrirgreiðslu meðan óvissan um meðferð
skuldamála er enn þó nokkur.
Finnur fyrirtæki þitt beint fyrir því að
gjaldeyrishöftin trufli starfsemi þess?
Gjaldeyrishöftin torvelda okkar starfsemi
þannig að við þurfum að fara aðrar
leiðir til að koma greiðslum til erlendra
samstarfsaðila okkar og það tekur oft
lengri tíma en áður.
Í þessu sambandi langar mig jafnframt
að benda á að það var þrekvirki á sínum
tíma þegar bankarnir féllu að takast skyldi
að halda greiðslukerfinu gangandi. Við
hefðum staðið frammi fyrir stórum vanda
hefði það ekki tekist.
Er fyrirtæki þitt í samkeppni við
fyrirtæki í eigu banka eða kröfuhafa?
Kreditkort er í eigu Íslandsbanka,
Landsbanka, Byrs og fjölmargra
sparisjóða og við erum einnig í samkeppni
við banka og sparisjóði við að veita
þjónustu til korthafa. Kreditkort er þó
eina félagið sem býður upp á American
Express-greiðslukort með öflugum
ferðafríðindum.
Hvaða áhrif hefði það á starfsemi
fyrirtækis þíns ef Íslendingar gerðust
aðilar að Evrópusambandinu?
Bein aðild að Evrópusambandinu hefði
í sjálfu sér ekki veruleg áhrif á starfsemi
Kreditkorts en innganga í myntbandalagið
og upptaka annars gjaldmiðils hefði
hins vegar mun meiri áhrif. Þá verða
allar úttektir á evrópska myntsvæðinu í
sömu mynt og innlendar og ekki lengur
þörf á yfirfærslu úr einni mynt yfir í aðra
sem kann að leiða til lægri kostnaðar við
greiðslumiðlun milli landa.

Hyggst fyrirtæki þitt bæta við sig fólki á
næstunni?
Já, það kann að fara svo og það yrði í
þeim tilgangi að hagræða og ná fram
sparnaði á öðrum sviðum.
Ertu hlynnt því að festa vísitöluna í
öllum lánasamningum og kippa þannig
verðtryggingunni úr sambandi?
Ég set spurningarmerki við það
hvort eðlilegt sé að nota vísitölu
neysluverðs sem grunn til verðtryggingar
fjárskuldbindinga sem leiðir til þess að
t.d. þegar verð á orku hækkar þá skuli
lán einstaklinga og fyrirtækja hækka að
sama skapi. Dæmin verða skýrust þegar
sveiflurnar eru miklar og mismunurinn milli
launaþróunar og verðlagsþróunar er mikill.
Slíkt getur haft alvarlegar afleiðingar og
dæmi fortíðar tala sínu máli um það.
Ef þú yrðir forsætisráðherra í einn dag;
hvert yrði þitt fyrsta verk?
Hvetja þjóðina til að nýta hæfileika sína,
hugmyndaauðgi, dugnað og framsækni
til að leita leiða til að skapa meiri
gjaldeyristekjur og vinna okkur út úr
þeirri efnahagslægð sem við erum í. Ég
myndi líka grípa til aðgerða til að skapa
framtíðarstörf fyrir allt það frambærilega
og vel menntaða fólk sem hér býr og
skapa umgjörð fyrir betur launuð störf.
Það leynast tækifæri víða – þau eigum við
að nýta.
Viðskiptalífið yrði betra ef …
… meira jafnvægi væri milli kynja í æðstu
stjórnunarstöðum atvinnulífsins og reyndar
þjóðlífsins alls.
Efast um að
eðlilegt sé að nota
vísitölu neyslu­
verðs sem grunn
fjárskuld­bind­
inga
MARTHA EIRÍKSDÓTTIR
framkvæmdastjóri Kreditkorts
Það leynast tækifæri víða
– við eigum að nýta þau
Martha Eiríksdóttir,
framkvæmdastjóri Kreditkorts.